Jeremia 22 - ŊWÀʼ NYÙY

Jeremia tír fon Juda

¹ Nyùy Tàr yòŋ e mò jii, «Dù é ntoʼ Juda, e fìʼtì fo jii,

² ‹Wò woo fon woó Juda, ku yuùrí kinyo ke Nyùy Tàr suuy ki. Wò woo rám Fòn Davir, vèn à vé saʼ vée, à wír ve á yii tósin kishém kìn adzə̀me ku yuùrí.

³ Nyùy Tàr suuy jii: Vèn wáa tinén vinyo là kiloʼ, a yiì vinyo tìítiy. Vèn wáa sə wír wo á bóʼó fo ŋgaà mbóʼmé wo. Lá á yòʼ a ker nə̀ʼsì. Lá á yòʼ a nyàvrì e viŋgwìy vi, kìn e wón tsə̀ə́, kìn e vikǐy ŋkfəə. Lá á yòʼ a yuyrí sa alànjò é nsay fèn.

⁴ A vèn lòo dzə a yunín vinyo vìn, bo wìr woo Fòn Davir ram yòʼ wíy buŋ fó a saʼ vifon. Afone kù wíy a tosín vishém veé ntoʼ wùn à vé lìm véví, a shaà e vitu ve vitentén ve səŋ nyám si, a shaà e vitu ve nyàm se ŋkoʼ.

⁵ Yii bèy, a vèn dzə̀ là fó a yunín vinyo vìn, bo ntoʼ rə̀n wíy dù e vifə̀m. Sùúy mo woo Nyùy Tàr e shuu wómé, e kfə̀n lìʼ.› »

⁶ Kinyo ke Nyùy Tàr suuy kùm ntoʼ Juda ki dzə̀ jii: «Yì yaáne fo mò moo nsay Gilead, rəsìn moo Gwan Lebanon. Yii bèy, a m yíi siìr fó ji wóʼ. Fóo yíi kfən ji ŋkàlaʼ yee là wír.

⁷ M yíi tsənsí wíri, aá bvə́ʼə́y fó, wír wùn à vifá və́ vé lìm vi. Á yíi shètì vitóm vee *sidar vee fó, e lì, e màʼ e və̀y.

⁸ «Wíri wíy a lò vitúm vinín, a shaà e ŋkàlaʼ fèn, a ghaynín ji Nyùy Tàr sà lòvtí ka e ŋkàlaʼ ye wiy rə̀n bèn a?

⁹ Binèri kù yíi a dzə jii, dzə̀ á bìʼ fo áwune‑eè ŋwayin *mensaŋ me Nyùy Tàr woo Nyùy wov‑iì gwàrìn wùn áwune, a ghvəm a dzə̀ anyùy ve səné, a cù.»

Ntum Jeremia yee kùm Fòn Joahas

¹⁰ Wír veé Juda, lá vèn yòʼ a toŋ fon wo wù làyìn ne láyin, lá vèn yòʼ a dìy wun. Vèn wáa toŋ e ŋàŋén a dzə̀ fon wo á koon, e dù sho. Bó wù yòʼ dzəə́ wìy kfən e bàm, bó wù yòʼ dzəə́ wìy yen woŋ wóv.

¹¹ Nyùy Tàr súŋnin kùm Joahas woo wan Fòn Josia, wo wù‑uù yiin ntaʼ tàr wov, a saʼ ji fon e Juda, á koó, e dù sho. Nyùy Tàr suuy jii, «Bó wù yòʼ dzəə́ wìy kfən e bàm gheéy.

¹² Kirə́ʼ kee fo á koon wun, e dù sho ki kù sì fo wù wíy kpu, a bó wù yòʼ dzəə́ wìy shov nsay yev é si.»

Ntum Jeremia yee kùm Fòn Jehoyiakim

¹³ Lòné dzə̀ wó wìr woo shó, ŋgaàŋ, a wù baʼrì ntoʼ rə e kimboʼtì ki, navtì wón lav vee fó yuv e mbóʼmé. Wù lo, wù lì afə́r və́, á lìm lim rə́ kisáŋ. Wù lo, wù tèn fó làʼ áwune.

¹⁴ Wù lo, wù sùúy jii, «M yíi bàʼrì ntoʼ yem e wiíwíy, e nàvtì lav see fó yuv, é sí kuʼkir, e fèr vimà vé awundu, e nàvtì virə́v e shibáʼáy shee kicí ké sidar ki, e yoʼ e kilò ki.»

