Jeremia 12 - ŊWÀʼ NYÙY

Jeremia dzə́ti vinyo e Nyùy Tàr

¹ Nyùy Tàr, a m neèr nsaʼ yem e wò si, bo ŋgaà réŋ kù yíi a dzə wò. Yii bèy, a m kù‑úù neer vinyo vìn e wò si, e yù ó mo wo‑óò tínén. Wír ve á méŋ wòo lo, á wàa ker dzəʼə̀m ye juŋe bìʼ ka? Vé kimboʼtìi lo, á wàa dzə dzə́ ye juŋe bìʼ ka?

² Kí yii wò, é bo gháŋ yéví wáa tuúy, aáwune wáa kuy, a koóm. Áwune yòʼ shóʼ wò fo shuù, yii bèy, melív mev mè yòʼ tíy e wò wùn.

³ Éè Nyùy Tàr, à kì mo kijuŋ. À yén mo, aà kfə̀n kì kwaʼtì yém yee kùm wò. Tsəə́né áwune moo njiì wo á du, e see. Tsəə́ne, à lèm jeéy, e meé e kishiíy ké seerí.

⁴ Nsay wíy yum, e dù, e meé e le? Jíyí wíy kpu, e dù, e meé e le? Nyám si wùn à menə́n mè kpùkír ne, e mày, a dzə̀ bìʼ liì kisaŋ wìr ve á dzə́ e nsay fèn, suuy jii, «Nyùy yòʼ yén vinyo ve vèr yii.»

⁵ Nyùy Tàr bìnèr jii: «Jeremia, vèn à wíri sènín kileʼ, á shaá wò, áà yiì sènén vèn à nyám se ŋkoʼ si moó le? À ghán e kirə̀ʼ ké mboʼ ki, gbukìrì, bo keé mvə̀m kinshaàrì keé ghaa Jordan ki yíi a dzə e le?

⁶ Fə̀m afə́r vé, à kfə́ə yée, áwune màʼ ne wò. Wùn à vé menàŋé suùsín ne, a dzə̀ wuú yé. Á lóo bètì wò e shuu wo juŋe bey, à wàa yen.»

Nyùy Tàr rə́r mendzən me wír və́

⁷ Nyùy Tàr suuy jii: «M bìn ne ndzə̀m e Isray. M shwèy ne wír ve mò‑oò shoʼon ji vém, e wày wír ve mò‑oò liìn ji shilív shém áàŋgaà vév vibàné wo.

⁸ Wír ve m shoʼoné kfə̀n ne ji bvərə̀ʼ wo wù kiʼ mo, nyamkìr, taáme mo fó kòv. M nén a bàn áwune.

⁹ Wír ve m shoʼoné kfə̀n ne ji shinə́n. Shinə́n she ŋwaʼkìn she vilùŋ vi jwímé, a ví gìm ne, e tàr ji á koó. Á ku bì nyám se kwaʼ ji sí wiy, e tàtí, a sàʼ shinə́n shin.

¹⁰ Vé saʼ vee vitúme bìvír ne súm wóm vitiír vé *vayin. Á fòr ne kwáʼ wóm fórin. Á lòvtí ne e nsay yem ye juŋ lóvtín, yì kfə́n ji wóʼ.

¹¹ Áwune bìnèr ne nsay yem ji wóʼ. Yì sí néŋ e mǒ si ŋgeʼ ŋgeʼ. Fóo kfə̀n ne ji nsay kinjúm e dzə̀m, a bó wìr wo wù cí yòʼ dzə̀.

¹² Vé rərí sì é vitu ve agwan veé woʼ adzə̀m. Rə́r se mo woo Nyùy Tàr tsənsin sí lo, e teè woŋ, e kèʼ fo buu fèn, e dù, e bàʼ e və́səə, a wìr dzə̀m yíi a shwikír shwikín.

¹³ Áwune lìm ne sáŋ, aá yíi kav a dzə̀ vikwiíy. Á nə̀ʼsì wún, wú láy kisáŋ. Áwune yíi a siy vifá a woomé, a yií dòʼshwiiy Nyùy Tàr.»

Nyùy Tàr káʼ wír ve á gìŋèn Juda

¹⁴ Nyùy Tàr suuy jii, «Mò‑oò sùŋnín kùm vitúm ve ví dzəə̀n e Juda ghaŋ, aá giŋ wír vém e shilív she bi shí ji á sə́ nsay ye mò‑oò foon aáwune ji vitsə́ʼ vév. Vèn leéy, e yèn, m yíi shoʼóy aŋgàa vibàn vén vin fo áwuné nsay mo á shòʼóy kitiír ké kifa fo nsay, e bòyìr wír veé Juda fo áwuné wo.

¹⁵ M shaʼàr vitúm bèy, é m kfən wìy shàm áwune, a lì kitúm kimòʼón kimòʼón, a kfən sho aáwuné nsay fo vitsə́ʼ vév ví dzəə̀n.

¹⁶ Vitúm vìn vi dzə̀, a ví‑iì dànèr wír vém, á wáa kàn a dzə̀ nyùy woo *Baal. Yii bèy, aáwune kùvsín lèn, a jùmrì liì wìr vém, a yiì mo wù dzəə̀n, a kàn a dzə̀ yír yém ji Nyùy Tàr dzə̀ shó e tin, bo áwune sí yìi tuúy e wír vémé mvəm.

¹⁷ Yii bèy, a kitúm ki lòo dzə, e tèn fó a yunín mo, bo m wíy fəə́r áwune fó wòŋ ŋkuuŋkùŋ, e laàr laàrìn. Suuy mo woo Nyùy Tàr.»