Habakuk 2 - ŊWÀʼ NYÙY

¹ M yíi koʼ ŋkiy, a yuurí binèr ye Nyùy Tàr yíi fo e mò, é bo m wáa ker kinyo kée bìnèr kùm ndzə́kír yém.

Nyùy Tàr kfən fò binèr e Habakuk

² Á bèy, Nyùy Tàr nèn fò binèr e mò, e sùúy jii: «Sáŋ kinyo kidzə̀m ke m lo, e sàr e wò ki, sáŋ é viwàŋ ve kifa, ye dzə̀ wìr yòŋ kicaárín.

³ Ghán se ntum rə̀n yíi fəəsín si yóʼ ne ghèén. Yii bèy, yì kù sí nyoorì ji yì fəə́sín, a bó yòʼ dzə̀ yì shaà fó ghaŋ. A yì fə̀m ndzəyì, à kù a shìy, bo yì kù‑úù fəə́sín, yì yòʼ‑óò ndzəy.

⁴ Èhéè, ntum dzə̀ jii, ‹Ké wìr wo wù kóʼninè, bó shilív sə́ shí yòʼ tíy e kinyò kee réŋ kí. Yii bèy, ké wìr wo wù yúnin Nyùy, wù wíy lùŋ, bìʼ fo shilív sə́ shí kù tíy e Nyùy wùn.› »

Lǒn wìr ve á méŋ Nyùy

⁵ Rúrú, shii kifàʼ bóʼti vé kiŋkoʼòrwùné bóʼtín, a bó áwune yòʼ kér meemè. Áwune dzə̀ moo woŋ aŋkfə woo bvə̀mkúʼ bvə̀mkúʼ, a dzə moo kpú ye bvə́me yòʼ yii kúrí. Á kù koó vitúm koón, sum wir dzə̀m ji akwàn vév.

⁶ Vitúm vidzə̀m ve wír veé Babilone koon vi wíy lò, a sheʼ áwune, a yòŋ jii, «Lòné dzə̀ wó wìr ve á li kifá ke bó yòʼ dzəə̀n kév. Áwune kù wíy sùm vifá ve wíri ben, e dù, e jòʼsì à? Á kù wíy a sùm kéŋ aŋgaà vév kaa, e dù, e jòʼsì à?

⁷ Vèn maʼti, kilòŋ kí yíi shwiíy aŋgaà vén kaa, aá binkir, e faàsì kifá kidzə̀m ke vèn kérí, é vèn wáa tiy, a yàʼ, là ŋgaà dzər.

⁸ Vèn faàsì ne kimfaàsì fo vitúm vi vinín, kibér ke wíri kí lo, e faàsì sa vén vee vifá, bìʼ fo vèn‑eè yuyrin wíri woŋ e dzə̀m, yúyri e ntèʼ sí, yúyri e ŋkà se laʼ.»

⁹ Rúrú, lòné dzə̀ wó wìr ve á nəə e seʼ ŋgwaákínyé aáwuné melav, báʼti ji vikuʼùy vév ví fíʼ a kìŋsìn áwune, a teér kfə́ə yév fó kileemé.

¹⁰ Vèn kù shòór ne melav men e yúyrí ye vèn yúyri vitúme, a vèn kù yíi làʼ e dzəʼə̀m yéné.

¹¹ Fə̀m tíy yeé wǔn lav, yí kù tóŋ, táŋ a dzə̀ ven, a vitu ve lav vi fó binèr bìʼ vinyo ve vèn buʼtì.

¹² Lòné dzə̀ wó wìr ve á yúyri wíri, e bó a koóy, a bàʼrì ŋkàlaʼ yev, nəʼsì wíri nə́ʼsin, é bo á wáa bàʼrì mvə́m se laʼ sév.

¹³ Rúrú, kéŋ ye vitúm vi kéŋée wíy kfən ji vidaànè ve və̀y, a ndzəʼnìn sév sí kù wíy lày kisáŋ, á ke Nyùy Tàr woo Taà Mànjòŋ wayin.

¹⁴ Wìr dzə̀m kér fó wìy binsí ji dzə̀ á Nyùy Tàr, Taà Vitu, é yí ghánén kitú ke nsay kidzə̀m mo ndzə́ví rùnér rìbà ndzə̀v.

¹⁵ Lòné dzə̀ wó wìr ve á kan a aŋgàa shweesí vév e meluʼ mè, aá nó, a mè koó, aá fíʼ a sheʼ kinshóʼ kév.

¹⁶ Babilon, vikuʼùy vén ví yíi bìnkìr ji woomé. Kù yíi no ven lèn, a dìn kinshóʼ kén. Nyùy Tàr yíi yiì, é vèn nó mvə́ə mee meluʼ, a dzə̀ ŋgeʼlàʼ, é vikuʼùy vén ví lay, é vèn wáa woomé.

¹⁷ Rə́mrə́m kinyò ke vèn yiìn é Lebanon, e laàr vicí véví lo, e kfən e věn kitu. Nyám si yíi a bemér ven bìʼ laar ye vèn‑eè laàrìn nyám si. Kí yíi koóy ven bey, bìʼ fo vèn‑eè yuyrin wíri woŋ e dzə̀m, yúyri e ntèʼ sí, yúyri e ŋkà se laʼ.

¹⁸ Seʼ shibvə̀m dzə̀ ka? Kifá, a bóm wír e wóo, kìn wù sèm sémén. Kí yéʼey a dzə̀ kimboʼtì, ke ŋgaà fèr tiir vifií shó. Kifá, a fér wun, a kí tíy e ŋkfə́né.

¹⁹ Lòné dzə̀ wó wìr wo wù suuy e shibvə̀m shi jii, ŋáʼáy, yoŋ e tíyí, a yí yòʼ ŋeʼè ji lò é yuv. A dzə̀ shibvə̀m shí dìn kinyo e wò à? Á fèr ne a dzə̀ e *kisha ke mbàm ke baar kí, à ke fəvír kí, a bó shí yòʼ kér kiyoy fə̀m shishàr.

²⁰ Yii bèy, Nyùy Tàr kù dzə̀ e wun lav cù ye ranén, wìr msòŋ e dzə̀m wáa dzə e wun si, a dzə kisə́sə.