Hibru 8 - ŊWÀʼ NYÙY

Jesus mvə̀ʼ dzə́ə ye fíy

¹ Tím kinyò ke vèsən kì fer ki nén a dzə jii, Jesus dzə̀ rú á taà cù wòsən wo kuʼùn wo wù gheenen féyì. A wù sì a dzə̀ é yuv wùn Nyùy, dzə́ e Nyùy ghaa kàvàʼ, e koy yìyí.

² Wù nén a lìm kfə́ féyì a dzə̀ fo Nyùy dzəə̀n, e lav ye dzəə̀n rú ye wun woo Nyùy. Bàʼrì wun woo Nyùy yee shooy, a bó yòʼ bàʼrì wíri.

³ Mo lím taà cù wo kuʼùné kù yii dzə́ ji wù wáa màʼ Nyùy, a seerí nyám, a taŋrí wíri shó, bo Jesus wo dzəə̀n taà cù wòsən wo kuʼùn kù dzə̀ wù wàa ker sa kifá ke dzə̀ wù cù Nyùy sho.

⁴ Wù cu kfə́, tíy a dzə̀ e Nyùy si. Wù yòʼ cu mo atàá cù veé nsay fène yii cu, jumrì a dzə̀ ntò se cù se Mooser. A Jesus kì dzə̀ é nsay fèn, bo bó yòʼ dzə̀ wù wàa dzə taà cù gheéy.

⁵ Vinyo ve atàá cùu yii e nsay fèn vi dzə̀ vimfìʼìr ve vinyò ve Jesus yii e yuv e Nyùy lav yee rú. Vèn kuúmé mo Mooser‑iì lóo tuy kibàn ji á wáa cù Nyùy sho, Nyùy suúy. Wù‑uù sùúy jii, «Ku shoòshí, é vifá vidzə̀m vi wáa dzə réŋréŋ ji kikúv ke kíwun ke m dìnèn e wò e gwan.»

⁶ Mo Jesus tíy kfə́ a dzə̀ e Nyùy si, bo cu rəə́ shaà yé atàá cù ve vé‑eè lim e ghan sé mensàŋ me mvə mè feyì réŋréŋ mo mensaŋ me fíy mè, me Jesus tíy e Nyùy wùn à wírí nsàn, mè shaàn me mvə mè, bìʼ fo dzəə̀n mee shooy me Nyùy kàʼàn vèsən shó vinyo vinín.

⁷ A mensaŋ me mvə mè‑eè ghèén wíri, bo bó á yòʼ kì taʼ memoʼ mè.

⁸ A Nyùy‑iì lo yèn sá ji mè gháʼ a wíri, bìʼ fo wun woo Nyùy Tàr‑iì suuyin jii: «Ghán sí wíy gheén, é m gwar mensaŋ me fíy mè vèr à wír veé Israyi, à veé Judàa.

⁹ A bó mee shooy mè yòʼ dzəə́ wìy a dzə moo me mò‑oò gwàrìn vèr aàtǎr ram yéví é ghan se mò‑oò gharin áwune e kiwó kém kí, e fə̀ə́r fo wòŋ Ejiv. Meé ghan see shooy mè‑eè ghàʼ áwune, la á yòʼ à lèm. M nèn màʼày sa áwune. Suuy mo woo Nyùy Tàr.

¹⁰ Yii bèy, ghán sé mensàŋ me mvə mè si wíy shaà, é mensaŋ me m gwar vèr à wír veé Isray mè wáa dzə jii, m wíy way nsər sém aáwuné vifii, e saŋ aáwuné meliv. M wíy a dzə Nyùy wov, aáwune wáa dzə wír vém. Suuy mo woo Nyùy Tàr.

¹¹ Bó wìr yòʼ dzəə́ wìy a yeʼéy wír woo wun ghaŋ, kìn ji fə̀r wáa tir fə́r ji wù kiíy Nyùy Tàr. Áwune wíy kiíy mo, wír adzə̀m, à wìr wo kuʼùn, à woo fó tèr.

¹² M wíy a sham áwune, a làysìn ajay vév, a bó yòʼ dzə̀ m kfə̀n a kuumé vinyo vév ve bi ví.»

¹³ Mo Nyùy‑iì suuyin ji mensaŋ me fíy mè wíy a dzə, bo wù‑uù sí leey me mbìy mè ji kinyo ke mvə kí, a kí dzə́n ne, e shèʼkìr. A vèsən kì ji kifá ki yii dzən, keʼ lóo shèʼkìr, bo kí sí du a duùn.