Hibru 10 - ŊWÀʼ NYÙY

Ntàŋri Jesus ghèén fo wìr dzə̀m

¹ Ntò se cù se Mooser‑iì wìyìn shó si kù dzə̀ cáʼ ji vimfìʼìr ve vinyò ve ru ví ve ví‑iì dzəə́ wìy a wìy, a ví kù din a dzə̀ vinyo vee shooy ji ndzə̀vrì ndzə̀vrì. Aá kù nèn rə́si kwaŋrì antàŋrí kiyá mo kiyá ki‑iì dzəə̀n, a bó antàŋrí vee shooyi yòʼ sə́ wír ve á koŋ, e yen Nyùy, aá gheen mo dzə̀ á yèn wun.

² A dzə̀ ji antàŋrí víne‑eè yii, a wíri rán fo áwuné ajay, bo bó melív mev mè yòʼ kì dzəə́ sáʼ áwune fó vinyò vímóʼ ví gheéy, é bo á kfə́n a kwàŋrì vinyo vév, é kifá kímóʼ kí wáa dzə ji ntàŋrí.

³ Ke kí dzəə̀n kí dzə̀ jii, antàŋrí ve á táŋri kiyá mo kiyá ki‑iì dzəə̀n víne kù yii yii, a wíri kuúme a dzə̀ á vinyo ve á rə́si jáyí.

⁴ A kí dzə̀ bey, bìʼ fo bó yòʼ dzə̀ féyì, mensə́ me nàʼ wùn à me bvəy mè yiì, wìr ràn fo wùn vinyò ve bi ví.

⁵ Á kinyo ke kí‑iì yiìn, bo Jesus Kristu lóo wìy e ndzə fèn, e sùúy e Nyùy jii: «Bó à yòʼ kér shií é nyàm se á seéri, cu wò sho ji ntàŋrí, kìn é fómo wùmòʼ. À nen nàŋsín a dzə̀ wún wo dzə̀ m lì, e yiì ntàŋrí shó.

⁶ A bó à yòʼ koŋ nyám se á ton, cu wò sho, kìn se á seéri ji à fíʼ làysìn jay wìr.

⁷ M nen biìmé jii, ‹Eè Nyùy, mo və̀ne. M dzə̀ kibáʼtín fó yiì kinyo ke à sìysìn, réŋréŋ mo vé‑eè saŋen é Ŋwàʼ Nsər ji m wíy yiì.› »

⁸ Jesus‑eè suuy bèy, a vinyo vi dzə̀ shó vibaà. Wù‑uù tòmbìy sùúy ji Nyùy yòʼ yén a nyám se ntàŋrí se á seéri ji wù laysin ajay wìr, kìn se á ton tònèn, cu wun sho. Mo *Nsər Mooser fə̀m suuy ji á wáa yiì bèy, kí yoʼ ghèén fo Nyùy.

⁹ Wù nèn kfə̀n sùúy e Nyùy jii, «Mo və̀ne, a m dzə̀ kibáʼtín fó yiì kinyo ke à taʼ ji m yii.» Mo Jesus suuyin vinyo vee vibaà vin, bo dzə̀ ji wù laàr ne antàŋrí ve wù kì yòŋèn fó mbìy vìy, e neèr a dzə̀ ntàŋrí wo wíy yiì wun.

¹⁰ Wù nèn wìy, e yiì kinyo ke Nyùy‑iì taʼ ji wù yii kiy, e fò kitú, e kpù fo wíri. Kí ku nèn ghèén kàŋ mòʼón bèy, e nàŋsín vèsən ji wír Nyùy.

¹¹ A ké atàá cù veé *mensàŋ me mvə mè ki dzə̀, a vé‑eè rə́si tíy kév vishiíy vidzə̀m, táŋri antàŋrí, a bó yòʼ dzə̀ féyì antàŋrí vee shooyi yiì, wìr ràn fo wùn vinyò ve bi ví.

¹² Kristu kù‑uù tàŋrí və́ə woo ntàŋrí kàŋ mòʼón, wù ku nèn ghèén mo dzə̀ wù wàa sù ajay wíri ghán sidzə̀m. Wù yiì bèy, e kù nèn dzə̀ʼə̀m e Nyùy koy yìyí,

¹³ fo wù dzə́ lèn, shiy e meé e ghan se Nyùy wíy neèr aŋgaà və́ vibàn e wùn si, é wù tiír wuú rə́ shó moo kibur.

