Jeem 1 - ŊWÀʼ NYÙY

¹ Ŋwàʼ və̀ne sàŋ mo woo Jeem wo dzəə̀n ŋgaà lìm Nyùy wùn Taàtá wòsən Jesus Kristu. A m sàŋ, a shàʼtì ven vee wír Nyùy ve á taʼrin, a dzə woŋ dzə̀m.

Ŋgeʼ si sheŋrì wír wo wù tiir Nyùy fo mbìy shéŋrin

² Afə̀r vem, ŋgeʼ si lóo koóy ven, vèn kù a lì ji bòŋ a vishí vén, a fə̀m dzə̀ kfə́ə ŋgeʼ yee ka.

³ A dzə̀ vèn wàa lì bèy, bìʼ fo vèn kiìn jii, mo vèn sí shaa e mvə̀m ŋgeʼ foo fèy, kù wáy shilív a dzə̀ e Nyùy wùn, bo vèn kù yíi màysì, a tiy kitávín, é la kinyo ki yòʼ dzəə wìy sə̀ʼ ven gheéy.

⁴ Vèn ku nèn a tiy kitávín, e wày ji vèn tósín é mvə̀m ŋgeʼ foo fèy, e fíʼ gheén mo dzə̀ wír Nyùyi wàa dzə. Vèn gheen bèy, é la á yòʼ dzə́ə a bvə̀ʼ fo kinyò kímóʼ kí gheéy.

⁵ Wìr méŋ mo dzə̀ wù yiì, wù kù a lon a dzə̀ fo Nyùy, é wù naari mo dzə̀ wù ghàn. A dzə̀ mo wù kù yii kér shilív sə́ tèéter, naarì wir dzə̀m, e làa yòʼ a saʼ wír wo wù dzə́r dzə́ə.

⁶ Yii bèy, wìr lóo dzər, wù kù yòʼ a biimé fo wùn shiliv ji Nyùy waà yíi naàrì. Lá wù yòʼ a dzər melív mebaà. Vèn wáa kiíy jii, wìr wo wù lón kfə́ kifá fo Nyùy melív mebaà dzə̀ á moo ndzə́v ye shwéri tsə́y, a yí líy, du fo shwéri du.

^7-8 A dzə̀ wír wo wù kér melív mebaà, la wù yòʼ kìíy fo wù tíyí. A bó yòʼ dzə̀ wír woo bey, wù wàa kwàʼtì ji dzə̀ á wun yù kinyo fo Nyùy gheéy.

Kishéʼrì ke ŋgaà kitàn wùn à ké ŋgaà bùʼ ki

⁹ Wìr Kristu wo dzəə̀n ŋgaà kitàn ku nèn a sheʼrí, bìʼ fo wù kiìn ji wun dzə̀ á ŋgaà bùʼ e Nyùy si.

¹⁰ Wo dzəə̀n ŋgaà bùʼ ku nèn a sheʼrí kfə́ mo á sí yén wun lèn fo tèr, bìʼ fo wù kiìn ji dzə̀ wun kù màʼtì bùʼ və réŋréŋ moo viŋgà ve ví buy lèn, ví kù nèn yòvrí.

¹¹ A dzə̀ mo viŋgà ví yii buyì, shùy mbáŋri, báné, ví kù nèn yòvrí, e keèsí, vijuŋ və́ vee shooy vi nèn lày. Kù dzə̀ réŋréŋ mo ŋgaà bùʼ wíy lòo tàʼtìn e wùn kitu ke bùʼ, é wù sasin, e kpù, e màʼtì bùʼ woo shooy.

Ŋgeʼ si mum a dzə̀ ŋgaà shií

¹² Wír wo dzə̀ wù wàa sheʼrí dzə̀ wo wù tosin é mvə̀m ŋgeʼ, e làa yòʼ gbù fo kinyò kímóʼ kí, e to e jay. Mo kinyo ki mùmèn wun, wù só, wù wíy a ker vinə́ŋsí, a dzə̀ dzəʼə̀m yee là may ye Nyùy kàʼàn wír ve á koŋ wun sho.

¹³ Vinyo vi lóo mùm wír, lóo bayír ji wù nəə́ é kinyò, lá wù yòʼ a suúy ji yii a Nyùy, bìʼ fo bó yòʼ dzə̀ kinyo ki bàyír Nyùy ji wù yii kinyo ke bi kí. A bó yòʼ dzə̀ sá Nyùy bàyír wír ji wù yii á bèy.

