Filipi 4 - ŊWÀʼ NYÙY

Por tír wír veé Filipi

¹ Á bèy lèn afə̀r vem, m koŋ ven féyì, a jìŋ yen yár mo é ŋàŋ. Dzə̀ ven vin ve á yii, a m kér kishéʼrì. A m kfə̀n kwá ŋgúʼ a dzə̀ bìʼ ven. Ŋkar sem, vèn ku nèn a tiy kitávín a dzə̀ vèn à Tàr wòsən Kristu mo m kì suuyin ne.

² M lón fo Ewodia wùn Sintike jii, áwune ku màyìr a vinyo vév, e kfə̀n shuu e mòʼón, bìʼ fo áwune dzəə̀n wír Tàr wòsən Kristu, aá dzə̀ kintatì kimòʼón.

³ M nen kfə̀n a suúy e wò woo ŋgaà wom ŋgoo feyì ji à ku sə̀ á vikìy vee shooy, aá mán vinyo vév. Dzə̀ wír ve vèr áwune‑eè katìr, fiʼtì sáʼka Nyùy wo juŋ, a yì‑iì fiʼtì vèr à Kilemon, aàŋgaà vém ŋgoo ámóʼó sá. A wír vìn adzə̀me dzə̀, a Nyùy sàŋ ne yír sév é ŋwàʼ wo á sáŋ yír sé wìr ve á wíy lùŋ sho.

⁴ A m suuy e vèn adzə̀m jii, vèn wáa sheʼrí dzəʼə̀m ye vèn kér vèn à Tàr wòsən Jesus ghán sidzə̀m. A m suuy, kfə̀n lo li jii, vèn wáa sheʼrí.

⁵ Vèn wáa yiì yíi a dzə̀ ye wìr dzə̀m wáa yen ji vèn kér wíri ji weè, a kuumé ji ghán se Tàr wòsən Kristu wíy a wìy si sí méʼ a fo mentsə̀m.

⁶ Lá vèn yòʼ a yaŋyáŋ bìʼ kinyo kímóʼ kí gheéy. Vèn kú a bùnrì a dzə̀ Nyùy, a neèr vinyo ve ví gháʼ ven ví e wùn si. Lóo bùnrì, á wàa beèrì sa wun fo vinyò ve wù rə́si yii e vèn.

⁷ Vèn lóo yiì bèy, é Nyùy nèn a yiì, é melív men mè wáa dzə nyaáŋ, é wùn à vifií vén ví ku nèn a tiy a dzə̀ e Jesus Kristu wùn. A bó yòʼ dzə̀ wìr kìíy móo fìʼ nyaáŋ wo Nyùy fó və̀n gheéy.

⁸ Afə̀r vem, kinjòʼsì ké kinyò ki nén a dzə jii, vèn kú a kwàʼtì vinyo a dzə̀ á ve ru ví ve dzə̀ wíri wàa ghvəm, e kfə̀n a kwàʼtì ve ví dzəə̀n là kiloʼ wùn à vee là nsem vi. Vèn ku tìír vifií vén a dzə̀ é vinyò ve ví wáa bòŋ wir dzə̀m, ve wíri wáa yen, a kòŋ. A kinyo ke juŋ ki dzə̀ shó ke dzə̀ wíri wàa burí, vèn wàa kwàʼtì a dzə̀ kee shooy.

⁹ Vèn kú a yiì vinyo ve mò‑oò yeʼeyin ven shó, e wày e věn kiwo, kìn dzə̀ kinyo ke mò‑oò suuyin suúyín, kìn dzə̀ ke vèn‑eè yenen, a m yii yiìn. Vèn lóo yiì bèy, é Nyùy wo dzə̀ wù yiì, bo melív me wíri mè wáa dzə nyaáŋ nèn a dzə e věn mvəm.

Por shéʼri fómo wìr veé Filipi

¹⁰ M beerì Tàr wòsən Jesus Kristu, shéʼri feyì mo m kfə̀n yén, a vèn leey fo mò mo vèn‑eè leey fo ŋgùʼ. A bó m yòʼ suuy bèn ji vèn‑eè bìn á ndzə̀m fo mò, vèn‑eè tàn a dzə̀ dzə́ə.

¹¹ A bó m yòʼ kfə̀n suuy sa fó a dìn ji m búŋ a kifá. M mèrìr ne dzəʼə̀m yém, yí gheén mo.

¹² M kìíy ne mo dzə̀ wìr wàa tàn, e kfə̀n kìíy mo dzə̀ wìr wàa ker vifá vinín. M nen kìíy sa lèn mo dzə̀ m wàa dzə, a sheʼrí, a m fə̀m dzə́ e le. Kìn m kér kifá ké a yi, kìn bó m yòʼ kérí, kìn m tanè, kìn m kér vifá vidzə̀m, m kù a sheʼrí sheʼrín.

¹³ Mo kù fó Jesus Kristu vitaáví e mò, m nén a dzə, vinyo vidzə̀m vi wáa gheén mo gheénén.

¹⁴ Mo m fə̀m suuy bèn, vèn‑eè lo yiì kijuŋ feyì, e sə̀ mo é ghan sé ŋgeʼ sìn.

¹⁵ A vèn kì sá kijuŋ ji kù mày ven vee wír veé Filipi ve vé‑eè sə́ mo é ghan sé mbìy se vé‑eè dzəə́ keʼ sáʼka woo kùm Jesus Kristu kéʼen, a m lo fo věn wòŋ Masedonia, ghán, fiʼtì sáʼka woo shooy. A bó vèr à kintatì kímóʼ kí yòʼ‑oò lo nəə̀nín bèy gheéy, kù jòʼsì ven.

¹⁶ M kfən lò, e dù e Tesalonika, vèn wáa tsənsí mo vifá fo akàŋ akàŋ.

¹⁷ A bó m yòʼ suuy bèn ji m shéʼri a dzə̀ vifá ve vèn‑eè fó e mò. M shéʼri a dzə̀ vilaámé ve Nyùy wíy laamé ven shó bìʼ kinyo ke vèn yii e mò kin.

¹⁸ M yèn ji vèn sə̀ á mo féyì, e shaà mo dzə̀ vèn wàa sə. Mo mò‑oò yenen vifá ve vèn tumen Epafraditur sho, m nèn a dzə lèn, a bó m yòʼ dzəə́ búŋ kifá gheéy. Vifá vìn vi dzə̀ cu ye vèn yiìn a dzə̀ e Nyùy, a yí rəm, rəʼtìnè, a wù koŋè.

¹⁹ Nyùy wo m bunrì və̀n kér nyanyày vifa, a wù wày ne vidzə̀m e Jesus Kristu kiwo, a wù wíy a fo ven ve vèn kér shií shó vidzə̀m, a fo feyì nyanyày.

²⁰ Vèsən wáa burí Nyùy woo Tàr wòsən və̀n ghán sidzə̀m, là may. Amen.

Por shaʼtì wír veé Filipi

²¹ Vèn ku shàʼtì wír ve dzəə̀n vé Jesus Kristùu adzə̀m, e fò e mò. Afə́r vesən ve á wìyìn, e yèn mo féne shaʼtì ven adzə̀m.

²² A wír Nyùy adzə̀me shaʼtì sa ven, bo taaka ve á dzəə̀n e Fòn woó *Rom ntoʼ fèn.

²³ Tàr wòsən Jesus Kristu kú a kòŋ ven, a leéy fo vèn, a dzə vèn áwune.