¹⁴ A kí dzə̀ jii, Kristu kù‑uù tàŋrí ne ntàŋrí e mòʼón cáʼcáʼ, wù ku nèn a yiì ghán sidzə̀m ji wír ve Kristu li ji vé Nyùyi wáa gheén fo Nyùy ŋkuuŋkùŋ.

¹⁵ A Kiyoy ke Ranén kí din e vèsən sá ji kinyo kee shooy ki dzə̀ á bèy. Wù suúy fómóʼó jii:

¹⁶ «Ghán sé mensàŋ me mvə mè si wíy shaà, é mensaŋ me m gwar vèr à wír veé Isray mè wáa dzə jii, m wíy way nsər sém aáwuné meliv, e kfə̀n way aáwuné vifii.»

¹⁷ Kiyoy ke Ranén kí kfən sùúy ji Nyùy suuy a jii: «M wíy a làysìn ajay vév wùn à vinyo vév ve bi ví, e làa yòʼ dzə́ə a kuumé gheéy.»

¹⁸ Nyùy wáa suúy bèy, bo dzə̀ jii, a làysìn wun vinyo ve wìr, a wù láysín ne, bo bó ntàŋrí wo ŋgaàŋ kfə́n a taŋrí, é bo wù laysin, yòʼ waà dzə̀.

Wír Jesuse wáa koʼtí e Nyùy si

¹⁹ Afə̀r vem, mo mensə́ me Jesus mè‑eè leemen bìʼ vèsən, wáa dzə ntàŋrí wo gheenén, vèsən nén a dzə lèn, a dzə̀ á shaà fo Nyùy kikìkìŋ tìítiy.

²⁰ Jesus‑eè tiìné ne ndzə̀y se sí‑iì ràŋèn kikìkìŋ ke Nyùy kìn, e mvə̀ʼ dzə́ə lèn, vèsən tósín, e dù yèn Nyùy, e lùŋ. A raŋ ye Jesus‑eè tiinen rə́ne dzə̀ wún və́ wo wù‑uù foon, e kpù fo vèsən.

²¹ Mo vèsən sí kér taà cù wòsən wo kuʼùn wo wù leey fo kfə́ə Nyùyi e dzə̀m,

²² vèsən ku nèn wày shilív e wun wùn, a beè a dzə̀ wun, a koʼtí e Nyùy si shilív shimòʼón. A dzə̀ vèsən wàa koʼtí bèy, bìʼ fo Jesus suùn ne melív mèsən, mè rán, a bó mè yòʼ dzəə́ sáʼ vèsən fó kinyò kímóʼ kí gheéy. Wù kfən sù wún wósən e mendzə́v me dzəə̀n me juŋ mè.

²³ Vèsən ku nèn màysì, e tìír vifií é ŋkàʼmé wo vèsən fiʼtì ji vèsən kù wíy lùŋ ŋkuuŋkùŋ. Lá vèsən yòʼ a tùʼtìn, bìʼ fo vèsən kiìn ji Nyùy wo wù kàʼàn vèsən é kinyò fèn dzə̀ á wù kù yiì kíwun.

²⁴ Vèsən ku nèn a tàʼ a dzə̀ dzə́ə ye yì wáa lùmèr melív mèsən, aá wáa kòŋnìn, a yiì vinyo ve juŋ vi.

²⁵ Vèsən kú a tarnín ghán sidzə̀m, e làa yòʼ a màʼày kintatì mo wír ámóʼó yii. Wìr kú a tir fə́r və, a lùmèr shilív sə́, a kuumé ji ghán se Taàtá wòsən Jesus wíy kfən si sì á fo mentsə̀m.

Lá wìr yòʼ a kay ntàŋri Jesus

²⁶ Vèsən dzə̀ wír, aá kìíy ne kinyo ke dzəə̀n ke ru kí. A wìr lò, e kfə̀n màʼày kinyo kee shooy, e kù a yiì a dzə̀ vinyo ve bi ví e ŋgeʼ, wù wàa kiíy ji bó ntàŋrí wùmòʼ yòʼ dzə̀ shó wo dzə̀ á dzəə yiì, bo ŋgaàŋ rán fó vinyò foo fèy.

²⁷ Wù kù sí dzə́, fan a dzə̀ ghán se Nyùy wíy saʼ wun, e way e ŋgeʼ, bìʼ fo və́y wo ghaʼáné wíy tòn wír ve á ban Nyùy adzə̀m, aá bvə́ʼə́y.