¹⁵ À kwaʼ ji à dzə̀ fon, bìʼ fo à shaàn wír ámóʼó é kibàʼrì, ke à baʼrì e vicí vé sidar vi a? Bó tàr won yòʼ‑oò yí, kfə̀n nó vifá, kù yii vinyo və́ tìítiy là kiloʼ à? Bó vinyo və́ ví yòʼ kù‑uù du kijuŋ à?

¹⁶ Wù‑uù lo, wù kìŋsìn gháy ghéʼncey wùn à wó ŋgaà kitàne, vinyo və́ ví kù‑uù du kijuŋ. Kí á kinyo ke kí din ji wìr kì Nyùy Tàr. Suuy a Nyùy Tàr.

¹⁷ Yii bèy, à tìír ké sí wùn à shilív shí, a kù dzə̀ é kinyò ke kù‑úù luŋ wò fo fo. À yúyri alànjò, nyavrì, kfə̀n nəʼsì wíri.

¹⁸ Á bèy, Nyùy Tàr ku nèn a yiysí kùm Jehoyiakim, wun woo wan Fòn Josia woó Juda jii: «Wìr yòʼ wíy a dìy kpú rə́, a sham wún jii, ‹Éè mò, fər wom kpù ne.› Wìr yòʼ wíy a dìy kpú rə́, a sham wún jii, ‹Éè mò, tàr wor kpù ne›, kìn ji ‹fòn wor lày ne.›

¹⁹ Á wíy dzəə̀mè wun moo kimbèʼbìy. Á wíy sə̀ŋ dzə́n rə́, e fəə káy Jerusalem sho, e màʼày.

²⁰ Jerusalem, vèn kóʼ é Gwan Lebanon, a rəəmé fo. Vèn du, a toŋ e Bashan, vèn wáa fuŋ fo Abarim. Á laàr ne vé kiŋkaày vén.

²¹ Mò‑oò tìr ven, a vèn dzə̀ə́ akiŋsìn, vèn bìnèr jii, ‹Vèr yòʼ yuúri.› Kù dzə̀ mo vèn‑eè yii, e kèʼ fo meterí. Bó vèn yòʼ‑oò yúnin mo.

²² Kinsəm ki yíi kuúr vé saʼ vén, e dù sho, aá koó vé kiŋkaày vén, e dù sho e kwaʼ nsàm. Á yíi shoór ven, é vèn wáa woomé, a dzə̀ bìʼ yii yén kisaŋe.

²³ Éè fòn, wò, wo à yéʼ moo Lebanon, wò, wo à bàʼrìn ntoʼ e vicí vé sidar vi, mendzən mè yíi a dzə sho e ghan se à shwíkirì. À wíy a yu nyár, a dzə̀m moó ghán se wiíy lúmé.»

Nyùy wíy màʼ ŋgeʼ e Fòn Jehoyiacin

²⁴ Nyùy Tàr suuy e Jehoyiacin woo wan Fòn Jehoyiakim, woo fon woó Juda jii, «Mo m dzəə̀n shó e tin, aà fə̀m lò, a dzə a dzə̀ moo ndzə̀ŋgwaŋ vifòn e mǒ kiwo ke yìy kí, bo m kù‑úù dzən wò, e màʼày.

²⁵ M yíi fo wò e wír ve á wooy dzəʼə̀m yée, áwune ve à fanè. M yíi way wò e Fòn Nebukadnessar woó Babilon wùn à vé rər vəə́ kiwo.

²⁶ M yíi cuúr vèn yè won wo wù‑uù dzəən wò e kitum ke sən kí, e kirə̀ʼ kee fo á yòʼ‑oò lo dzə̀ə́ ven, é vèn kpú fó.

²⁷ Vèn wíy a ker shií ji bo á kì kfə̀n é bàm é wòŋàn, a bó yòʼ dzə̀ kí kòóy.»

²⁸ Dzə̀ ji Jehoyiacin kì sì ji kimbvə́ʼ ke kìŋ ke á wáa tèr fo fo à? Wù sì ji kifá ke bó wìr yòʼ dzəə́ kér shií shó à? Kòóy ka, é bo á li wùn à kfə́ə rəə́, e dù sho e kwaʼ nsàm, e kitum ke bó áwune yòʼ kiìn?

²⁹ Éè nsay Juda, nsay Juda, nsay Juda, yuúrí kinyo ke Nyùy Tàr suuy ki.

³⁰ Nyùy Tàr suuy jii, «Á ku sàŋ ji wìr və̀n dzə̀ á là wán, wír, a bó wù yòʼ wíy yu vijuŋ e wun dzə̀ʼə̀m. Wìr woo wun ram yòʼ wíy yi vifon ve rám Davir, wù yòʼ wíy saʼ vifon e Juda.»