Hagay 1 - ŊWÀʼ NYÙY

Sáʼ Nyùy Tàr yee ji á baʼri lav rə, e siìr fo

¹ Wáa dzə e kiya ke kí‑iì meen ji baà, mo Darius‑iì sáʼ ji fon kitum kee Persia, e kishiíy ké mbìy ki fó ŋwee woo ntuùfú, Nyùy Tàr tiísí ntum rə e Hagay woo *ŋgaà ntum və. A ntum rə̀n‑eè dzə̀ ye Serubbabel woo taà saʼ woó Juda, a dzə̀ wan Shealtiel, a kfə̀n dzə̀ sá ye Joshua woo taà cù wo kuʼùn woo wan Jehosadak.

² Nyùy Tàr woo Taà Mànjòŋ‑eè sùúy jii, «Wír vìne sí táŋri ji ghán sí yóʼ ne ghèén se á baʼri lav cù Nyùy Tàr, e siìr fo.»

³ Hagay woo ŋgaà ntum Nyùy nèn dù, e tiìsí ntum ji Nyùy Tàr suuy a jii,

⁴ «Á mo a dzə̀ vèn wàa dzə e věn lav se vèn bàʼrìn, sí wàa njàʼkìr, a yéem yee lav dzə̀ kiŋkfə̀ʼ kiŋkfə̀ʼ bèn à?

⁵ Mo woo Nyùy Tàr woo Taà Mànjòŋ, m nén a suúy jii, vèn tar dzəʼə̀m yéné.

⁶ Vèn‑eè wày vifá e nsay nyanyày, e kàv shishàr. Vèn yí shishàr she á kérí, kù toóŋe toòŋén, nó meluʼ, a kilòŋ kí kù yúm ven yúmén. Vèn suumè ndzə̀y é wùn, a kintòn ki kù yúy ven yúyín. Ŋgaà lìm lim lim, li mbàm, wù kù wày a dzə̀ é kinshùʼ ke kibàm.

⁷ «Mo woo Nyùy Tàr woo Taà Mànjòŋ, m suuy jii, ‹Vèn tar dzəʼə̀m yéné.

⁸ Vèn lo lèn, e kòʼ áàgwan, e tòʼ vicí ví, e wìy sho, e bàʼrì lav cù, é m wáa yu vijuŋ sho, é vèn wáa cù mo, mo kì dzə̀ á wàa cù.› Suuy mo woo Nyùy Tàr.

⁹ Vèn‑eè kwaʼtì ji á wíy kav vifá nyanyày, yii bèy, e kàv shishàr, e lòo dù sho e laʼ, m feésí, ví láy kisáŋ. Mò‑oò yii bèy bìʼ ka? Bìʼ fo lav yem siìn kiŋkfə̀ʼ mo vé‑eè kètìn, a vèn tur a dzə̀ vitú vén, a wìr kù búʼ a dzə̀ rə́ə yee lav. Suuy mo woo Nyùy Tàr woo Taà Mànjòŋ.

¹⁰ «Á kinyo ke kí yiìn, é bó ŋweʼe táv é yuv, é nsay wúy, e làa yòʼ dzə́ə a fo viyíkìr.

¹¹ M yiì ne, wuú táv é yuv, nsay wáa yum yumén, aàgwane shó, e yiì, kifá ke nsay fəər kidzə̀m ki ku yùm yúmén. Súm saŋé yúm, vitiír vé melùʼ vi yúm, à vicí vé meŋgvə̀r me *oliv vi sá. Vèn à nyám sén sí yúmkír sá, lim ye vèn rə́si gísin, limèe láy kisáŋ.»

Wíri yúnín sáʼ Nyùy Tàr

¹² Serubbabel woo wan Shealtiel wùn Joshua woo wan Jehosadak, à kibér ke wìr ke kí‑iì kfənen fó kwaʼ nsàm kí ku nèn yùnín jí Nyùy Tàr woo Nyùy wov. Dzə̀ ji vé‑eè yuùrí ntum ye Hagay woo ŋgaà ntum Nyùy‑iì tiisin réŋréŋ mo Nyùy Tàr woo Nyùy wov‑iì tumen wun, e kù nèn biìmé, e ghvə̀m Nyùy Tàr.

¹³ Hagay woo ŋgaà ntum Nyùy Tàr nèn kfə̀n tiìsí e wíri ji Nyùy Tàr kàʼ a ji wun dzə̀ á wùn áwune.

¹⁴ Á mo Nyùy Tàr‑iì lùmèrìn shilív shé Serubbabel, woo taà saʼ woó Juda woo wan Shealtiel, wùn à shé Joshua woo taà cù wo kuʼùn, woo wan Jehosadak shi, e kfə̀n lùmèr melív me kiber ke wìr ke kí‑iì kfənen fó kwaʼ nsàm. Shilív shí lúm áwune bey, áwune nen kù kfə̀nkír, e tsə̀ŋén a dzə̀ lim e lav cù, lav Nyùy wov woo Nyùy Tàr woo Taà Mànjòŋ.

¹⁵ A kishiíy ke vé‑eè kfənen é shùu lìm ki‑iì dzə̀ kishiíy nshòv sikweè e mbaà é ŋwee foo fèy, a sì ji ŋwee ntuùfú fó kiya ke Darius‑iì sáʼ ji fon woó Persia.