²⁸ Vèn kì sá jii, a wìr‑iì shòʼór Nsər Mooser, wíri wáa tiy abaà, kìn ataár ve á yenen kinyo ke wù yiìn, bo nsaʼ kù kér a fó koo ŋgaàŋ, aá yúyrí féyì, là mendzən.

²⁹ Mo kí dzəə̀n bey, bo bó wìr wo wù leey kfə́ a dzə̀ Wan Nyùy ntéŋ yòʼ wíy a ker ŋgeʼ ye yì shaàn yee shooy feyì à? A dzə̀ wù kù a ker, bìʼ fo wù yii bèy, káy a dzə̀ kpú ye Wàn Nyùy‑iì kpuun, e bóo gwàr *mensaŋ me Nyùy liìn ŋgaàŋ ji və́ə woo wír. Ŋgaàŋ kfə́n a meŋ sa a dzə̀ Kiyoy ke Nyùy ke kí yii, a wìr kiiy mo Nyùy shám wun.

³⁰ A Nyùy kù wíy way ŋgaàŋ e ŋgeʼ, bìʼ fo vèsən kiìn ji wù‑uù lo sùúy a jii, «Kù wíy siìr mo ŋkfə́tír, a maʼ mo ŋgeʼ e wírí kitu.» Wù kfən sùúy jii, «Wun woo Nyùy Tàr wíy saʼ wír və́, e tinén a nsaʼ yev.»

³¹ Vèn wáa kiíy jii, a dzə̀ wìr kù a yàʼ, wúné wàa beemé, fó tiím e Nyùy wo wù gòʼòn kàŋ mòʼón si, é wù tínén nsaʼ ŋgaàŋ.

Nyùy sə́ wír ve á yú a dzə̀ fo wun

³² Vèn wáa kuumé ghán se vèn‑eè kèʼèn, a yen rán ye dzəə̀n yé Nyùy. Ŋgeʼ si‑iì kooy ven sinín, a vèn kù tíy vèn à Nyùy, la kinyo ki yòʼ a sə̀ʼ ven gheéy.

³³ Vé‑eè lo, á wàa koorí wír fo vèn, a shaà sho e wírí mvəm, á wàa kèŋ, a nyàvrì sho. Lo e ghan símóʼ sí, á koòrí wír vén, kibér ki wàa ghan fo bàm, a sham, á wàa kèŋ sa áwune.

³⁴ Vèn‑eè yii bèy, bìʼ fo vé‑eè rə́r mendzən fo vé sháŋ vee shooyi. Wíri‑iì lóo bàn ven, lóo faàsì vifá vén, vèn kù a biimé biimén, a sheʼrí, bìʼ fo vèn kiìn ji vèn kér vifá vén vímóʼ ví ve ví shaàn veé nsay fèn vìn, a bó yòʼ dzə̀ vee shooy vi wìy mày.

³⁵ Mo vèn sí yén ŋgeʼ sinín, tiir a dzə̀ Nyùy fo mbìy, vèn ku nèn a yiì bèy, bìʼ fo vèn kiìn ji wù kù wíy a sə ven, a dù duùn fó mbìy.

³⁶ Kí nen ghèén ji vèn li vinyo vidzə̀m ji weè, a yu a dzə̀ fo Nyùy ji vèn fíʼ a yiì a dzə̀ kinyo ke wù koŋè, é vèn nèn wìy nə̀ə́ e vijùŋ ve wù kàʼàn ven shó.

³⁷ A dzə̀ mo Nyùy‑iì suuyin jii: «Bèr shishàr, é wìr wo wù wíy wìy wáa wìy, a bó yòʼ dzə̀ wù ndzə̀y.

³⁸ Wír vém vee réŋé kù wíy a way shilív a dzə̀ e mǒ wùn, e wìy lùŋ. A bó yòʼ dzə̀ shilív shém shí wàa bòŋ fo wìr wo wù tsəʼtì wún é bàm.»

³⁹ Mo Nyùy fə̀m suuy bèy, bó vèsən yòʼ dzə̀ wír ve á tsəʼtì wún é bàm, e wìy nəə́ e kpu yee ŋkuuŋkùŋ, e lày. Vèsən dzə̀ késən, aá wày a dzə̀ shilív e Nyùy wùn, a kiíy ji wù wíy lùŋèr a vèsən.