Filipi 3 - ŊWÀʼ NYÙY

Por màʼtì liì wòŋ, a yu kinyo a dzə̀ ké Kristu

¹ Afə̀r vem, m lóo màysì, e nèn a tir ven ji vèn wáa sheʼrí a dzəʼə̀m ye vèn kér vèn à Tàr wòsən Jesus. M nen kfə̀n a suúy kinyo kímóʼ kí, a dzə̀ ke mò‑oò saŋen ne fo vèn. A bó yòʼ dzə̀ m wàa dor fó a remrí kinyo kee shooy, bìʼ fo kí yíi a shìy ven fo vèn tó é kinyò.

² Kí nén a dzə jii, vèn wáa baàmè a viŋgà vé wìr ve á ghán, yii vinyo ve bi ví, bvəər wíri, suuy ji á kér fó a saŋ *mbèʼ se wìr mo liì woó Juda taʼà, é bo wáa dzə wir Nyùy.

³ Dzə̀ vèsən vin ve Nyùy naŋsin ne rú ji wír və́. Vèsən ghvə́m wun woo Nyùy, a bánri Kiyoy kfə́ vèsən. A vèsən sumrì wún bìʼ fo á dzəə̀n wír Jesus Kristu, a bó vèsən yòʼ wáy vifií é vinyò ve á yii ji bìʼ liì wòŋ gheéy.

⁴ Yii bèy, a kì kòŋ mo, m wàa sùmrì wún é vinyò foo fèy. A wìr lò, a sùmrì wún ji dzə̀ wun wàa tiy sho, a wun kì kinyo ke wun yii, bo m kì, e shaà ŋgaàŋ.

⁵ M dzə̀ wán woó nsay Isray feyì, a m lò fo kfəə Benjamin. M kfə́n a dzə naaŋkàntì wìr Hibru, a yì‑iì dzə̀ə́ wír veé Hibru mo. Kishiíy kí meé waamé, á náŋsín mo mo liì wor wòŋ taʼà. Á lóo kfən fo mbìv *Nsər Mooser, m nèn a dzə wír woó mbìv Farasi.

⁶ A mò‑oò lo wày kitávín féyì, a tom mbìv yee shooy, a nyàvrì e wír Kristùu ji á bívir a Nsər Mooser. Fo mbìv fóo fèy, mò‑oò ló a tiy réŋréŋ vèr à Nsər Mooser, a dzə là nsem.

⁷ Yii bèy, a m fə̀m‑eè kér séʼ woo ka fó fo, bo m sí yén lèn ji kilày, tíy e kinyò a dzə̀ ké Jesus Kristu.

⁸ A bó yòʼ jòʼsì kee shooy cáʼcáʼ. M sí yén vifá vidzə̀m ji kilày ji m fíʼ a ker ke kuʼùn kí, a dzə̀ á ji m maysi, e nəə̀nín vèr Tàr wòsən Jesus Kristu, e kìíy wun kijuŋ. M nen màʼày vinyo vìn vidzə̀m a dzə̀ bìʼ wun woo Kristu, a yen lèn, ví wáa koʼóy koʼoyín ji m fíʼ a tiy a dzə̀ á vèr wun,

⁹ é vèr wun maysi, e làŋsìn, a dzə kifá kimòʼón. M dzə̀ lèn bèn, a Nyùy lì ne mo ji wír wo wù gheenen fo wun, a bó yòʼ dzə̀ ji m lèm a nsər sidzə̀m, a dzə là jay. Wù lì bìʼ fo m wayin shilív e Jesus Kristu wùn. M nen ghèén fo wun woo Nyùy lèn mo wír adzə̀m ve á wáy shilív e Kristu wùné gheenè.

¹⁰ M nén a tàʼ cáʼ jii, m maysi, e suùsín vèr Kristu, e kìíy wun kijuŋ, a yu mo vitaáví və́ ví lim e mǒ wùn, wun wo wù‑uù fəən fó kpu. A m kfə̀n taʼ ji m biímé sá ŋgeʼ se wù‑uù biimen, a yu a dzə̀ fo Nyùy, e fò kitú kém, e kpù mo wù‑uù foon kfə́,

¹¹ e fíʼ gheén ye dzə̀ Nyùy fə̀ə́r mo sá fo kpu.

Por kù taʼ kfə́, e kiíy a dzə̀ Kristu

¹² A bó m yòʼ suuy bèn ji m sí yii a vinyo ve m shóvti sí, leey vìn vidzə̀m, kìn ji m ràn ne a fo vinyò foo fèn. Yii bèy, m kù tùytí sí, a leéy fó mbìy ji m ghár á vinyo vee shooy e mǒ kiwo, bìʼ fo Kristu‑uù liìn mo ji wír və ji m wáa yiì vinyo vee shooy.

¹³ Afə̀r vem, bó m yóʼ ne ghàr vinyo vee shooy. Yii bèy, ke m yii ki dzə̀ ji m màʼtì a vinyo ve ví‑iì shaàn ne vidzə̀m, a giytí ŋàŋ ji m ghár á ve ví dzəə̀n fó mbìy.

¹⁴ M nén a leʼ tìítiy, a dù a dzə̀ fo á du, e seéy, e fíʼ so vinə́ŋsí ve Nyùy kàʼàn vèsən shó, a dzə̀ dzəʼə̀m ye wù wíy fo vèsən é yuv bìʼ kinyo ke Jesus Kristu‑uù yiìn fo vèsən.

¹⁵ Kí nen bòŋ ji vèsən ve á wayin ne gháŋ é kinyò ke Nyùyi wáa leéy a fó mbìy bèy. Yii bèy, a wìr lò, a leéy kfə́ a dzə̀ dzə́ə ye sən, bo yíi naàrì Nyùy e ŋgaàŋ.

¹⁶ Kinyo ke kuʼùn kí dzə̀ ji vèsən ku ghàr á kinyo ke vèsən yeʼeyin ne, e sèéy sho kijuŋ.

¹⁷ Afə̀r vem, ven adzə̀m kú a lì mfìʼ a dzə̀ fo mò, e kfə̀n a lì sa fo wír ve á yii vinyo réŋréŋ mo mò‑oò dìnèn e vèn.

¹⁸ Mò‑oò ló a suúy e vèn fó ŋgùʼ, a m kfə̀n sí rémri lèn e mensíy mè e si jii, wíri dzə̀ e vèsə́n mvəm anín ve á loòn ne, a ker liì, a wù shwínin a dzə̀ á wo wìr ve á ban kinyo ke Kristu, ŋwáy kpú ye wù‑uù kpuun é kintam ŋwáyín.

¹⁹ Vee shooy vee wíri wíy jòʼsì kév a dzə̀ é və̀y, bìʼ fo wóov woo Nyùy dzəə̀n shúuyi, aáwune kfə̀n sumrì wún é vinyò ve á kì rə̀ʼ‑ə́ə̀ wáa woomé woomén fó fo, wáy vifií vév a dzə̀ é vinyò veé nsay fèn.

²⁰ Vèsən dzə̀ késən wír veé wòŋ woó yuv, a vèsən tùytí sí, a leéy ji Ŋgaà Lùŋèr wòsən wo dzəə̀n Tàr wòsən Jesus Kristu wiy fó fo.

²¹ Wù wíy wìy, é wù biner viŋgà vesən vé wùn veé nsay vìn, é ví kfə́n réŋréŋ moo və́ woo wún wo dzəə̀n woó yuv. A vitaáví ve wù wíy bìnèr sho vìn vi dzə̀ ve dzə̀ wù bàʼtí vifá veé ndzə sho vidzə̀m, a saʼ.