Hibru 3 - ŊWÀʼ NYÙY

Kinyo ke Wàn Nyùy ki shaà ké Mooser

¹ Afə̀r vem, mo vèn siìn wír Nyùy, a lì wun ven ji və́ vee wír, vèn kú a kuumé wír wo dzəə̀n Jesus. Dzə̀ wun wo Nyùy‑iì tumen, wù wáa dzə taà cù wòsən wo kuʼùn fó kinyò ke Nyùy ke vèsən tíy sho.

² A wù‑uù lo lìm fo Nyùy wo wù‑uù tumen wun shilív shimòʼón, réŋréŋ mo Mooser‑iì lim e Nyùy lav shilív shimòʼón.

³ Yii bèy, a kinyo ke Jesus ki kùʼ feyì, e shaà ké Mooser, réŋréŋ mo kinyo ke ŋgaà lav ki yii kuʼ, shaa ké lav ye wù bàʼrìn.

⁴ Vèn kì sá jii, a dzə̀ kù bàʼrì wír lav, yii bèy, a Nyùy bòm kfə́ vifá vidzə̀m.

⁵ Mooser‑iì ló a lìm rú e Nyùy lav shilív shimòʼón ji wír wo Nyùy lèmèn, wù wáa lìm lìmèn é lav foo fèy. A vinyo ve wù‑uù yii vi‑iì din a dzə̀ ve Nyùy‑iì dzəə́ wìy a yiì.

⁶ Kristu nèn wìy wìy, a lìm kfə́ e Nyùy lav foo fèy shilív shimòʼón moo wán woo ŋgaà lav, a lav dzə̀ vèsən vin. Dzə̀ rú vèsən, a vèsən bèn ghár shilív, tiir vifií a dzə̀ é ŋkàʼmé wo Nyùy‑iì kàʼàn vèsən shó, e dù, e mày.

Lá wìr yòʼ a ŋway kinyo ke Nyùy

⁷ Vèsən ku nèn yuùrí kinyo kímóʼ kí ke Kiyoy ke Ranén kí‑iì suuyin jii: «A vèn yù, a Nyùy yoŋ ven lán,

⁸ lá vèn yòʼ ŋwày ŋwáyín mo atàr véné‑eè ŋwayin é kirə̀ʼ ké woʼ kí, e kishiíy ke vé‑eè sə́ kóy wùn à Nyùy, mum wun.

⁹ Nyùy suuy jii, ‹Atàr véné‑eè ghán fo, kiyá mkweè, mum mo, aá kù yén vinyo ve ghaʼtín ve mò‑oò yii.

¹⁰ M nèn shwìíy kilòŋ fo wír vee shooyi, e sùúy jii, melív mev mè yòʼ tíy e mǒ wùn gheéy, aáwune tén fó a yu kinyo kém.

¹¹ Wún wómé nèn kìn, m lìʼ jii, bó yòʼ dzə̀ féyì áwune wìy nə̀ə́ e mǒ kirə̀ʼ ké meèmè.› »

¹² Afə̀r vem, vèn wáa yen rì fo wìr fo vèn wáa ker shilív she bi shí wùn Nyùy, a ŋway kinyo kfə́, é shí yii, é wù maʼay Nyùy woo rú.

¹³ Ke vèn wáa yiì ki dzə̀ jii, wìr wáa tir a fə́r və fo mensə́ mè bóʼtí wun, é wù wáa yiì vinyo ve bi ví, a ŋway Nyùy ŋwáyín. Wù kú a tir kishiíy kidzə̀m, bìʼ fo lèn kù dzə̀ə́ kishiíy ke á yoŋ e Ŋwàʼ Nyùy ji lán. A dzə̀ lán wo dzə̀ á yù jí Nyùy.

¹⁴ Kifá ke Kristu kér kidzə̀m ki sì sá késən, a vèsən fèn tíy a dzə̀ é kinyò ke vèsən‑eè wayin shilív shó fo mbìy, e dù, e jòʼsì.

¹⁵ Vèn ku nèn a kuumé kee jii: «A vèn yù, a Nyùy yoŋ ven lán, lá vèn yòʼ ŋwày ŋwáyín mo atàr véné‑eè ŋwayin é ghan se vé‑eè sə́ kóy wùn à Nyùy.»

¹⁶ Mo vé‑eè saŋen bey, bo wír ve á yoŋ ji vé‑eè yù jí Nyùy, a sə a dzə̀ kóy vìne dzə̀ ala? Kù dzə̀ wír ve Mooser‑iì liìn fó wòŋ Ejiv, a fəə sho.

¹⁷ A wír ve á yoŋ ji Nyùy‑iì shwìíy kilòŋ fó fo kiyá mkweè vìne dzə̀ ala? Kù dzə̀ áwune vee shooy ve vé‑eè rə́si yii vinyo ve bi ví, Nyùy yúyrí áwune, e màʼrì dzə́n sí é kwaʼ.

¹⁸ Mo wù‑uù liʼ ji bó wìr yòʼ dzəə́ wìy nəə́ e wùn kirə̀ʼ ké meèmè, wù‑uù lìʼ a dzə̀ ala? Wù kù‑uù lìʼ a dzə̀ áwune ve vé‑eè táv kitú vìn.

¹⁹ Vinyo vìn vi nén a dìn jii, vé‑eè ràn vijuŋ vee shooy, bìʼ fo áwune yòʼ‑oò lo wày shilív e Nyùy wùn, a yu fo fo.