Jeremia 17 - ŊWÀʼ NYÙY

Jay Juda wùn à vilaʼày ví

¹ Nyùy Tàr kú a suúy jii, «Ven vee Juda, ajay véné sì ji nóliì won. Dzə̀ moo ji á toòŋé ne e věn meliv, ye bó yòʼ dzə̀ á sə̀ʼsí, e kfə̀n toòŋé e věn kor se kiy cù, kù mo wìr toòŋé kifá e tiy ye tavíné, kìn wù bùʼ e kimbùʼ ke kishà ki.

² Wír véné yii cu e kiy se cù, kfə̀n yii fo wúr sé nyùy woo *Ashera si dzəə̀n. Á cu e sar se vici ve rəŋsìn ví vidzə̀m, cu e vitu ve agwan ve darkìné,

³ kfə̀n cu aàgwan veé mvə̀m wòŋ. M yíi fo kéŋ yén wùn à bùʼ won, áàŋgàa vibàn véné kuúy, e dù sho, a dzə̀ bìʼ vinyo ve bi ví ve vèn bùʼtìn ne woŋ wón e dzə̀m.

⁴ Vèn wíy màʼtì vitsə́ʼ ve mò‑oò foon e vèn, e dù, a rèŋ a dzə̀ vikwàn aàŋgaà vén vibàné sar e wòŋ wo vèn yòʼ kiìn. A dzə̀ bìʼ fo vèn ŋaʼarin dòʼshwíiy wom, wù kóʼ, a baarí moo və́y, e làa yòʼ a ndzəmén.»

Wír ve Nyùy wíy shov wùn à ve wù wíy səə̀vìi

⁵ Nyùy Tàr wáa suúy jii: «Lòné dzə̀ wó ŋgaà wo wù wáy shilív a dzə̀ e wìr wùn, yén vitaáví a dzə̀ ve ví lo fo wìr msòŋ, wír, a wù bín ne ndzə̀m e Nyùy Tàr.

⁶ Ŋwèrín dzə̀ moo vikwiíy veé wòŋ siy, wù yòʼ wíy yen ghán se vijuŋ vi wiyì. Wù kù wíy a dzə a dzə̀ é nsay ŋgaŋ e kirə̀ʼ ké woʼ kí, nsay shiŋgwaŋ fo bó wìr yòʼ dzə́.

⁷ «Yii bèy, kisəəvì kí kù dzə̀ ké wìr wo wù wayin shilív e Nyùy Tǎr wùn, wo vifií və́ ví tíy a dzə̀ e Nyùy Tǎr wùn.

⁸ Wù dzə̀ moo kicí ke á bìyìn é ghaa ndzəv, a gháŋ sə́ sí du a dzə̀ fo mendzə́v mè dzəə̀n. Kí yòʼ yii kér kinyo e ghan se lùm fəə́ e ndzə. Vav sə́ sí kù yii rəsìn rə̀sìn. Lùm fə́m távkirì, la kí yòʼ a ker kinyo. Kí yòʼ yii shaarì fó a koóm.

⁹ «A dzə̀ kìíy la mo shilív shé wìr shi dzəə̀n? Kifá ki yòʼ dzə̀ shó ke kí kér kimboʼtì moo wun. Yàsí və tàv féyì fo á fer.

¹⁰ Mo woo Nyùy Tàr, m kaʼày melív me wíri, tar kwaʼtì sév, laáme wír, kù mo yii rəə́ taʼà, laáme réŋréŋ mo liì və dzəə̀n.»

¹¹ Wìr wo wù kooyin káv e dzəə̀ kinshwìv, wù dzə̀ moo shinə́n she shí kay wúm ye yòʼ dzəə̀n rə́. Wù tóʼ dzəʼə̀m e ntìntìn, kávi nèn mày. Dzəʼə̀me lóo mày, wù nèn kfə̀n ji kiyúŋ.

¹² Lav cù yer kù dzə̀ moo kàvàʼ wun woo Nyùy, kàvàʼ, wo wù‑uù sí tíy e ntoò gwan, e kèʼ fo kèʼ.

¹³ Éè Nyùy Tàr, wò woo fo kwaʼtì Israyi tíyí, wír ve á méŋ wòo wíy woomé. Wír ve á bin ndzə̀m e wòo wíy a dzə moo kinyo ke á saŋen é kibvə̀r, bìʼ fo á meŋen ne Nyùy Tàr, wun wo dzəə̀n ntoò ndzə̀v ye yì fəər mendzə́v me mè fó dzəʼə̀m.

