Hosea 13 - ŊWÀʼ NYÙY

Nyùy Tàr máysí, e naàrì lǒn wìr veé Isray

¹ Yì‑iì dzə̀ fó ŋgùʼ, a wír veé ram Efrayime‑eè súŋnin, wíri wàa fàn, a yàʼ. Vé‑eè ghvə̀m áwune é ŋàŋ é nsay Isray. Yii bèy, áwune nèn lò, e kèʼ, a ghvəm nyùy woo *Baal, lòné koó áwune, á sénkír.

² Ké lèn ki, áwune kù sí jáy jay e wùmǒʼ kitu. Áwune sí fer mebvə̀m e *kisha ke mbàm ke fəvír kí. Á lo, á wày vifií, e nàŋsín, e fèr bèn kijuujùŋ, e lìm feyì a dzə̀ e yé ŋgaà fèr woo fií. Á bèy, á ku nèn a yòŋ áwune jii, «Wír ve á ghvə́m anyùy, baáme mebvə̀m mee wan nàʼ.»

³ Bìʼ bey, áwune yíi ŋeemé, e lày moo mbàʼŋkfəə́mé yee kijàvndzə, e yuumé moo ŋweʼ ye yí gbuùn kijàvndzə. Áwune wíy a dzə moo mvə́y se shwéri feer feèrín, a dzə moo kindzə́ʼ ke kí dzəm, fəə́ fo shùu wundu.

⁴ Nyùy Tàr suuy jii: «Dzə̀ mo Nyùy Tàr woo Nyùy won, e kèʼ mo mò‑oò fəərin ven fó wòŋ woo Ejiv. Vèn yòʼ kfə̀n kér Nyùy wùmòʼ, e shaà mo, kù jòʼ mo cáʼ wo dzəə̀n ŋgaà lùŋèr won.

⁵ Kù‑uù leey mo ven é ghan se vèn‑eè dzəə̀n é woʼ, kirə́ʼ, a fóo ríʼsinè, a nsay yee fó kù yúm yumén.

⁶ Yii bèy, m yiír ven, vèn yíkír, e kùr, e lò, e kèʼ wún wo yuúné, e nèn mèŋ mo.

⁷ Bìʼ bey, m lo lèn, e ghiʼ ven moo bvərə̀ʼ. M lo, e lìr e věn kiwuù ké dzəə, a teʼ ven moo baá.

⁸ M yíi ghiʼ ven moo nyám ye á yoŋ ji *bear ye á koon wán və, e ghar ven, e shùʼtì bvəm sén. M wíy sàʼtì ven moo bvərə̀ʼ, e lovtí e vèn mo lòvtí nyam kwaʼ.

⁹ «Òó mbàa wìr veé Isray, á lo, e laàr ven, a dzə̀ bìʼ fo vèn ŋwayin mo woo ŋgaà sə won.

¹⁰ Ké lèn ki, fòn won bèé, é wù sə́ ven? Atǎr saʼ vee věn ŋkà se laʼa bèé lèn? Áwune ve vèn‑eè lonen ji m ku fò ven afon wùn à vé saʼa.

¹¹ Mò‑oò fò afon e vèn é mvə̀m dòʼshwiíy, kilòŋ kí shwiíy mo, m shóv áwune, e lì, e dù sho.

¹² «Á sàŋ ne ajay wìr veé Isray e ŋwàʼ, e bàʼtí vinyo vév ve bi ví, e lèm.

¹³ Áwune dzə̀ moo wán wo á sí lúmé, yii bèy, kù dzə̀ wán, a wù dzə̀ là vifií. Ghán sé dzəə́ si yíi gheén, é wù ku tàv távín é bvə̀m.

¹⁴ «A dzə̀ rú, m yiì tìn áwune fo aŋkfəə́ wòŋ à? A dzə̀ m bòyìr áwune fo kpuú wo à? Éè kpu, nyár ye à yii wiy shoo bèé? Éè wòŋ aŋkfə, laar ye à yii wiy shoo bèé? M yòʼ dzəə́ wìy sham mendzən mev.

¹⁵ Fə̀m mo vikuʼùy ví nəə áwune, shaa afə́r vév, m yíi tsənsí shwér wo yumérí fó kirə̀ʼ ké woʼ, é wú yúmér ntòŋ sév sé ndzəv, e yùmér ndzə́v sév se tuŋén sí. Á yíi faàsì kifá kidzə̀m ke áwune lèmèn é vitàv, e kuúy bèn, e dù sho.

¹⁶ M kér fó yìi màʼ ŋgeʼ e wír veé Samariàá kitu, bìʼ fo á tsə́y kóy vèr áwune, a m dzə̀ Nyùy wov. Áwune wíy kpukír e shùu rər, aá wíy a tayrí wón vév, a dzə̀v e nsay, aá wáa sàʼkìr. Á wíy a shùʼtì bvəm se vikìy vév vee bvə́me aáwuné si.»