Hibru 2 - ŊWÀʼ NYÙY

Lá wìr yòʼ màʼày kinyo ke Wàn Nyùy

¹ Mo Wàn Nyùy shaàn vifá veé yuv vidzə̀m, vèsən ku nèn màysì, e wày vifií é kinyò ke vèsən‑eè yuun fo wun, fó bìn e dzəə ye sən.

² Vèsən kì ji kinyo ke nshèelav se Nyùy si‑iì tiísi fo ŋgùʼ kí‑iì ló a dzə rú, a kí‑iì dzə̀ á kitávín. Wìr‑iì tén kinyo kee shooy, fə́m shóʼor kimòʼón, Nyùy kù màʼ ŋgeʼ sho mo nsər‑iì dzəə̀n.

³ Mo kí dzəə̀n ben, vèsən kfən lò, a meŋ kiŋgaʼnìn ke kinyò ke yiìn Wan Nyùy ji vèsən fiʼ lùŋ, bo dzə̀ vèsən yèe, e bóo bòy fo ŋgeʼ? Kù‑uù tòmbìy, a fìʼtì wun woo Taàtá wòsən Jesus Kristu kinyo kìn, é bo wír ve vé‑eè yuuné wáa fìʼtì, é vèsən wáa kiíy sa mo kí dzəə̀n.

⁴ A Nyùy‑iì lo dìn sa ji vinyo ve áwune fiʼtì vìn vi dzə̀ á rú, bìʼ fo vé‑eè lóo fìʼtì, wù wàa yiì, á wàa yiì viŋgaʼnìn ve vinyò ve dzə̀ ví dìn vitaáví və́, wíri wàa yen, a ker gháʼ. Wù kfən yiì, Kiyoy ke Ranén kí bùʼ wír və́, á wáa yiì vinyo e dzə́ə sí dzə́ə sí, mo wù bùʼùn ŋgaàŋ.

Kinyo ke Wàn Nyùy ki dzə̀ luŋ yee là may

⁵ Vèsən yoŋ ji wíri wíy lùŋ, aá wíy lùŋ a dzə̀ é ndzə ye yì dzəə́ wìy a wìy. A bó Nyùy yòʼ‑oò lo lèm nshèelav sə́ ji sí wìy a saʼ ndzə yee shooy gheéy.

⁶ Vé‑eè lo dìn kinyo kìn mo vé‑eè saŋen é kirə̀ʼ kímóʼ kí, a suúy e Nyùy jii: «Wìr msòŋ á ka, é bo à wáa leéy, a yen, wan wìr fo wan wìr, é bo à wáa geʼsín sho?

⁷ Wò‑oò dzə̀ʼə̀r wun, e bèr ŋkèʼ rə shishàr fo nshèelav sé si, e bùʼ wun e vikuʼùy ví wùn à ghvə́me,

⁸ e fò wun vitaáví, vifá vidzə̀m vi wáa dzə e wùn sar saʼ.» Mo vé‑eè suuyin ji Nyùy wày ne vifá vidzə̀m a dzə̀ e wìr kiwo, bo bó kímóʼ kí yòʼ dzəə́ bér fo wù wáa saʼ gheéy. Yii bèy, lèn və̀n, a bó vèsən yòʼ sí yén, a wìr sáʼ vifá vee shooy.

⁹ Ke vèsən yén lèn ki dzə̀ Jesus wo wù sáʼ vifá vìn vidzə̀m. A Nyùy‑iì lo lèm wun fo nshèelav sə́ sí mbìv tsə̀n e bǎm shintàm. Wù‑uù lèm bey ji Jesus kpú á fo wìr dzə̀m mo wun woo Nyùy‑iì shamen áwune, e sìysì. Wáa dzə lèn, a Nyùy búʼ ne wun, e fò vitaáví vé saʼ sho ji á wáa ghvəm, a yu fo fo, bìʼ fo wù‑uù biimen ŋgeʼ, e kpù fo wíri.

¹⁰ Vinyo vidzə̀m vi dzə̀ a dzə̀ e Nyùy kiwo, a sìysì wun, ví wáa lìm mo wù taʼà. Mo wù‑uù taʼ ji wun wìy lì wír ve dzəə̀n wón və́ adzə̀m, e wày e wùn mvə̀m vijùŋ, kí nen ghèén feyì mo wù‑uù sìysìn ji Jesus ku wìy, e yèn ŋgeʼ, e fíʼ gheén e wìr wo dzə̀ wù shèm mbìy wìr vee shooy, e dànèr e dzə̀ʼə̀m yee là may.

¹¹ Wùn à Jesus wo wù yii, aá gheen ji wón Nyùyi nén a ker Tàr wov e mòʼón, a dzə̀ Nyùy. Á kinyo ke kí‑iì yiìn, bo Jesus wáa yòŋ áwune ji afə́r və́, e làa yòʼ a dzə̀rkìr.

¹² Wù‑uù sùúy e Nyùy e ghan símóʼ sí jii: «M yíi a fèr kinyo ke à yii, aàfə́r vémé, a burí wò e mvə̀m kintatì ke wìr Nyùy.»

¹³ Wù kfən sùúy jii, «M yíi a yòy, a tiír a dzə̀ e Nyùy wùn,» e bóo kfə̀n suúy jii, «Mo və̀ne, vèr à wón ve Nyùy foon e mòó.»

¹⁴ Wù wáa suúy bèy, a wón və́ vin adzə̀me kù dzə̀ wíri, aá kér wún, kér mensə́ mo wíri yii kérí. Wun woo Jesus nèn lì wún a dzə̀ wó wìr, e bìnkìr a dzə moo áwune ji wun fíʼ kpu, e ndzəə̀r vitaáví vé Satan ve dzə̀ wù lì wír wo wù sí kpú sho.

¹⁵ Wù nèn kpù, e fíʼ tin wír fo vikwàn ve vé‑eè lim e Satan kiwo, bìʼ fo vé‑eè dzə́, fan ghán se á wíy kpukír sìn.

¹⁶ A bó wù yòʼ kpú bèy ji wun sə̀ á nshèelav se Nyùy. Wù‑uù kpú ji wun sə́ a dzə̀ wír ve siìn rám Abraham.

¹⁷ Á kinyo ke kí‑iì yiìn, é bo wù binkir, a dzə réŋréŋ moo afə́r və́, e fíʼ a dzə ŋgaà wov cù wo kuʼùn, a sham áwune, a lìm fo Nyùy shilív shimòʼón, e taŋrí áwune, é Nyùy laysin ajay vév.

¹⁸ Mo wù‑uù yenen ŋgeʼ, vinyo vi mùm wun vinín, wù nèn kìíy mo dzə̀ wù sə̀ wír ve vinyo vi mum sa áwune.