Jeremia 14 - ŊWÀʼ NYÙY

Nsay yúm, e tònén

¹ Nyùy Tàr‑iì sùŋnín e Jeremia kùm nsay ye yì‑iì yumen jii:

² «Woŋ Judàa sí diyì, a ŋkà se laʼ sə́ sí yúm, mayì, a wír vee fóo sér e nsay e nsòvkìtu, a tóŋe kóʼ fo Jerusalem, taʼ ŋgaà dzər.

³ Aŋgàa kav véví tùm ne vé lìm vév ji á tú mendzə́v, á dú fo visə̀m ví dzəə̀n, e dù, làa yoʼ yen mendzə́v, a kfən e vitém vi viyúmér, kfə́n, woóme, méŋ fo á dzəə̀n, nèn litì sí yév.

⁴ Wuú tèn ne fó a lo, nsay yúm, e kàʼkír, melív me vé sumé mè seém, woómé si súm áwune.

⁵ Fə̀m à leeleé woo wiíy, wù kù sí maʼày wán e bór, bìʼ yí ye yí buŋen.

⁶ Vimbèʼbìy vé kwaʼ vi jáʼtin aàgwan, agwan, aá sì aghá. Ví kù sí fér kiyoy férín moo akoosàʼ. Sí yéví səə̀né ne, bìʼ fo á yòʼ kér kifá kée yi.»

⁷ Éè Nyùy Tàr, fə̀m mo vinyo vér ve bi ví koon ne ver, ku sə̀ ver bìʼ yír yé. Vèr bìn ne ndzə̀m e wò akàŋ aneénín. Vèr jày ne e wò.

⁸ Kù jòʼsì wò wo Isray leeyì. A dzə̀ kù lùŋèr wò wun e ghan sé ŋgeʼ. A dzə̀ à yèe, e bó a dzə moo kiŋgwìy e věr nsay, a dzə moo nshaàdzəə̀ woo nəə́ e ŋkuùr, nèn a fəə kijàvndzə?

⁹ À yèe, e bó a dzə moo wír wo kinyo ki tarisin, a dzə moo kigha ke wìr kee là mentàsìn mée sə wír? Yii bèy, éè Nyùy Tàr, à kù dzə̀ vèsən, a vèr kù dzə̀ə́ wír vé. Lá à yòʼ bìn ndzə̀m e vèr.

¹⁰ Nyùy Tàr nèn sùúy kùm wír vìn jii: «Áwune sí koŋ a ghan, a jan janén. Áwune yòʼ kim vitú vév. Bó m yòʼ kfə̀n bínsi áwune. M yíi kuumé yii yév ye bií, e màʼ ŋgeʼ aáwuné kitu.»

¹¹ Nyùy Tàr suúy e mò jii, «Lá à yòʼ a bùnrì ji m yii, é wír vìne wáa dzə kijuŋ.

¹² Aáwune fə̀m lò, a lèm jíŋ, bo m yòʼ yíi yu tóŋ yév. Aá fə̀m yiì a dzə̀ cu ye tonèné, kìn yé vifa ve yi, bo m yòʼ yíi səəsí. M kù yíi laàr áwune a dzə̀ e rə́r sí, e laàr e jiŋ, e laàr e kifə̀ʼ ki.»

¹³ M nèn bìnèr jii, «Éè Nyùy Tàr woo Taà Ndzə, leéy, e yèn, aŋgàa ntume sí fiʼtì ji bó rə́r sí yòʼ wíy nəə́ a fo, a bó jìŋ yòʼ waà wíy koo. À kù wíy a yiì, é nyaáŋ wáa dzə a e wòŋàn ŋkuuŋkùŋ.»

¹⁴ Nyùy Tàr nèn bìnèr e mò jii, «Aŋgàa ntume tèʼ ne mo é si, a boʼtí a dzə̀ kimboʼtì. Bó m yòʼ‑oò lo tùm áwune, a m yòʼ‑oò lo yòŋ ji á yii kinyo, fə̀m ji m yoŋ jí yìmòʼ aáwune. Áwune tiísi vinjeenjèm ve á yéné, a dzə̀ kimboʼtì, a vinyo ve á shwéŋ vi dzə̀ kisáŋ. Dzə̀ vinyo, a ví lò a dzə̀ fo áwuné kwàʼtì.

¹⁵ Bo ke mo woo Nyùy Tàr yoŋ kùm aŋgàa ntum ve á teʼen mo é si, a tiisí ntum kimboʼtì ki dzə̀ jii, mo áwune suuy ji bó rə́r wùn à jìŋ yòʼ yíi bàv e nsay fèn, bo m yíi laàr áwune, a kù dzə̀ e rə́r sí, e laàr e jiŋ.

¹⁶ Wír ve áwune tiísi ntum shoo yíi kpukír sa, a neŋnín e ghaŋ se dzəə é Jerusalem là ŋgaà dzəə̀mè, aá kpúkir a dzə̀ jíŋ wùn à rə́r sí, aá kù kpú wùn à vikìy véví, à wón vee vilume, à vee vikìyí. M kù yíi siìr yii yév kisaŋe aáwuné kitu.»

¹⁷ Nyùy Tàr nèn sùúy ji m yoŋ á kinyo kìn e wír vìne jii: «Mensíy mè kú a dàn dànèn fo mǒ si, a dàn e shùy, a dàn vitsə́ʼə́, là may. Wír vém ve mò‑oò shoʼoné sì é mvə̀m ŋgeʼ ye tavín, aá dzə̀ é nyar ye ghaʼáné lèn.

¹⁸ M lo ji m fəə́ e shweesí, m yèn a dzə̀ dzə́n sé wìr ve á kpuun rə́r. Lóo nəə́ e ŋkà se laʼ, m yèn a dzə̀ wír ve á sí kpú jíŋ, aàŋgàa ntum wùn aàtàá cùu ghán, yii a dzə̀ lim yév, a bó á yòʼ kì kinyo ke á yii.»

Wíri lón ji Nyùy sə́ á áwune

¹⁹ Nyùy Tàr, à mèŋ ne rú Juda ŋkuuŋkùŋ à? À sí ban rú wír veé Sion à? À lèmér ver é ŋàáŋàŋ, ye lá vèr yòʼ bònén bèn ji ka? Vèr‑iì shiy nyaáŋ, la vijuŋ vi yòʼ a dzə. Shiy luŋ, lo fəə̀ fan ye ghaʼáné.

²⁰ Éè Nyùy Tàr, vèr jày ne e wò, a vèr sí tuúne ajay vee shoon wùn à vé atàr vérí.

²¹ Bìʼ yír yé ye wiyí, lá à yòʼ màʼày ver. Lá à yòʼ ŋwày kirə́ʼ ké ke kàvàʼ, kirə́ʼ ke kàvàʼ wò wo ghaʼtín tíy fo. Kuúmé *mensaŋ me wò‑oò gwàrìn vèsən mè, e làa yòʼ yaʼáy.

²² A dzə̀ anyùy kisaŋ veé vitum vìn, á sə̀ʼə́r wuú á? A dzə̀ mbàʼ, yì joʼsi ji mbàʼ, yì wìy e wuú á? Aày, kù jòʼsì wò, éè Nyùy Tàr woo Nyùy wor. Vèr kù tiir vifií vér a dzə̀ e wò wùn, bìʼ fo kù yii yii wò vinyo vìn vidzə̀m.