Hibru 11 - ŊWÀʼ NYÙY

Mo dzə̀ wìr wày shilív e Nyùy wùn, a yu fo fo

¹ Wìr yii wáy shilív e wìr wùn, ŋgaàŋ kaʼ wun e kifa, wù nèn a leéy a dzə̀ fó mbìy, a kiíy ji wun kù wíy a ker a kíwun, e kfə̀n a kiíy kijuŋ jii, kifá ke wun yòʼ fə̀m sí yén kìn ki dzə̀ rú á sho.

² A Nyùy‑iì ló a binsí wír vee fó ŋgùʼ ámóʼó ji wír feyì mensəʼ metàn, a dzə̀ bìʼ fo vé‑eè wáy shilív e wun woo Nyùy wùn, yú a dzə̀ fó fo.

³ Vèsən wáa dzə késən sá, aá kì mo Nyùy‑iì ghanen, e bóo bom ndzə, a dzə̀ bìʼ fo vèsən wáy shilív e wun wùn, biíme kinyo kfə́. A vèsən kì jii, Nyùy kù‑uù sùúy suuyín a dzə̀ á fo shuù, ndzə nèn a dzə. Kí nén a dzə ji vifá ve á yén lèn vìn vi kù‑uù lò a dzə̀ á fo ve bó á yòʼ yén vi.

⁴ A kù dzə̀ sá mo kinyo ke Abel wùn Keen ki‑iì dzəə̀n. Abel‑iì cù Nyùy e dzəə yee réŋ, e shaà Keen, bìʼ fo wù‑uù cu kfə́, wáy shilív a dzə̀ e Nyùy wùn. Nyùy nèn biìmé wun, e lì ji wír woo là jay. A wù‑uù lo dìn rú bey, bìʼ fo wù‑uù səən rə́ yee cu. Abel kpú, yii bèy, a kinyo kee mo wù‑uù wayin shilív e Nyùy wùn kí kù dzəə́ yéʼey vèsən, e shem lán.

⁵ A kù dzə̀ sá mo Enok‑iì dzə́, wáy shilív a dzə̀ e Nyùy wùn, wù nèn wìy lò, e lì wun e yuv e tin. Wù kù‑uù sàsìn, e lày làyìn, la á yòʼ dzəə yèn, bìʼ fo yì‑iì liìn Nyùy wun. A vé‑eè sàŋ é Ŋwàʼ Nyùy jii, Enok‑iì sí dzə́, a Nyùy shéʼri liì və, e bóo wìy lì wun e yuv.

⁶ A bó yòʼ dzə̀ Nyùy wàa sheʼrí wír, a bó ŋgaàŋ wáy shilív e wun wùn, bìʼ foo, a wìr taʼ ji wun kóʼtí e Nyùy ghaŋ, wù kù biìmé ji Nyùy dzə̀ rú shó, e kfə̀n biìmé sa jii, wù yii laáme wír wo wù taʼ wun, a ŋgaàŋ yén wun.

⁷ Noa wáa dzə sa, a wù‑uù wày shilív e Nyùy wùn féyì, Nyùy tír wun fo kinyò ke kí‑iì wíy koóy, a bó wù yòʼ fə̀m sí yén kisəəm, wù ku nèn biìmé, a yiì mo Nyùy suuyin. Wù‑uù bàʼrì lúm kikoŋ ji wùn à kfə́ə rəə́ nəə́ shó, e fíʼ wìy bòy fo ndzəv. Mo kù‑uù yuun wun ntir Nyùy rə̀n wùn mòʼón, wù nèn a dìn ji kibér ke wìr veé ndzə adzə̀m ki kù‑uù sì wír ve bií. Nèn a dzə wun woo Noa wo Nyùy‑iì liìn ji wír woo là jay, bìʼ fo wù‑uù wayin shilív e wun wùn.

⁸ Abraham wáa dzə, a wù‑uù wày sá shilív e Nyùy wùn, wù ku nèn yiì kinyo ke Nyùy‑iì yòŋèn wun, e sùúy sho ji wù lo fo wù dzə́, e dù e wòŋ wúmóʼó, a dzə̀ wo wun wíy fo ji və́. Abraham yú bey, e kù nèn a dù, a bó wù yóʼ ne kìíy fó.

