Jeem 3 - ŊWÀʼ NYÙY

Wír Nyùyi wáa kìm kiliímé kév

¹ Afə̀r vem, vèn wáa yen fo wìr dzə̀m kú a tàʼ ji bo wun kì yéʼey wíri. A dzə̀ vèn wàa kiíy sa jii, á wíy a saáy vinyo vér vee aŋgàa yeʼéy, a shaà vé wìr ámóʼó.

² Dzə̀ rú, vèsən dzə̀ ben, a vèsən jáy vinyo vinín. Yii bèy, wìr lóo dzə a dzə̀ wù mèy kiliímé kfə́, e làa yòʼ a jay kinyo fo wùn shuù, bo ŋgaàŋ ghèén feyì. A dzə̀ wù kòytí kitú kfə́ dzə́ə sidzə̀m.

³ Kù dzə̀ réŋréŋ sá mo vèsən yii li shisháŋ là rooné, á wày e nyàmŋkoʼ shuù ji yì fíʼ a yu vèsən. Á nèn a bìnèr wún nyàm sho e dzə̀m, yì wàa dù fo vèsən koŋè.

⁴ Vèn kfən lì sa mfìʼ fo kikóŋ keé ndzəv kí. Kí kùʼ e ŋàŋ, a shwér wo wú dom, bo kí wáa ghane shaà vitaáví. Yii bèy, a bó mbàŋ ye ŋgaà kikoŋ binèr sho yòʼ dzə̀ e nín. Wù lóo bìnèr, kí kù yòʼ a dù fo wù koŋ ji kí wáa dù.

⁵ A kù dzə̀ sá mo kiliímé ki dzəə̀n. Dzə̀ shirəʼə̀n she wùn là rooné ben, a kí tàv é ŋàŋ, buʼtì vinyo vinín. Vèn kì sá mo shisásáy she və̀y shí dzə̀ shí tòn kimà ké kòv kifur.

⁶ A kiliímé ki kù dzə̀ moo və́y vən. Vinyo ve bi veé ndzə vidzə̀m vi tàtí, a tiy a dzə̀ é kiliimé, e nèn ràm fo fo, e bìvír wún wìr e dzə̀m. Dzəʼə̀m wìri lo, yí bìr e dzə̀m mo ŋgaàŋ shwì a dzə̀ é və̀y. A kù sə̀ʼ kiliímé və́y woo shooy, a kí lì a dzə̀ fo Satan kiy.

⁷ A fə̀m dzə̀ kfə́ə nyàm rəné, bo wìr kù kì mo dzə̀ wù yèʼéy, e mèrìr. Aá kù‑uù sí yéʼey bèy sinín, kìn dzə̀ nyam kwaʼ, kìn shinə́n, kìn vifá vee moo yó, kìn sə́.

⁸ A bó wìr yòʼ dzə̀ shó feyì gheéy wo dzə̀ wù yèʼéy kiliímé. Kí kù fəəmè vinyo fə́əmen a dzə̀ ve bi ví ve dzə̀ wìr kpù shó mo tè búv.

⁹ A kù kfə̀n dzə̀ kiliímé kee shoon ke vèsən lo, á wàa burí Nyùy woo Tàr wòsən shó. Ku kfə̀n a dzə kíwun ke vèsən kuurì afə́r vesən shó, a Nyùy‑iì bòm, á wáa shwinín a dzə̀ wun.

¹⁰ Shuu e mòʼóné nén a fəə́r vinyo vibaà, a fəə́r liy, a fəə́r beerì. A bó kí yoʼ ghèén bèy gheéy, afə̀r vem.

¹¹ A dzə̀ mendzə́v me ranén mè wùn à kiluú kí yèe, e bó a fəə ntòŋ e mòʼón?

¹² A dzə̀ bíyí kòóm é kici ké mbií, kìn kòóm laàlaŋ e biy á? A bó yòʼ dzə̀ sá ntoò ndzə̀v ye yì fəər a dzə̀ kiluú yì kfə̀n fə̀ə́r mendzə́v me ranén mè.

Vifií ve ví lo fo Nyùy vi fó a dzə̀ nyaáŋ

¹³ Wìr fo vèn wo wù yén ji wun kér vifií ve ru ví, a wun kì vinyo, ŋgaàŋ dzə̀ la? Wù din kitú kfə́ fó liì wo juŋ wo wù yii, a wù yii, e làa yòʼ a saà wún, mo vifií ve ru ví yii dzə́.

¹⁴ A wìr lò, a ker kfə́ a dzə̀ kinsiimè e wùn shiliv, a dìy a dzə̀ ntaʼ, ŋgaàŋ wàa yen fó a dìn kitú kfə́ ji ŋgaà vifiì. A wù yii bèy, bo wù sí bívir kinyo ke Nyùy ke ru kí.

¹⁵ Kfə́ə vifii vee bey vi yòʼ lò fo yuv gheéy, dzə̀ veé nsay fèn. A bó yòʼ dzə̀ vé Nyùy, dzə̀ vé Satan.

¹⁶ Wíri yii lóo siimé kinsiimè, lóo dìy a dzə̀ antaʼ, á nèn bvəə̀rí, vinyo ve bi vidzə̀m vi nə̀ə́ fó nsàn.

¹⁷ Kinyo ke kí din ji wìr kér rú vifií ve ví lo a dzə̀ fo Nyùy ki dzə̀ jii, ŋgaàŋ dzə̀ kfə́, a bó wù yòʼ wáy kiwó e kinyò ke bi kí gheéy. Wù kfə́n a dzə wir nyaáŋ, a ker wíri ji weè, a yuurí kinyo ke wìr, a sham wíri ghán sidzə̀m, a yiì vinyo ve juŋ vi é ŋàŋ. A bó wù yòʼ yii vinyo vìn, yuúri kisùúyjii, a bó wù yòʼ din wún.

¹⁸ Kù dzə̀ mo vé kimane yii rə́si wáy ŋgoòy ye juŋ ji nyaáŋ, a nèn káv wír anín vijuŋ fo fo.