Hosea 4 - ŊWÀʼ NYÙY

Nyùy Tàr roomè wír veé Isray

¹ Éè wìr veé Isray, vèn yuúrí kinyo ke Nyùy Tàr yoŋ e vèn kí. Kí dzə̀ jii, Nyùy Tàr kér nsaʼ wùn à wír veé wòŋàne, suuy jii, «Suuyrú wùn à kikoŋnìn ki mày ne fo nsay fèn, a bó wìr yòʼ kfə̀n gwarìr kinyo kee kùm Nyùy.

² Wíri yii aŋkàʼmé, bin, shóʼorì, bóʼti kimboʼtì, yúyri wíri, shóŋ vishóŋ, aàlúm wírií jaŋ kinjàŋ, a vikǐy wírií ghán viŋkar. Á buʼtì vinyo, tónenè, yúyri wír, tóm wùmòʼ.

³ Bìʼ bey, nsay yùm ne, a dzə e nsòv, a kifá kidzə̀m ke kí dzəə̀n shó ki wèʼ ne wéʼen. Nyám sidzə̀m wùn à menə́n mè, à sə́ si ló kpukír.»

Nyùy Tàr roomè atàá cù

⁴ «Yii bèy, lá wìr yòʼ a dìn jay wùmòʼ, kìn ji wù wáa roòmè wùmòʼ woo wír. Nsaʼ ye yì dzəə̀n é kiwo dzə̀ ye dzə̀ wíri kù roòmè atàá cù.

⁵ Ven vee atàá cù, vèn yíi a bàyrìn, a gbù e shùy wùn à vitsə́ʼə́, é wír ve á dzəə̀n ji aŋgàa ntum vémé wáa gbùkìr sa bèy vitsə́ʼə́. M yíi laàr Isray woo yè won.

⁶ Wír vémé sí kpúkir bìʼ méŋ ye á meŋen wír wo dzəə̀n mo. Ven vee atàá cùu tèn ne fó kiíy wír wo dzəə̀n mo, bìʼ bey, m mèŋ ne ven fó atàá cù vém. Mo vèn tenen fó a sàmèr yéʼéy Nyùy won, bìʼ bèy, m yíi ten sa fo wón véné wáa dzə atàá cù.

⁷ «Atàá cù, mo ŋgoo yen kuʼù, kù dzə̀ sá réŋréŋ mo vinyo vén ve bi ví kuʼù. Bìʼ bey, m yíi siìr viwìr vén, é ví kfə́n ji nshoórmé.

⁸ Vèn sí kuʼkìr a dzə̀ fó cù ajay ye wíri jáy vinyo, wiy sho. Vèn ku nèn a tàʼ kén ji wíri kú a jay vinyo, a tonén tonén.

⁹ Yii bèy, lòn wo wìr líi kù dzə̀ wo taà cù wíy lì. M wíy tatí wír adzə̀m, e lovtí sho mo yii yéví dzəə̀n. M kù wíy màʼ ŋgeʼ aáwuné kitu ji vilaʼày vé vinyò ve á rə́si buʼtì.

¹⁰ Áwune wíy a yi kifá, e kù a tooŋé tooŋén, a ghvəm anyùy ji á fó kidzəə́y, a bó á yòʼ yíi a ker wón, bìʼ fo á màʼàyìn ne mo woo Nyùy Tàr, a cù anyùy ámóʼó.»

Nyùy Tàr roomè ghvə́m ye wíri ghvə́m mebvə̀m

¹¹ «Meluʼ mè bvə̀ə́r ne vifií vé wìr vém, mo á nó mee lán, nó me shiiyín mè. Wír vémé yòʼ dzəə́ kiiy fo á dzəə̀n.

¹² Áwune kù sí mbaa a dzə̀ mebvə̀m, a dzə̀ kicí mo á semen, kwaʼ ji kí yíi suúy kinyo ke kí bvəə́shi, e koóy. Shií wo áwune kér fo mebvə̀m mè yiì ne, á jáy dzə́ə. Á kfə̀n ne ji sàkì, e màʼày mo, e dù, e yèn a dzə̀ anyùy ve səné.

¹³ Áwune cu mebvə̀m e vitu ve agwan, yii cu ye tonèné aàŋkoŋ. Cu anyùy e sar vici vee *oak, à vé *popar vi, à vé *terebint vi. Aá cu bèy, yú vijuŋ ve kindzə̀ə́ndzəm kee fó. «Á bèy, wìr vem, wón vén vee vikìyí lò ne, e kfə̀n ji asàkì, a vikǐy won véné fəə́, ghán viŋkar.

¹⁴ Fə̀m mo wón véné ghán visàkì, a vikǐy won véné ghán viŋkar, feyì feyì, bó m yòʼ yíi màʼ ŋgeʼ aáwuné kitu, bìʼ fo ven vee alúme du, shiiy vèn aàsàkì veé virə̀ʼ vé cùu, vèn áwune shiiyì, cu anyùy kisaŋe. Kitúm kee là vifií kí kù wíy lày ŋkuuŋkùŋ.

¹⁵ Yìiy, wìr veé Isray, mo vèn kfənen ne ji asàkì, lá kí yòʼ mùm kòóy ji wír veé Judàa biʼnin, é dzə̀rkìtu lo, a koo áwune. Vèn wáa yen fó tiír kiwuú kén é Gilgal, kìn ji vèn kóʼ é Bet‑Aven ji á suyrì mo. Vèn wáa yen fó lìʼ kinyo e mo woo Nyùy Tǎr yir, mo wo m dzəə̀n e tin.

¹⁶ «Wír veé Israyi táv kitú moo wan nàʼ wo wù yóʼ ne dzə̀ə́. Mo áwune sí gháʼ mo, a dzə̀ m kfə̀n ghàn é le, e bóo yiír áwune moo bvə́y se sí sí ján janén?

¹⁷ Wír veé Israyi suùsín ne wùn à mebvə̀m mè, vèn maʼti dzə́ə yev.

¹⁸ Áwune nó meluʼ, yú, á nèn dù, a shiíy aàsàkì veé kirə̀ʼ ké cùu. Vilìmbìy vév ví kù sí tíy e vinyò, a dzə̀ ve ví wiy e nshoórmé.

¹⁹ Á wíy kuúy áwune, e dù sho e kwaʼ nsàm, kù mo kùúy shwér. Áwune wíy a woomé bìʼ anyùy kisaŋ ve áwune cu.»