⁹ Wù dù, e mèé fo, a dzə̀ woŋ wo Nyùy‑iì kàʼàn ne ji və́, a bar barín moo kiŋgwìy, e kù yòʼ a dzə fo, a yu a dzə̀ fo Nyùy. A wù ghán fo, shiiy a dzə̀ é tàv wùn wan və woo Aysi, é bo Jakov woo wan Aysi kfən wìy sìíy, a shiíy réŋréŋ bey. Á wáa ghan bèy, a Nyùy kfə̀n‑eè kàʼ sá wón Abraham vìn e woŋ woo shooyi.

¹⁰ Abraham kú a shiíy a dzə̀ é tàv, e làa yòʼ a ci, bìʼ fo wù‑uù leey a dzə̀ fó mbìy, shiy ji wun wìy nə̀ə́ e laʼ a dzə̀ ye bàʼrìn Nyùy e kitu ke kinsə̀ŋ, a wáy wun woo Nyùy.

¹¹ Sara wáa dzə, a wù‑uù wày sá shilív e Nyùy wùn, Nyùy nèn yiì, wù tiím bvəm, a ghán sə́ sí‑iì bàŋrìn ne se dzə̀ wù kfə̀n dzə̀ə́. A Nyùy‑iì yii bèy, bìʼ fo Sara‑aà yú kfə́ a dzə̀ fo wun wo wù‑uù kàʼàn wun e kinyò fèn.

¹² Kí nèn kòóy ji rámé‑eè lò, e fəə̀ fo lum və woo Abraham bvə̀m, a dzə e nín moo mejiy meé yuv, e kfə̀n a dzə moo síy seé ghaa ndzəv. A lum və və̀n‑eè dzə̀n ne, á wáa yen ji bó yòʼ dzə̀ wù dzəə dzə̀ə́.

¹³ Wír vìn adzə̀me‑eè ló a dzə, a bó á yòʼ‑oò lo kòóy vifá vidzə̀m ve Nyùy‑iì kàʼàn áwune shó, e wìy a kpukír, aá kù wáy shilív a dzə̀ e Nyùy wùn. Yii bèy, a vé‑eè ló a yen vinyo vee shooy, a ví dzə̀ə́ kwaʼda, a sheʼrí, a yòŋ vitú vév ji áwune kù dzə̀ á viŋgwìy, aá bee beèn é nsay fèn.

¹⁴ Mo vé‑eè suuy bèy, bo dzə̀ ji vé‑eè shaa shaàn, taʼ láʼ yév dzə.

¹⁵ A bó áwune yòʼ‑oò shaa, du bèy ji á kfə́n e wòŋ fo vé‑eè loòn. A vé‑eè taʼ, e kfən e bàm, bo vé‑eè ló a ker dzə́ə yée kfən sho.

¹⁶ Ke kí dzəə̀n kí dzə̀ jii, áwune‑eè taʼ a dzə̀ á woŋ wo wú shaàn woo fen, a woo shooyi dzə̀ woó yuv. Mo vé‑eè sí yú a dzə̀ fo Nyùy, bo bó yòʼ‑oò dzə̀ wù wàa woomé fo áwune wáa yòŋ wun ji Nyùy wov. A dzə̀ á wàa yòŋ, bìʼ fo wù‑uù lo nàŋsín rú láʼ, e lèm aáwune.

¹⁷ Mo Abraham kù‑uù sí wáy shilív a dzə̀ e Nyùy wùn, Nyùy wìy lò, e mùm wun, wù ku nèn biìmé. Wun woo Abraham wo Nyùy‑iì kàʼàn ji wù wíy a ker rám nèn lì wán və woo Aysi ji wun sí cu a Nyùy sho.

¹⁸ A dzə̀ wán və woo shooy wo Nyùy‑iì suuyin e Abraham jii, «Á wíy a kiíy rám yé, a dzə̀ fo wan wò woo Aysi.»

¹⁹ Abraham wáa yiì bèy, a dzə̀ bìʼ fo wù‑uù yén ji dzə̀ Nyùy fə̀ə́r á wán woo shooy fo kpu. Kí ku nèn kòóy, wáa dzə mo Nyùy fə̀ə́r Aysi və̀n fo kpu, e siìr e Abraham.

