Jeem 2 - ŊWÀʼ NYÙY

Lá wír Nyùyi yòʼ a nyàʼ wír

¹ Afə̀r vem, mo vèn wayin shilív e Taàtá wòsən Jesus Kristu wùn wo dzəə̀n kfə́ ji Nyùy, vèn wáa yen fó a nyàʼ wír wùmòʼ.

² A kí dzə̀ jii, a tàm wíri nə̀ə́ e věn lav dzə̀ʼə̀m abaà. Wùmòʼ wàa dzə, a wù máʼ ndzə̀y sə́ kijuŋ, e wàyrí andzə̀ŋgwáŋ a dzə̀ ve á fèrìn e *kisha ke mbàm ki. Wùmòʼ wàa dzə kfə́ ŋgaà kitàn, a wù máʼ a dzə̀ vinsàʼ ve ndzə̀y.

³ Vèn lo fó fo, e nèn a yen a dzə̀ wír wo wù màʼàn ndzə̀y se juŋ si, e sùúy sho jii, «Ku dzə̀ʼə̀m fèn e kirə̀ʼ ke juŋ ki», e nèn sùúy e ghéʼncey və̀y jii, «Tiím fey, kìn à sésin fo nsay.»

⁴ A vèn lò, a yiì bèy, bo bó vèn yòʼ jáy feyì à? Bo vèn sí yén ji wìr wùmòʼ dzə̀ á jeéy e věn mvəm, taʼ a dzə̀ koóy.

⁵ Afə̀r vem, vèn yuúrí, e yù. Wír ve Nyùy‑iì shoʼon ji á wáy shilív e Jesus Kristu wùn, a ker ghay wùn à Nyùyi kù dzə̀ wír ve á tan e ndzə fèn. A dzə̀ áwune ve á wíy nəə́ e wùn mvə̀m saʼ, a yu vijuŋ ve wù‑uù kàʼàn wír ve á koŋ wun sho.

⁶ Vèn ló kén, e nèn a shoór wír woo ben shoórín ji ŋgaà kitàn. Mo vèn sí yén kén a dzə̀ aŋgàa mbàm, wír ve á rə́si táy ven, li, ghán sho e virə̀ʼ vé nsaʼa dzə̀ ala? Bó yòʼ dzə̀ vé mbàme a?

⁷ A kù dzə̀ sá áwune ve á rə́si bívir yír Taàtá won Kristu ye Nyùy shuùn ven shó ji wír və́.

⁸ A vèn kì taʼ, a yiì réŋ, bo á kì lem a dzə̀ nsər ye yì tíy vitú e Nyùy mvə̀m vifòn, a dzə̀ ye yì dzəə̀n é Ŋwàʼ Nyùy jii, «Wìr wáa kòŋ fə́r və mo wù koŋ kitú kfə́.»

⁹ A vèn lò, a nyàʼ kén a dzə̀ wíri, bo vèn sí yii a dzə̀ kinyo ke bi kí, shóʼor nsər Nyùy, a vèn gbù ne fo fo.

¹⁰ Vèn kì sá jii, a wìr fə̀m lò, a lèm nsər sidzə̀m, e shòʼór yee mòʼón, bo wù gbù ne fo nsər se Nyùy sidzə̀m.

¹¹ A kí dzə̀ bey, bìʼ fo Nyùy wo wù‑uù suuyin jii, «Lá wìr yòʼ lì wiiy wìr, kìn ji wiíy wáa ghan viŋkar,» kù dzə̀ wùwun wo wù‑uù suuyin sá jii, «Lá wìr yòʼ yùyrí wír.» Kí nén a dzə jii, a wìr fə̀m dzə̀, e làa yòʼ a jàŋ kinjàŋ, e yùyrí wír, bo wù shòʼór ne nsər Nyùy, e gbù fo fo.

¹² M nén a suúy e vèn jii, vèn lóo suúy vinyo, lóo yiì ve yiìn ví, vèn wàa yiì moo wír ve á kiìn ji Nyùy wíy saʼ áwune é shùu nsər ye Kristu foon ji á wáa lèm, e fíʼ bòy.

¹³ A kí dzə̀ jii, Nyùy wíy lòo tàr ké wìr kee kinyo, é la wù yòʼ a rər a mendzən fo wìr wo bó wù yòʼ‑oò ló a rər sa fo wír ámóʼó. Yii bèy, lóo dzə wír wo wù‑uù rə́r mendzən me wír ámóʼó, é Nyùy rə́r sá mvə́ə.

