Jeremia 16 - ŊWÀʼ NYÙY

Nyùy Tàr tír Jeremia mo wù li dzəʼə̀m rə́

¹ Nyùy Tàr kfən sùŋnín e mò jii,

² «Á yen fó wìy a ker wiíy, a kèʼ kfəə́ e kirə̀ʼ fen.

³ Kinyo ke Nyùy Tàr suuy kùm wón ve á dzəə e kirə̀ʼ fen, suuy kùm ayìy wùn aàtǎr won kí dzə̀ jii,

⁴ áwune wíy a jòy ayàsí ve bií, a kpukír. Bó wìr wó a dìy áwune yòʼ wíy a dzə, kìn wo wù dzəəme. Dzə́n sév sí wíy a neŋnín e virə̀ʼ moo jáŋ. Áwune wíy kpu rə́r, e kpu jíŋ, é menə́n wùn à nyám si kfə́r dzə́n sév.»

⁵ Nyùy Tàr kfən sùúy jii, «Lá à yòʼ a nəə́ e ŋgày kpu, lá à yòʼ a dù kpú ye diyìné, kìn ji à du kinsham. M fə̀ə́r ne kiwó kém fo wír vìné kinyò. Suuy mo woo Nyùy Tàr. M yòʼ dzəə́ wìy a fo nyaáŋ e wír vìne, a bó m yòʼ dzəə́ wìy a dìn koŋ yém aáwune, e bóo fə̀m a sham.

⁶ Áwune kù wíy kpukír e wòŋàn, à wo kuʼùn, à wo terí. Wìr wó a dzəə̀mè áwune yòʼ wíy a dzə, kìn wo wù wáa dìy áwune. Wìr yòʼ wíy a dzə wó a jàʼtì wún, kìn wó a kwaày kitú ji wun din mendzən.

⁷ Bó wìr yòʼ wíy a wìy e vifá ve yi vi, a fo e wír ve á diy kpúu ji wun shám a áwune. Wìr yòʼ wíy a wìy e kifá ke noón kí ji wun shám áwune shó, a kpuun tàr wov kìn yè wov.

⁸ «Lá à yòʼ wìy a nəə́ e lav ye á yí ŋkàʼ shó ji à dzəʼəm, é vèn áwune wáa yinín, a nonín.

⁹ Kinyo ke mo woo Nyùy Tàr woo Taà Mànjòŋ, mo woo Nyùy wìr veé Isray suuy ki dzə̀ jii, ‹M wíy màyìr léŋ kisheʼrì wùn à wó vijùŋe, à ŋkěŋ vijiné fó kirə̀ʼ fen, a kí wíy koóy, é vèn yén e sí yéné.›

¹⁰ «Aà dù, e fìʼtì vinyo vìn vidzə̀m e wír vìne, á wáa dzər e wò jii, m sà lòvtí aáwune ben ji ka á? Áwune sà bùʼ a dzə̀ ka e Nyùy wov á? Jay wo áwune jayin e Nyùy Tàr woo Nyùy wov sà dzə̀ ka á?

¹¹ à nèn bìnèr aáwune ji Nyùy Tàr suuy a jii, ‹Dzə̀ bìʼ fo atàr véné‑eè ŋwayin mo, a jùmrì a dzə̀ anyùy, a lìm fo fo, e kfə̀n a cù, e nèn mèŋ mo, e tèn fó a yunín nsər sém.›

¹² Kén kí nen kfə̀n fòy fòyìn, e shaà ké atàr vén. Vèn leéy, e yèn mo á ŋwayin ne mo wir dzə̀m, wìr wáa yiì a dzə̀ kinyo ke kisaŋ ki ke shilív sə́ shí koŋè.

¹³ Bìʼ bey, m wíy meér ven fó nsay fèn, é vèn du é wòŋ wo bó wìr fo vèn aàtàr véné yòʼ‑oò yiì ne kìíy, é vèn du, a lìm fo anyùy vee fóo, a lìm e shùy, a lìm vitsə́ʼə́, é la m yòʼ a sham ven.»

Wíri wíy kfən fo vé‑eè koon áwune

¹⁴ Nyùy Tàr kfə́n a suúy jii, «Ghán sí sí wiyì se wíri yòʼ dzəə́ wìy a kàn yír yém, a yòŋ jii, ‹Mo Nyùy Tàr wo wù‑uù fəərin wír veé Isray fo wòŋ Ejiv, dzəə̀n shó e tin.›

¹⁵ Á sí wìy a kàn, a yòŋ a dzə̀ jii, ‹Mo Nyùy Tàr dzəə̀n shó, wun wo wù‑uù fəərin wír veé Isray fo wòŋ kùyi, à fó vitum ve wù‑uù jùmèn áwune, á dù, a dzə sho.› E ké ru kí, m wíy siìr áwune e yéev yee nsay ye mò‑oò foon áàtàr véví.»

Ŋgeʼ wíy koo ambùʼtìvìnyò

¹⁶ Nyùy Tàr nen kfə̀n sùúy jii, «M sí tsə́nsi vé lovi anín, aá koó ambùʼtìvìnyò. Fo bàm, é m tsə́nsí sá vé jwime anín, aá jwímér áwune fó aŋkoŋ, à fó agwan, à fó mbvə̀ʼ se sí dzəə̀n é vilála.

¹⁷ M yén kinyo kidzə̀m ke áwune yii. Ke kí dzəə̀n é kilìr fo mò kí yòʼ dzə̀. M kù yén vinyo vév ve bi ví vidzə̀m e sí yémé.

¹⁸ M wíy tombìy màʼ ŋgeʼ aáwuné kitu, e kfə̀n dzə̀sì ji vilaʼày vév vé yiì ye bií wùn à vé ajay vi. Áwune bìvír ne nsay yem e mebvə̀m mè, vifá, a ví kóʼoyì, a bó ví yòʼ ŋeʼè, mè kù dzə̀ moo dzə́n sí. Áwune rùnér ne nsay ye mò‑oò shavin ji yéem e vifá ve ví kóʼoy mo ví.»

Jeremia bunrì Nyùy Tàr là kimeŋnìn

¹⁹ Éè Nyùy Tàr, à dzə̀ vitaáví vém. À dzə̀ kóy wóm wo tavíné, aà kiŋsìn mo é ghan sé ŋgeʼ. Vitúm vi wíy a wìy buú se ndzə sidzə̀m, a yen wò, a yòŋ jii, «Atàr vérí yòʼ‑oò lo jùmrì dzə́ə yìmòʼ, e shaà anyùy kimboʼtì. Mebvə̀m fo mebvə̀m, a bó yòʼ dzə̀ mè sə̀ áwune.

²⁰ A dzə̀ wíri fèr anyùy vév á? Àáy, aá fèr, bo yòʼ dzə̀ vee shooyi wàa dzə anyùy.»

²¹ Nyùy Tàr nèn sùúy jii, «Ké ru kí, m lo, e dìn kinyo aáwune. M wíy yiì, aáwune yén vitaáví vém, e yen vikuʼùy vém, yéné, aá nèn kìíy ji m dzə̀ á Nyùy Tàr.»