²⁰ Aysi wáa dzə, a wù‑uù wày sá shilív e Nyùy wùn, e nèn wìy lò, a suŋnín e wón və́ vee Jakov wùn Esaví kitu, a taŋ mo Nyùy wíy siíy, e bùʼ áwune.

²¹ Jakov wáa dzə, a wù‑uù wày sá shilív e Nyùy wùn, wù wìy lòo kpu, e nèn a suŋnín e wón wan və woo Jooseví kitu, a taŋ mo Nyùy wíy siíy, e bùʼ áwune. Wù wáa taŋ bèy, a wù tóm mbàŋ rə, e gvə̀ʼə́m e kitu wo, a fo ghvə́m e Nyùy.

²² Joosev wáa dzə, a wù‑uù wày sá shilív e Nyùy wùn, wù wìy lòo kpu, e nèn a tir kpú, a suúy ji wír veé Israyi wíy siíy, e fəə a fo wòŋ Ejiv fèn. Á wíy lóo fəə, á lì á dzə́n rə́, a dù sho aáwuné wòŋ.

²³ Á wìy dzə̀ə́ Mooser, tàr wov wùn yè wov wáa dzə wír, a vé‑eè wày sá shilív e Nyùy wùn. Á nèn tèn sáʼ ye fòn‑eè saʼan ji á yúyrí wón vee vilum adzə̀m, e lì kév wán və̀y, a wù bóŋ é ŋàŋ, e lìtì e lav. Wù wáa dzə fo e bǎm ŋwee e taár, la á yòʼ a fàn sáʼ fòn gheéy.

²⁴ Mooser wìy kùy, a wù wáy shilív sá a dzə̀ e Nyùy wùn, wù nèn tèn fo á wáa yòŋ wun ji wan wàn Farao.

²⁵ Wù kàŋ kfə́ ji kí bòŋ a ji wun wáa yen a dzə̀ ŋgeʼ wùn à wír ve dzəə̀n vé Nyùyi, e shaà fó a way kiwó e kinyò ke bi kí ji wun wáa yu vijuŋ, a bó yòʼ dzə̀ ví tìytíy.

²⁶ Wù‑uù yén kfə́ ji ŋgeʼ se dzə̀ wun wàa yen wùn à wír véví, a shìy Mfə̀ə́r wo Nyùy‑iì kàʼàn áwune shó, si bòŋ fo wun, e shaà bùʼ woó wòŋ Ejiv e dzə̀m, bìʼ fo wù‑uù leey kfə́ a dzə̀ fó mbìy, shiy və́ vee vikuʼùy a dzə̀ ve wíy fo Nyùy.

²⁷ Mo wù kù‑uù wáy kfə́ shilív a dzə̀ e Nyùy wùn, wù nèn lò, e fəə̀ fó wòŋ Ejiv foo fèy, e làa yòʼ a fàn kinyo ke yì‑iì dzə̀ fòn yiì e wun, a wù fə̀m‑eè shwiiy kilòŋ moó le. Wù ku nèn a dù kfə́ dúun, e làa yòʼ a leéy bám, wáa dzə mo ghán wùn Nyùy, a wù yén Nyùy wo bó á yòʼ yii shóv e si.

²⁸ Wù ku wày shilív e Nyùy wùn bey, e kù nèn tìír vifií é kinyò ke Nyùy‑iì suuyin ji á wíy yiì e kishiíy ke nshìylav rə wíy a shaà e wòŋ Ejiv, a yuyrí wón mbìyi fó melav. Wù suúy, wír veé Israyi wáŋ mensə́ me nyàm aáwuné shuù se melav, nshìylav Nyùy rə̀y nèn wìy, a yaʼáy, a shaà.

²⁹ Wír veé Israyi wáa dzə sa, a vé‑eè wày shilív e Nyùy wùn, e nèn tùm Rìbà Ndzə̀v wo Baar, aá ghán a dzə̀ é nsay fo meyumér. Wír veé Ejivi siíy, e wìy kév, a bìʼnìn ji á túm sa sho, yí kuúy áwune.

³⁰ Áwune wìy dù, e mèé e Jeriko, e kù nèn wày shilív e Nyùy wùn, a yiì mo wù suuyin. Vé‑eè ghàn, e kaàrí ntèʼ yee shooy kishiíy saàmbà, kay ye vé‑eè bomen, e kaàrí fó sho e tàrí nèn keèsì, á nəə́, e tòn fó.