Jeremia lón ji Nyùy Tàr sə́ wun

¹⁴ Éè Nyùy Tàr, fèr mo, é m bónén. Lùŋèr mo, é m luŋ. Kù dzə̀ wò ŋgaà wo m suyrì.

¹⁵ Leéy, e yèn, wír vìne sí suuy e mò jii, kinyo ke Nyùy Tàr‑iì yoŋ ki bèé lèn? Kí koóy ri.

¹⁶ Bó yòʼ ghíʼ mo wò ji à tsə́nsí ŋgeʼ e wír vìne. M yòʼ‑oò ló a dìy ji ŋgeʼ si koóy áwune. Wówò, à kì kinyo ke kí fəən fo mǒ shuù, kí dzə̀ e wò si tèéter.

¹⁷ Lá à yòʼ kfə̀n ji kimbemèr kém. À dzə̀ kikiŋ kém é ghan sé ŋgeʼ.

¹⁸ Shoór aŋgaà vém vibàné, e làa yòʼ shoór mo və̀n. Yìi, aáwune wáa fàn, e kìŋsìn mo, fo m wáa fàn. Màʼ ŋgeʼ aáwuné kitu, e kfə̀n dzə̀sì, é yì laar áwune láarin.

Jeremia naárí mo dzə̀ á wàa lèm kishiíy ké bam jeéy

¹⁹ Nyùy Tàr nèn sùúy e mò jii, «Dù, e tìím e Shùu Kày Màŋgòŋ, fo afon veé Judàa yii shaa, nəə, kfə̀n fəə́ fo ŋkàlaʼ, e kfə̀n dù sa e shuù se kày seé Jerusalem sidzə̀m.

²⁰ Suúy e wír vee fóo jii, ‹Vèn yuúrí kinyo ke Nyùy Tàr kí, ven vee afon veé Juda wùn à wìr dzə̀m woó Juda, à wìr dzə̀m wo wù dzə́ e Jerusalem, tósin shuu se kày sìn.

²¹ Nyùy Tàr suuy jii: A vèn koŋ dzəʼə̀m yén, vèn wàa yen fo wìr beʼey kifá e kishiíy ké bam, a yen sa fóo tosín shuu se kày Jerusalem sho.

²² Wìr wáa yen fó bèʼèy kifá, e fəə láʼ rə́ shó e kishiíy ké bam, a yen sa fóo yiì lim yímóʼó. Vèn lem kishiíy ké bam ji kishiíy kee jeéy kí, kù mo mò‑oò yòŋèn áàtàr véné.

²³ Yii bèy, áwune yòʼ‑oò lo yuùrí, e làa yòʼ fə̀m a gwàrìr, e lò fo fo, a tav a dzə̀ kitú, e làa yòʼ yuurí ntir rə̀n, e làa yòʼ səəsí.

²⁴ « ‹Yii bèy, mo woo Nyùy Tàr wáa suúy jii, a vèn lò a dzə kén, a yu kinyo kém, e làa yòʼ a bèʼèy kifá, a tosín shuu se kày yeé ŋkàlaʼ sho e kishiíy ké bam, e kù a lèm kishiíy ké bam, é kí wáa dzə jeéy, a dzə, e làa yòʼ a yiì lim yímóʼó,

²⁵ bo anjìlaʼ Fòn Davir wùn aàtǎr ntoʼ véví wíy a tosín shuu se vishem, aá kóʼ viténtén ve səŋ nyám si, aámóʼó wáa koʼ nyám se ŋkoʼ, é wír veé Juda wùn à veé Jerusaleme wáa wìy sa fo bàm. Wíri kù wíy a dzə e ŋkàlaʼ fèn ghán sidzə̀m.

²⁶ Wíri wíy a wìy fo ŋkà se laʼ seé Juda, à fó ntèʼ se sí kaarin Jerusalem, à fó nsay Benjamin, à fó sar se agwan, e mbìv yee fo shùy yii nəə, à fó wòŋ agwan, à fó Negev. Á wíy a wìy e cu ye tonèné wùn à ye seeríné, à yé vifa ve yii, à yé kilayí, à yé kisheʼrìi, a dù sho e Nyùy Tǎr lav.

²⁷ « ‹Yii bèy, a vèn lò a dzə, e làa yòʼ a yunín mo, a lèm kishiíy ké bam jeéy, e làa yòʼ màʼtì vifá vé a beʼ, a tosín shuu se kày Jerusalem sho e kishiíy ké bam, bo m yíi sə̀ʼ və́y é shuù se kày, é wú bvə́ʼə́y ntoʼ seé Jerusalem, a bó yòʼ dzə̀ á ndzə̀mér.› »