Kinyo ke wìr yii ki din rú ji wù biìmé Nyùy

¹⁴ Afə̀r vem, a wìr lò, a suúy ji wun wày shilív e Nyùy wùn, a bó wù yòʼ yii mo Nyùy suuyì, kee shooy ki sə̀ wun e gha? A dzə̀ ŋgaàŋ lùŋ bìʼ fo wù wayin shilív e Nyùy wun é dzəə fóo fèy a?

¹⁵ Vèsən ku lì jii, fər won woo wiíy kìn woo lumèn wùmòʼ kì lò, e bùŋ ndzə̀y, kìn kifá ke yi,

¹⁶ wìr fo vèn yén bey, e shàʼtì shàʼtìn jii, Nyùy səəvi wò, áà koóy ndzə̀y wùn à vifá ve yi vi. A wù shàʼtì bèy, e làa yòʼ fo kifá ke ŋgaàŋ kì búŋ kìy, kí sə̀ ŋgaàŋ e gha?

¹⁷ Vèn yén ri, a wìr suuy ji wun wày shilív e Nyùy wùn, a bó wù yòʼ yii mo Nyùy suuyì, bo dzə̀ kisáŋ.

¹⁸ A tàm wìr wùmòʼ wàa dzə jii, kfə́ kí dzə̀ á ji wun wáy shilív e Nyùy wùn, ké wùmòʼ woo wír a ji wù yii lim se Nyùy. M nén a ghay kém jii, wù din mo á mo wù wáy shilív e Nyùy wùn, a bó wù yòʼ yii mo Nyùy suuyì. A m yíi dìn sa sho mo m wáy kém shilív e Nyùy wùn a dzə̀ fó vinyò ve m yii mo Nyùy suuyì.

¹⁹ A wìr biìmé ji Nyùy kù jòʼsì e mòʼón, bo wù kù yòʼ biìmé a dzə̀ kinyo ke ru kí. Yii bèy, kù dzə̀ sá mo *anyùyi biíme bèy, fan, yaʼà.

²⁰ Wìr woo bey dzə̀ kiyúŋ. A m yíi dìn sho jii, a wìr suuy ji wun wày shilív e Nyùy wùn, a bó wù yòʼ yii mo Nyùy suuyì, bo kee shooy ki dzə̀ á kisáŋ.

²¹ Bó Nyùy yòʼ‑oò lì tàr wòsən Abraham ji wír woo là jay a dzə̀ bìʼ kinyo ke wù‑uù yiìn a? Wù‑uù lì wán və woo Aysi, e neèr e kiy ji wun sí cu a Nyùy sho.

²² Vèn yén ri mo wù‑uù wayin shilív e Nyùy wùn, e kfə̀n a yiì mo wù suuyin. A shilív she wù‑uù wáy e Nyùy wùn shí‑iì mèé é kinyò cáʼ bìʼ kinyo ke wù‑uù yiìn.

²³ Kí nen ghèén mo vé‑eè saŋen é Ŋwàʼ Nyùy jii, «Abraham‑eè biìmé kinyo ke Nyùy, Nyùy nèn lì wun ji wír woo là jay bìʼ shilív she wù‑uù wayin e wun wùn,» á wáa yòŋ wun ji ŋkar Nyùy.

²⁴ A dzə̀ vèn yèn sá lèn jii, kinyo ke kí din ji wìr wáy rú shilív e Nyùy wùn kí dzə̀ ke wù yii, a bó yòʼ dzə̀ ke wù suuy cáʼ ji wun wáy shilív e Nyùy wùn.

²⁵ Kù dzə̀ sá mo ké Rahav wo yì‑iì dzəə̀n sàkì ki dzəə̀n. Kinyo ke kí din ji wù‑uù wáy rú shilív e Nyùy wùn kí dzə̀ ke wù‑uù yiìn. Wù‑uù səə̀sí aŋgàa ŋkiy ve wír veé Israyi‑iì tumen, e dìn dzə́ə ye sən, áwune léʼ.

²⁶ Kidzə̀m ki nén a dzə jii, a wìr suuy ji wun wáy shilív e Nyùy wùn, a bó wù yòʼ yii mo Nyùy suuyì, bo kee shooy ki lày kisáŋ réŋréŋ moo wún wo wú búŋ kiyoy, wú lày kisáŋ.