³¹ Wiíy wùmòʼ wáa dzə fo, a dzə̀ sàkì, aá yoŋ ji Rahav, vé ŋkiyi wìy wìy e Jeriko, wù səə́sí, e lìtì e wùn lav. Á wìy tòn fó, wù nèn bòy, e làa yòʼ dzə́ə kpu moo kibér ke wìr ve vé‑eè méŋ Nyùy, táv kitú, á yúyrí.

³² A m yòʼ lò ji m táŋ wír ve vé‑eè wáy shilív e Nyùy wùn vin adzə̀m, m tàŋ é le? Bó ghán sí yòʼ dzə̀ se dzə̀ m lò, e rə̀sí, a ŋeèvì vinyo ve wìr vee moo Gidiyon, Barak, Samson, Jefta, kìn vé Davir wùn Samuel, aàŋgàa ntum Nyùy ámóʼó.

³³ Wír vìn adzə̀me‑eè wày shilív e Nyùy wùn é ŋàŋ, ámóʼó lo, á nèn a tòn vitúm, ámóʼó wàa dzə aŋgàa saʼ, a neèr sáʼ a dzə̀ yee là kiloʼ. Wír vìn adzə̀me kù‑uù dzə́, shiy a dzə̀ Nyùy, e nèn wìy kòóy kifá ke wù‑uù kàʼàn áwune shó. Ámóʼó wáy shilív e Nyùy wùn ji dzə̀ á wù sə̀tí shuu se abvərə̀ʼ fo á kfə́r áwune, wù nèn sə̀tí.

³⁴ Wù kfən ndzə̀mér və́y wo wú‑uù beéme fo wú ton ámóʼó. Wù téʼtín ámóʼó fo á lémkír é shùu rər, e tàvír anjoó, á kfə́n ji antav. Wìr lo, wù tàm shúu rər e fur wùn mòʼón, e jùm wír vee shooy adzə̀m.

³⁵ Vikìy ámóʼó wáa way shilív e Nyùy wùn ji dzə̀ á wù fə̀ə́r wír vév fó kpu, wù nèn a fətí. Wír ámóʼó wáa biimé kév a dzə̀ kpú, bìʼ fo vé‑eè kiìn ji Nyùy kù wíy fəə́r áwune, aá wáa ker dzəʼə̀m ye yí shaàn yeé nsay fèn. Vé‑eè táy áwune, nyavrì sho, a bó yòʼ‑oò dzə̀ á shàʼnín Nyùy ji á fíʼ màʼtì áwune gheéy.

³⁶ Wír ámóʼó biímé, á wáa dzə̀v áwune, a caàcà, wíri wáa kèŋ. Ámóʼó wáa dzə kév ve vé‑eè kúr aàsháŋé, finrì e lav.

^37-38 Vé‑eè yúyri ámóʼó e tíyí, tóʼ ámóʼó tóʼón e sòó, shóʼti vitú ve ámóʼó e nyùy sí. Á kfə́n a jùm ámóʼó, á wáa jan janén é kwaʼ, a shiíy e sar se vilan wùn ǎ mbvə̀ʼ si, a kur a dzə̀ júv se bvəy wùn à sé njiì si. Vé‑eè dzə wúu yév, nyavrì aáwune, aá yén ŋgeʼ, a liì wov‑iì bòŋ, e shaà woó ndzə fèn, la ndzə yòʼ ghèén ye dzə̀ áwune wàa dzə sho gheéy.

³⁹ Mo wír vìn adzə̀me fə̀m‑eè wáy shilív e Nyùy wùn é ŋàŋ, a wù bínsi vinyo vév, bó á yòʼ‑oò sí yén mo Nyùy‑iì wíy ghan, é bo á nəə́ é vijùŋ ve wù‑uù kàʼàn áwune shó.

⁴⁰ A Nyùy‑iì yiì ji áwune kú a shìy shìyìn bey, bìʼ fo wù‑uù sìysìn ne kinyo ke dzə̀ kí sə̀ vèsən áwune, e shaà. Wù‑uù taʼ ji wun wìy tàtí vèsən áwune wír adzə̀m, e màn ajay vesən, aá gheén ji wír və́ ŋkuuŋkùŋ.