Hosea 9 - ŊWÀʼ NYÙY

Hosea tóʼ ji wír veé Israyi lo, a ker a ŋgeʼlàʼ

¹ Éè wìr veé Isray, vèn yar ŋkàʼ se vèn yí, shéʼri a dzə̀ anyùy vitum si. Vèn bìn ne ndzə̀m e Nyùy won, kù mo wiíy màʼày lúm, e fəə̀ visàkì. Vèn shéʼri anyùy kisaŋe e věn virə̀ʼ ve vèn búʼ sáŋ shó vidzə̀m, shéʼri, ji sì á vilaámé vé cù ye vèn cu áwune.

² Ké lèn ki, vèn yíi a kav vifá, é ví wáa dor dorín, é vèn wáa yi, e làa yòʼ a yu fo ví du. Vitiír vé melùʼ ve vèn káv vi yòʼ yíi a fəə́r meluʼ me vèn wáa rəə̀r kilòŋ shó.

³ Vèn yòʼ yíi gòʼ e Nyùy Tǎr nsay, vèn kér fó yìi kfən e bàm é wòŋ Ejiv. Vèn wíy a dzə e nsay Assiriya, a yi viyíkìr a dzə̀ ve ví sí kér kifàn.

⁴ Vèn yòʼ dzəə́ wìy màʼ meluʼ e nsay foo fèy ji á cu Nyùy Tàr shó, a bó yòʼ dzə̀ vèn cù Nyùy Tàr fó, wù səə̀sí cu yén. Vifá ve yi vee fó vi wíy a dzə moo kibán ke á yí e nsaàlav kpu, a wìr dzə̀m wo wù yí wíy lì *kifàn. Kibán kìn ki wíy a dzə cáʼ ji kí rəər jíŋ yen, a bó yòʼ dzə̀ á cù Nyùy Tàr shó.

⁵ Kishiíy kén ké ŋkàʼ kí wíy gheén, é vèn yée le? Kishiíy ké ŋkàʼ woo ji á suyri Nyùy Tàr kí wíy gheén, é vèn yée le?

⁶ A vèn fèn lèʼ, fo wír veé Assiriyàa laar ven, bo wír veé Ejivi kù‑úù báʼtí ven, e yùyrí. Yúyri, é wír veé Memfisi dzəəme. Vimbìn ví wíy fəə, e sətí bùʼ won, é vitiír vé njoŋ vi wáa tèʼ láʼ sén sidzə̀m.

⁷ Ghán se á lo, e màʼ ŋgeʼ e wír veé Israyí kitu si ghèén ne. Ghán se áwune lo, a sə vilaʼày vév sí sì é kiwo. Á yíi màʼ ŋgeʼ rə̀n aáwuné kitu, é vifií vév ví nèn tòʼkír. Áwune sí yoŋ *ŋgaà ntum Nyùy və̀n ji kiyúŋ, yoŋ wír, a danèr Kiyoy ke Nyùy ŋgaàŋ ji vifií və́ ví layì. Vinyo vév ve bi ví kùʼ ne e ŋàŋ, á nen lò, a bàn mo woo ŋgaà ntum Nyùy bánen.

⁸ Nyùy tsə̀nsí ne mo woo ŋgaà ntum və ji m kanti wír və́ veé Isray. Yii bèy, m lo ji m du fèy, m kù yèn, aá wáy ne vitám, a teʼ mo shó. Á kù sí maʼ rə́r vèr áwune, maʼ sa e Nyùy lav.

⁹ Áwune nə̀ə́ ne e vinyò ve bi ví wuu baà, e bìvír vitú, kí fóy fóyin, kù mo atàr véví‑iì yii e Gibea fo ŋgùʼ. Nyùy kù yíi a kuumé vinyo ve á buʼtì. Wù wíy màʼ ŋgeʼ aáwuné kitu bìʼ vinyo vév ve bi ví.

Jay wìr veé Isray wùn à vilaʼày və́ ví

¹⁰ Nyùy Tàr suuy jii: «Wír veé Isray, kishiíy ké mbìy ke mò‑oò yenen ven, yì‑iì dzə̀ mo m tò é kitiír ké *vayin, a kí koóm é kirə̀ʼ ké woʼ. Mò‑oò yèn atàr vén fó kàŋ wo mbìy, á wáa dzə moo báŋ se kici ké *fig ke kí bàʼàrìn, e bàŋ e kici. Yii bèy, áwune wìy e Gwan Peor, e kirə̀ʼ ké nyùy woo *Baal, e nèn shwì kitú e nyùy nshoórmé və̀n. Àbaày, vèn ló ben, e kfə̀n ji kifá ke koʼoyín kí moo nyùy woo shooy.

¹¹ Viwìr ve wìr veé Isray vi yíi taʼrí, e lày, kù moo shinə́n she shí feŋen, e lày e shwer. Áwune yòʼ dzəə́ wìy a dzəə́ wón, a vikìy vee bvəmeé yòʼ dzəə́ wìy a dzə, a wiíy yòʼ dzəə́ wìy a tiím bvəm.

¹² Aáwune fə̀m lìy wón, bo m kù yíi laàr adzə̀m. Rúrú, m yíi bìn ndzə̀m aáwune, é lòné nəə́ áwune.

¹³ M yèn Isray, a wù tókir moo kicí ké ten, aá bíy é kiboo ke kí borin. Ké lèn ki, áwune kù kér fóo tsəəné wón vév, e dù sho, aá du, e seèrí.»

¹⁴ Éè Nyùy Tàr, a dzə̀ m lòn ji à fó ka e wír vìne? Ku yiì, wìr fo áwune bóŋ bvəm, é yí shaa shaán. Yìi, é la vín yéví yòʼ a fəə, fo á wáa nyoór wón shó.

Nyùy tínén kinyo ke wìr veé Isray

¹⁵ Nyùy Tàr suuy jii: «Liì wov wo bi və̀n kù‑uù kèʼ a dzə̀ é Gilgal. Á fo vibàn vé vèr áwune ví‑iì kèʼèn, a m yíi fəə́r áwune fo mǒ nsay, bìʼ liì kisaŋ wo á yii. Kikoŋnìn ke vèr áwune kí kù‑úù seéy, bìʼ kóy wo vilìmbìy vév ví tsə́y vèr áwune.

¹⁶ Wír veé Israyi nə̀ə́ ne e kinyò wuu baà. Á sì moo kicí ke gháŋé yumen ne, a bó noshìndzə̀v yòʼ dzəə́ yiì a dzə aáwune. Áwune yòʼ dzəə́ wìy a ker wón, aá fə̀m dzə̀ə́ wón, bo m kù yúyri wón ve áwune yoy, tiir sho vìn adzə̀m.»

Ŋgaà ntum Nyùy súŋnín kùm wír veé Isray

¹⁷ Nyùy wo m ghvə́mé yíi meŋ wír veé Isray. Wù yíi meŋ áwune, bìʼ fo á tenen fóo yunín wun. Áwune yíi a ghan, a jan janén e vitúm ví mvəm, aá yòʼ yíi a ker kirə́ʼ kée teʼ kitú sho.