Galatia 1 - ŊWÀʼ NYÙY

^1-2 Sàŋ mo woo Por wo dzəə̀n ŋgaà ntum Jesus Kristu ŋwàʼ və̀n fo vintatì ve wìr Kristu ve ví dzəə̀n é wòŋ woo Galatia vi. A ntum ye m fiʼtì rə̀n yòʼ lò a dzə̀ fo wìr. Bó yòʼ lèm wír mo, bo m wáa fìʼtì. Kù lèm Jesus Kristu wùn Tàr wòsən Nyùy, wo wù‑uù fəərin Kristu fo kpu. Vèr aàfə́r vén ve á dzəə̀n vèr áwune féne tàtí, a shàʼtì ven adzə̀m, a lon jii,

³ Tàr wòsən Nyùy wùn Taàtá wòsən Jesus Kristu kú a kòŋ ven, a leéy fo vèn, e kfə̀n a yiì, é melív men mè wáa dzə nyaáŋ.

⁴ A Jesus Kristu və̀n‑eè lo biìmé kinyo ke Nyùy woo Tàr wòsən‑eè sìysìn. Wù‑uù fò kitú kfə́, bìʼ vinyo vesən ve bi ví ji wun fíʼ taŋrí vèsən, aá boy fó ndzə yee lèn ye dzəə̀n ye vinyò ve bi ví.

⁵ Á kú a burí Nyùy ghán sidzə̀m, là may. Amen.

Kinyo ke Jesus Kristu ki kù jòʼsì dzə́ə e mòʼón

⁶ M kér gháʼ fó yu ji vèn lò ne, e kù nèn bìn ndzə̀m e Nyùy wo wù‑uù liìn ven ji və́ vee wír bìʼ kinyo ke Kristu‑uù yiìn, a jùmrì a kinyo ke sən kí, e shaà sáʼka Nyùy wo juŋ wo mò‑oò fiʼtì e vèn.

⁷ Vèn jumrì bèy, a bó sáʼka Nyùy wo juŋ yòʼ dzə̀ dzə́ə sinín gheéy. Ke kí dzəə̀n kí dzə̀ jii, yii a wír ámóʼó ve á ghán e věn mvəm, bvəər vifií vén, aá taʼ ji á bívír á sáʼka woo kùm Jesus Kristu və̀n.

⁸ M nén a suúy jii, a fə̀m wìy ver, kìn wìy nshìylav Nyùy fo yuv, e kfə̀n a fìʼtì kinyo ke bó kí yoʼ shèmsín wùn à ke vèr‑iì fìʼtìn e vèn kí, Nyùy kù shòv ŋgaàŋ.

⁹ A m kfə̀n suuy, lo li, mo vèr‑iì sí suuy e vèn jii, a wìr wìy, a fìʼtì kinyo ke sən kí ji sáʼka Nyùy, a bó kí yoʼ shèmsín wùn à ke vèn‑eè yuun fo vèr kí, Nyùy kù shòv á ŋgaàŋ.

¹⁰ Mo m suuy bèn, vèn yén sa ji bó m yòʼ suuy kinyo a ji wún wìri fíʼ a bòŋ. M suuy kém ji kí wáa bòŋ a dzə̀ á Nyùy. A m lò, a tàʼ ji m wáa sheʼér a dzə̀ wíri, bo bó m yòʼ dzə̀ rú ŋgaà lìm Jesus Kristu.

Mo Por ghanen, e bó a dzə sa ŋgaà ntum Kristu

¹¹ Afə̀r vem, vèn wáa kiíy rú kijuŋ jii, sáʼka Nyùy wo juŋ wo mò‑oò wìyìn, a fìʼtì e vèn yòʼ dzə̀ á kinyo ke bomen wír,

¹² bìʼ fo bó yòʼ‑oò tiisin wír kinyo kìn e mò, a bó yòʼ‑oò yèʼéy wír mo shó. Yì‑iì ghèm Jesus Kristu ndzə e mò, bo m kiíy.

¹³ Vèn kì sá kijuŋ mo mò‑oò yii, a m dzəə́ tíy a dzə̀ é liì wor wòŋ woo Juda. Mò‑oò ban wír ve vé‑eè tatin ji vé Nyùy adzə̀m, ron wúu yév, taʼ, e laàr áwune láarin.

¹⁴ A mò‑oò ghàr liì wor wòŋ feyì kitávín, e shaà awàʼ vém adzə̀m. Mò‑oò wày vifií vém cáʼcáʼ a dzə̀ é kinyò ke atǎr ram yérí‑iì dànèn ver shó.

¹⁵ Yii bèy, a Nyùy‑iì shàm ne mo, e shàv, a m dzə̀ə́ e yè wór bvə̀m, e lì mo ji ŋgaà lìm və.

¹⁶ Wù nèn wìy yiì, m yén Wán və e sí yémé ji m fíʼ a ghan, a fìʼtì kinyo kfə́ e wír ve bó yòʼ dzəə̀n veé Judàa. Mo m yenen Kristu bèy, e làa yòʼ kfə̀n dù ji m yú kinyo a fo wìr.

¹⁷ A bó m yòʼ‑oò ló a dù e Jerusalem ji m yén á wír ve yì‑iì siìn aŋgàa ntum Kristu, é bo m bátír. Kirə́ʼ ke mò‑oò duùn shó ki kù dzə̀ Arabia, e nèn wìy lò, a kfən a dzə̀ é Damaskus.

¹⁸ M wìy a dù e Jerusalem, a sì é bǎm viya vitaár ji m ghán Pita. M dù, vèr wun shiíy kishiíy nshòv tàn e ghvə̀m.

¹⁹ A bó m yòʼ‑oò lo dù bèy, e yèn ŋgaà ntum Kristu wùmòʼ gheéy, kù‑uù jòʼsì Jeem wo dzəə̀n fər wun woo Tàr wòsən Jesus Kristu.

²⁰ A Nyùy kì ji kinyo ke m sáŋ fo vèn kin ki dzə̀ á rú, a bó yòʼ dzə̀ kimboʼtì.

²¹ Ghán símóʼ sí wìy fəə̀, m nèn dù, a ghan e ntèʼ seé wòŋ woo Siiria wùn à seé wòŋ woo Silisia si.

²² Mò‑oò ghán bèy, a bó wír ve vé‑eè tatin é wòŋ woo Juda ji wír Kristùu yóʼ ne kìíy mo fó si gheéy.

²³ Á kù‑uù yú yuún ji wìr wo wù‑uù ron wúu yév, taʼ, e laàr áwune láarin və̀y və̀sə a mo wù ghán lèn, fiʼtì a ji á wáa way shilív e Jesus Kristu wùn.

²⁴ Á yú bey, e kù nèn a burí Nyùy búrín bìʼ kinyo ke wù‑uù yiìn e mò.