Jeremia 1 - ŊWÀʼ NYÙY

¹ Ŋwàʼ və̀ne dzə̀ wó vinyò ve Jeremia, a wù‑uù dzə̀ é ŋgoo atàá cù ve vé‑eè dzə́ e ntèʼ yee Anatot, e nsay rám Benjamin, a yír tàr woví‑iì dzə̀ Hilkia.

² Wáa dzə, a Fòn Josia woo wan Amon sáʼ ne e Juda kiyá nshòv sitaár e ghvə̀m, Nyùy Tàr lò, e sùŋnín e Jeremia.

³ Wù kfən sùŋnín e wun e ghan se Jehoyiakim‑eè yiin ne ntaʼ tàr wov woo Fòn Josia woó Juda. Wù kú a suŋnín bèy, e dù, e mèé e ŋwee woo tàn e kiya kee nshòv mòʼón e ghvə̀m mo vé‑eè siiyin, e kòʼór Tsədekiya wo dzəə̀n sá wan Fòn Josia. Wù màysì, e sàʼ vifon veé Juda, a sì é ghan se vé‑eè koorin wír veé Jerusalem, e fəə̀ shó fo wòŋ.

Nyùy Tàr shóʼ Jeremia ji ŋgaà ntum və

⁴ Mo woo Jeremia, m dzə́ bèn, a Nyùy Tàr‑iì yiì ne sùŋnín e mò. Wù‑uù yòŋ e mò jii,

⁵ «Mò‑oò kìíy ne wò, e bóo wìy a bom wò e yè wón bvə̀m. É bo á wìy a dzəə́ wò, a m lém ne wò ji wír woo jeéy. Mò‑oò shòʼ ne wò ji à wáa tiisí ntum yem vitúm vidzə̀m.»

⁶ M bìnèr jii, «Éè mò, Nyùy Tàr woo Taà Ndzə, leéy, e yèn, m dzə̀ə́ wánlè, bó yóʼ dzə̀ m kìíy móo suŋnín.»

⁷ Yii bèy, Nyùy Tàr suúy e mò jii, «Lá à yòʼ a yòŋ kitú ké ji wánlè. À kù yíi dù, e yen wir dzə̀m wo m yíi tum wò ji à yén, yéné, áà fiʼti kinyo kidzə̀m ke m yíi a suúy e wò.

⁸ Lá à yòʼ a fàn áwune. M yíi a dzə wòsò, a kìŋsìn wò. Suuy mo woo Nyùy Tàr.»

⁹ Nyùy Tàr nèn ràmsì kiwó, e kùm shuu wóm, e yòŋ jii, «Yén ri mbà, m wày ne jí sém e wò shuù.

¹⁰ Leéy, m lèm ne wò lán ji à wáa leéy woŋ wùn à vitúm vi, e lèm ji à shaʼar vitúm, e kètì fó, à ji à bvə́ʼə́y fó, e laàr, e kfə̀n bàʼrì fó, e tùúy.»

Nyùy ghém ndzə e Jeremia, wù yén vinyo e njà vinjeenjèm

¹¹ Nyùy Tàr nèn yòŋ e mò jii, «Jeremia, leéy ó, à yèn a dzə̀ ka?» M bìnèr jii, «M yèn tám kici kee *almon.»

¹² Nyùy Tàr suúy jii, «À yèn réŋ, dzə̀ mo m yíi a leéy ji jí sém sí gheén á mo m suuyin.»

¹³ Nyùy Tàr kfən lò, e dzə̀r e mò jii, «À yèn lèn a dzə̀ ka?» M bìnèr jii, «M yèn kíŋ é mbìv yee kuy, a yí yorì, a yí lo, e toʼ, a fəə e mbìv yee tsə́n.»

¹⁴ Nyùy Tàr suúy jii, «Ŋgeʼ ye tavín wíy lò a dzə̀ fó mbìv yee kuy foo fèy, e gbù e wír veé wòŋàné kitu.

¹⁵ Kú a kiíy jii, m sí lo, e toóy vitúm veé mbìv yee kuy vidzə̀m. Afon véví yíi wìy, e màʼ akàvàʼ vév é shuù se kày seé Jerusalem. Á yíi nəə́ Jerusalem e rə́r sí, e bvəʼ kay yév e dzə̀m, e kù yiì bèy ŋkà se laʼ seé Juda sidzə̀m. Suuy mo woo Nyùy Tàr.

¹⁶ M yíi way wír vém é ŋgeʼ, bìʼ kitú ke áwune tavin, e bìn ndzə̀m e mò, a tòn kiláy, a cù a dzə̀ anyùy sho, a ghvəm vifá ve áwune fèrìn e wó yéví.

¹⁷ «Fo ké ki lèn, kúr ndzə̀y sé si, é sí táv. Tsəə́m, a fìʼtì vinyo vidzə̀m ve m suuy e wò vi. À lóo tiy aáwuné si, lá à yòʼ a yàʼ, fo m yii, áà maysi, a yàʼ yàʼàn.

^18-19 Ku kìíy jii, afon veé Juda wùn aàtǎr ntoʼo, aàtàá cùu, à wìr dzə̀m kù wíy a fùnèn wò. Yii bèy, á yòʼ wíy ghaʼ wò, bìʼ fo m wíy a dzə wòsò, a sə wò. M lùŋ ne wò lán, à táv moo ŋkàlaʼ ye á bomen kay, e kaàrí sho, e kfə̀n tàv moo kitóm ke kishà ki, à moo kay yee kisha kee *brons ki. Suuy mo woo Nyùy Tàr.»