¹⁴ Ke kí dzəə̀n kí dzə̀ jii, báyir a shií wo wìr sí kér fo kinyò, yú a dzə̀ fó fo, a wù sí wáy wun e kitam.

¹⁵ Shií və̀n távkirì, nèn fəə̀ kinyo ke bi kí. Kí ram, kí nèn bvə̀ysín a dzə̀ é kpu ye dzəə̀n lòn woo là may.

¹⁶ Afə̀r vem, vèn wáa yen fó a boʼtí vitú vén.

¹⁷ Vèn wáa kiíy jii, vinyo ve dzəə̀n ve ru vidzə̀m ve dzə̀ ví wàa fo vijuŋ vi kù lo a dzə̀ á fo Nyùy. A tsə́nsi wun woo Ŋgaà Mbom wo rán e dzə̀me lo a dzə̀ fó fo. A bó yòʼ dzə̀ wù kùvsín mo shùy yii lo, yì kèvrín, ndzə sə̀n wíri é ghan símóʼ sí gheéy.

¹⁸ Kù‑uù sìysì wun, bo vèsən wáa dzə wón və́. Wù‑uù tsə̀nsí vèsən jí rə ye dzəə̀n kinyo ke ru kí ji á fiʼ kìíy wun, a dzə ji kifá ke mbìy ki ke wù tayin, e siìr ji kfə́ fó vifa ve wù‑uù bomen vidzə̀m.

Wìr Nyùy woo rú dzə̀ wo wù yú kinyo kfə́, lemè

¹⁹ Afə̀r vem, vèn səəm kinyo kìn ki kijuŋ. Wìr ku yuùrí kinyo kijuŋ. Wìr wáa səʼə́m, e bó a suŋnín. Lá wìr yòʼ a tav, a shwiíy kilòŋ.

²⁰ Vèn wáa kiíy ji wìr lóo shwiíy kilòŋ, bo bó yòʼ dzə̀ wù dzəə yiì kinyo ke kí gheén Nyùy.

²¹ Kí nén a dzə jii, vèn maʼti á liì joònè e dzə̀m, e fəə̀ fó bǎm vinyò ve kisaŋ vi vidzə̀m, a neŋ a dzə̀ e Nyùy si, a yu a dzə̀ fo wùn jì ye wù wayin e věn meliv. Á kinyo ke dzə̀ kí dànèr ven é dzə̀ʼə̀m yee là may.

²² Vèn kú a yuurí kinyo ke Nyùy ki, a yiì mo kí dzəə̀n. Lá vèn yòʼ a boʼtí vitú vén ji vèn néŋ e Nyùy si, a vèn yuúri kinyo kfə́ yuúrín, e làa yòʼ a yiì.

²³ Wìr wo wù yuúri kinyo ke Nyùy yuúrín, e làa yòʼ a yiì, dzə̀ moo wír wo wù shunen sí e kileèy, e yèn mo yí dzəə̀n.

²⁴ Mo wù yenen, lóo bìn ndzə̀m, wù nèn làysìn.

²⁵ Yii bèy, a wìr tùy kfə́ sí a dzə̀ é nsər Kristu ye yì tatin nsər se Nyùy sidzə̀m, a yiì, bo wìr wáa bòy, bo Nyùy wíy sə ŋgaàŋ, é vinyo ve wù yii vidzə̀m vi wáa dù réŋ, a wù fèn sáyri ghán sidzə̀m, yii mo yì dzəə̀n, e làa yòʼ a yuurí yuurín cáʼcáʼ, a làysìn.

²⁶ A wìr yoŋ kitú kfə́ ji wir Nyùy, a bó yòʼ dzə̀ wù mèy kiliímé kfə́, bo ŋgaàŋ bóʼti kitú kfə́, a kinyo ke wù yoŋ kitú kfə́ ji wir Nyùy ki lày kisáŋ.

²⁷ Wìr wo Nyùy yén ji wù yú rú kinyo kfə́ shilív shimòʼón, a bó wù yòʼ kér jay wùmòʼ, dzə̀ wo wù leey fo wón tsə̀ə́ wùn à vikǐy ŋkfəə, sə́ áwune. Kfə́n a dzə wír wo wù kim kitú kfə́, fo vinyo veé ndzə fèn vi bívír wun.