Hibru 1 - ŊWÀʼ NYÙY

Wàn Nyùy tíy vitú vinyo vidzə̀m

¹ Yì‑iì dzə̀ fó mbìy, a Nyùy súŋnin aàtàr vesəné akàŋ anín e dzəə sí dzəə sí, a wù‑uù túm a dzə̀ aŋgàa ntum və́, aá tiísi.

² Wáa dzə lèn wo ndzə sí wìy a mày, wù nen tùm a dzə̀ Wán və, wù wáa tiisí kinyo kfə́ e vèsən. Dzə̀ Wán və və̀n wo wù‑uù foon vitaáví shó, wù bóm ndzə. Wù kfən lèm ji wù wìy yòv ndzə yee shooy e dzə̀m, a saʼ.

³ Wù dzə̀ ji kikúv ke wun woo Nyùy, a dzə kinyo kidzə̀m ji Nyùy, njaʼkìr réŋréŋ moo Nyùy. A dzə̀ wun wo wù kér ndzə e dzə̀m e wùn kiwo, súŋnin, bo yì wáa ker vitaáví, a lìm mo yì limè. Nén a dzə wun wo wù‑uù manen vinyo ve wìr veé ndzə ji á fíʼ ran fo áwuné ajay. Wù màysì, e nèn kòʼ é yuv, e dzə̀ʼə̀m e Nyùy woo Taà Vitu ghaŋ.

Nyùy kòʼór Wán və, e shaà nshèelav sə́

⁴ Mo Wàn Nyùy dzə̀ʼə̀mèn e Nyùy ghaŋ, wù kóʼór wun, e shaà nshèelav sə́ sidzə̀m. A kù dzə̀ mo yír rəə́ kùʼùn, e shaà yé nshèelav sidzə̀m,

⁵ bìʼ fo Nyùy yòʼ‑oò yiì ne sùúy e nshìylav rə yìmòʼ mo wù‑uù suuyin e Wan və jii: «À dzə̀ Wán wom, a m sì Tàr won lán.» A bó wù yòʼ‑oò yiì ne sùúy sa e yìmòʼ jii: «M wíy a dzə Tàr won, áà wáa dzə Wán wom.»

⁶ Wáa dzə e ghan se wù‑uù sí túm Wán və wo wù tíy mbìy vifa vidzə̀m ji wù wiy é ndzə fèn, wù kfən sùúy sho jii: «Nshèelav se wun woo Nyùy sidzə̀m si kù kér fó a gvəʼtí e si wo.»

⁷ A ke Nyùy‑iì suuyin kùm nshèelav sə́ kí dzə̀ jii: «Wun yiì, nshèelav sə́ sí wáa ghan moo shwér, e kfə̀n yiì, áwune vee aŋgàa lìm vəə́ wáa dzə moo kiliímé ke və̀y.»

⁸ Fo ké Wan və kí, wù suúy jii: «À dzə̀ Nyùy, a sáʼ yée kù wíy a tiy fo, e dù, e jòʼsì. À wíy a saʼ vifon vé kijuŋ feyì là kiloʼ.

⁹ Mo à sí koŋ a dzə̀ vinyo ve réŋ ví, ban yii ye bií, bo Nyùy woo Nyùy wò shòʼ ne wò, e yòʼ, à wáa yu vijuŋ e shaà awàʼ vé adzə̀m.»

¹⁰ Wù kfən sùúy kímóʼ kí, e yòŋ Wán və jii: «Tàr, wò‑oò sì fó mbìy. Bòm wò nsay, e tàm yúv e wó yée.

¹¹ Vifá vìn vi wíy mày, aà kù dzə̀. Ví wíy dzə̀n, e shèʼkìr moo ndzə̀y,

¹² áà kaárí moo kikúm, e shàʼàr, e siìr ve fíy vi mo á kùvsín ndzə̀y. Yii bèy, à kù wíy a tiy ké fo réŋréŋ, viyá viyá là may.»

¹³ A bó Nyùy yòʼ‑oò yiì ne sùúy e nshìylav rə yìmòʼ jii: «Dzə̀ʼə̀m e mǒ koy yìyí, a shìy ghán se m wíy neèr aŋgaà vé vibàn e wò si, áà tiír wuú yé sho moo kibur.»

¹⁴ Ké nshèelav se Nyùy ki nén a dzə ji ka? Áwune dzə̀ kév viyoy ve ví lim fo Nyùy, a wù túm áwune, aá ghán, sə́ wír ve á kù‑uù wíy lùŋ.