Hibru 6 - ŊWÀʼ NYÙY

¹ Vèsən ku nèn nàʼ vinyo vee kùm Kristu ve dzə̀ wìr kù yèʼéy fo mbìy vìn, e tùmsín e vinyò ve dzəə̀n vé wìr ve á tuuyin ne. Lá vèsən yòʼ kfə̀n rə̀sí, a way a dzə̀ kinsə̀ŋ ke lav, a ŋeèvì vinyo ve vèn‑eè yeʼeyin ne jii, lá wìr yòʼ a way shilív é vinyò ve yii wun ji dzə̀ wun lùŋ fó fo. Wìr wáa way shilív a dzə̀ á e Nyùy wùn.

² A bó yòʼ dzə̀ sá á kfə̀n rə̀sí, a yeʼéy ven mo dzə̀ á wày wír e ndzəv, kìn mo dzə̀ á neèr wó e wìr kitu, e bùnrì fo fo. A bó yòʼ dzə̀ sá, á kfə̀n a yìmrì yìmrìn ji Nyùy wíy fəə́r ven fó kpu, a fìʼ mo nsaʼ kinjòʼsìbàm wíy a dzə.

³ Vèsən naʼ ri vinyo vee shooy, e shaà fo mbìy, a Nyùy ben biìmé.

⁴ A dzə̀ á kù nàʼ bèy, bìʼ fo a wìr‑iì yèn ne rán, e bóo kfə̀n lò, a nyeŋ, bo bó dzəə̀ yòʼ kfə̀n dzə̀ ye dzə̀ á naàrì wun sho, wù bìnèr shilív sə́, e kfə̀n fo Nyùy. A m yoŋ wír vìn, a dzə̀ ve vé‑eè sí yú vijuŋ ve Nyùy fó e wír ve dzəə̀n vəə́, a Kiyoy ke Ranén kí lumèr melív mev.

⁵ Aáwune kfə̀n yèn ne jii, kinyo ke Nyùy ki fó a vijuŋ, e kfə̀n yùʼtí mo vitaáví vé Nyùy vi sí lim aáwuné wùn, a dzə̀ vitaáví ve Nyùy wíy fo e wír vəə́ é ndzə ye yì wíy a wìy.

⁶ Wíri wáa dzə, a vé‑eè nə̀ə́ ne e mvə̀m vinyò fèn vidzə̀m, e kfə̀n nyèŋ, bo bó yòʼ dzə̀ á kfə̀n bìnèr áwune, bìʼ fo á sí nyéŋ bèy, keŋ Jesus kéŋen ji bó yòʼ dzə̀ Wan Nyùy, nèn taʼ ji á kfən yùyrí mo vé‑eè kùmèn é kintam e ghan siy.

⁷ A dzə̀ réŋréŋ sá mo kinyo ke sum kí yii dzə́. Á yii lim súm, wuú ló sho, vifá vi lóo bòŋ, á nèn a yi, a sheʼrí súm woo shooy. Kù dzə̀ sá mo Nyùy shéʼri wír ve á yii vinyo ve ví wáa bòŋ wun.

⁸ Lóo dzə súm wo kóʼ kikwiíy shó, á nèn màʼày, wú kfə̀n ji kighin, wíy lo, á tòn tónen.

Ŋkàʼme Nyùy kù tíy fo ghán sidzə̀m

⁹ Ŋkàr ser, mo vèr fə̀m suuy bèn, kinyo ki yòʼ jívir ver kùm ven gheéy. Vèr kì ji vèn kù tíy kén a dzə̀ é vinyò ve ru ví, a dzə̀ vé wìr ve á wíy lùŋ.

¹⁰ Bó Nyùy yòʼ yii lóʼ wír. A bó yòʼ dzə̀ wù làysìn mo vèn rə́si lim e wùn kinyò. Wù yoʼ làysìn mo vèn koŋ wír ve dzəə̀n və́ adzə̀m, sə́ áwune. A vèn lim a dzə̀ fo wun réŋréŋ mo vèn kù yii, e shem lèn.

¹¹ Vèr ku nèn a kòŋ kér cáʼ ji vèn kú a tiy a dzə̀ é kinyò foo fèy, é wìr mòʼón mòʼón wáy ŋàŋ shó, e dù, e jòʼsì, e fíʼ wìy nəə́ e dzə̀ʼə̀m ye Nyùy kàʼàn ven, vèn tiír vifií shó.

¹² Lá wìr yòʼ a yiì ŋgòy. Vèn wáa bìʼnìn a dzə̀ wír ve á siìn fó mbìy, aá koóy ne ŋkàʼmé woo shooy, bìʼ fo vé‑eè dzə́, wáy shilív a dzə̀ e Nyùy wùn, leey fó mbìy ji nyaáŋ.

¹³ Vèn kuúmé kinyo ke Abraham ki. Nyùy‑iì kàʼ wun e kinyò, e lòo kàʼ, a kàn yír a dzə̀ yé wun woo Nyùy, bìʼ fo wìr wùmòʼ yòʼ‑oò dzəə̀n shó wo wù shaàn wun, é bo wù wáa kàn yír ŋgaàŋ.

¹⁴ Wù‑uù kàʼ jii, «M wíy bùʼ wò, e yiì, é rám yée wáa dzə e gháʼán.»

¹⁵ Abraham yú bey, e nèn wày vifií é ŋkàʼmé fèy, a leéy fó mbìy ji nyaáŋ, e nèn wìy lò, e kòóy ŋkàʼmé woo shooy.

¹⁶ Vèn kì sá ji wìr yii lóo lìʼ kinyo, wù wàa kàn yír kifa kímóʼ kí ke kí shaàn wun. Wù liʼ bèy, la wìr yòʼ dzə́ə a meŋnín ji wù yòʼ wíy yiì a kinyo ke wù kì kàʼàn.

¹⁷ A dzə̀ sá mo Nyùy‑iì kàʼàn Abraham, e kfə̀n lìʼ ji wón və́ ve á wíy siíy, a shìy ŋkàʼmé woo shooyi wáa kiíy kijuŋ a ji bó yòʼ dzə̀ wun kùvsín kinyo ke wun‑eè sìysìn ji wun wíy yiì.

¹⁸ Mo wù‑uù kàʼàn, e kfə̀n lìʼ, vinyo vìn vi nén a dzə vibaà ve bó yòʼ dzə̀ ví shaà fó ghaŋ, bìʼ fo vinyo vee shoon vi fəən a dzə̀ fo Nyùy shuù, a bó wù yòʼ yii bóʼti kimboʼtì. Kí nén a lùmèr melív mèsən ve á nəən ne e Nyùy sar, ji á fíʼ lùŋ vìn, á wáa ghar ŋkàʼmé və kitávín, a leéy a dzə̀ fó mbìy.

¹⁹ Mo vèsən sí shiy ŋkàʼmé a dzə̀ fo Nyùy, melív mèsən mè nén a neŋ ji nyaáŋ, e làa yòʼ a buʼ. A vèsən kì kijuŋ ji vèsən wíy soorí raŋ, e nəə́ fo wù dzəə̀n,

²⁰ bìʼ fo Jesus nəən ne fo e vèsə́n mbìy, a wù dzə́ wùn Nyùy lèn ji taà cù wòsən wo kùʼùn wo wù dzəə̀n moo *Melkisedek, lón fo vèsən ghán sidzə̀m, e dù, e mày.