Filipi 2 - ŊWÀʼ NYÙY

Á wáa ker liì a dzə̀ wo Jesus Kristu

¹ M kì kijuŋ ji vèn à Kristu sì á kintatì, a wù távir melív men, koŋ ven é ŋàŋ, yii, a melív men mè lum ghán sidzə̀m. A m kfə̀n kì ji vèn à Kiyoy ke Nyùy ki suùsín ne sa, vèn kfən kìíy a mó a kòŋnìn, é wìr wáa way fə́r və é shiliv.

² Mo kí dzəə̀n bey, m nén a lon ji vèn ku yiì, é m maysi, a sheʼrí. Vèn kú a kwàʼtì kinyo kén kimòʼón, a kòŋnìn, e suùsín, a dzə shuu mòʼón.

³ Lá vèn yòʼ a dzə, é wìr wáa dìy a dzə̀ kitú kfə́. Lá vèn yòʼ a sùmrì wún. Vèn wáa lì vitú vén shishàr, é wìr wáa yen wùmòʼ, a shaà kfə́ kee kitú.

⁴ Vèn lóo yiì kinyo, vèn wàa yiì a dzə̀ ke kí sə́ wir dzə̀m. Lá wìr yòʼ a yiì ji kí kú a sə a dzə̀ wun.

⁵ Vèn kú a lì vinyo vén réŋréŋ mo Jesus Kristu‑uù dìnèn e vèsən.

⁶ Mo wù fə̀m‑eè dzəə̀n réŋréŋ ji Nyùy, bó wù yòʼ‑oò ló a tàŋèn ji wun kú a ker kilíŋ ke Nyùy kee shooy.

⁷ Wù ŋwáy kilíŋ kee shooy, e lì a dzə̀ ké kwàn, á dzəə́ wun réŋréŋ ji wir msòŋ.

⁸ Wáa dzə e ghan se wù‑uù dzəə̀n wir msòŋ sin, wù lì kitú kfə́ shishàr, a yu a dzə̀ fo Nyùy, e biìmé kpú ye wù‑uù kpuun, bo taaka yeé kintam.

⁹ Bìʼ kee shooy, Nyùy kóʼór wun, wù wáa dzə vitú ve ntaʼ, e bùʼ e yír ye yí shaàn yír sidzə̀m,

¹⁰ é wír ve á dzəə̀n é wòŋ woó yuv, wùn à veé nsayi, à vee aŋkfəə́ wòŋe lóo yu yír Kristu yee shoon, aá wáa gvəʼtí e wùn si.

¹¹ A wír vìn adzə̀me wíy a binsí kiránén ji Jesus Kristu dzə̀ á Taà Ndzə. Á lóo binsí bèy, bo dzə̀ búrí mo á búri Nyùy Tàr.

Nyùy lumèr melív me wìr və́, aá yii mo wù koŋè

¹² Ŋkàr sem, dzə̀ sá mo vèn kú a yu a dzə̀ fo Nyùy. Vèn‑eè ló a yu e ghan se vèsən‑eè dzəə̀n. Vèn ku nèn a yu e shaà bèy lèn wo bó m yòʼ dzə̀ə́ vèsən, e màysì, a yiì moo wír ve Nyùy liìn ji və́, a fàn, a yàʼ fó jay kinyo e wun, é vèn nèn wìy lùŋ.

¹³ Vèn wáa kiíy ji lumèr Nyùy melív men, a vèn koŋ fó a yiì vinyo ve ví wáa bòŋ wun. A kù kfə̀n fó wun vitaáví, a vèn yii vinyo vee shooy sho.

¹⁴ Vèn lóo yiì vinyo ve vèn yii vidzə̀m, lá vèn yòʼ a ghvə̀vrì, a bìʼ mbìʼ,

¹⁵ é vèn nèn a dzə e wírí si là njò, e làa yòʼ a ker nsem yìmòʼ gheéy. Vèn lóo yiì bèy, é vèn nèn a dzə wír Nyùy ŋkuuŋkùŋ, là jay e ndzə ye wíri yii joonè shó, kér melív me bi mè rə̀n. A vèn yíi a njàʼkìr e wír vee shooyí mvəm moo mejiy,

¹⁶ mo vèn fiʼtì sáʼka wo wù fó dzəʼə̀m yee là may aáwune. Vèn lóo yiì bèy, Jesus Kristu wíy wiy e kishiíy fó, é m wáa tuy shwín ji bó m yòʼ‑oò lo sòrkìr, lim yémé lày a kisáŋ.

¹⁷ Mo vèn wayin shilív e Wàn Nyùy wùn, a sheʼrí, bo dzə̀ cu mo vèn cu Nyùy. A wù ben yèn ji á yúyrí mo, e dzə̀sì cu yén shó, bo m kù nəə a dzə̀ e věn mvə̀m kisheʼrì, é vèsən maysi, a yu vijuŋ.

¹⁸ M nén a tàʼ sa ji m wíy lóo sheʼrí e ghan see shooy, vèn wàa sheʼrí a sa.

Por túm wír abaà é Filipi

¹⁹ A Tàr wòsən Jesus biìmé, bo bèr shishàr, é m túm Timoti fo vèn. Wù dú wiy, fiʼtì mo vèn dzəə̀n, é shilív shém shí rəsin.

²⁰ Bó m yòʼ kfə̀n kér wír wùmòʼ, e shaà wun, wo wù wayin ven é shiliv réŋréŋ moo mo, a leéy fo vèn.

²¹ A m suuy bèn, bìʼ fo kùʼùn wìr diy a dzə̀ kfə́ kee kinyo, e làa yòʼ a ci ké Jesus Kristu gheéy.

²² A vèn kì sá mo liì wun woo Timoti dzəə̀n. Vèr wun‑eè ghán, fiʼtì sáʼka Nyùy, a wù sə́ mo réŋréŋ mo wàn yii sə́ tàr wov.

²³ Á kinyo ke kí yiìn, bo m wáa tàʼ, e tsənsí a dzə̀ wun fo vèn. Ke m dzəə́ leey ki dzə̀ jii, m yén á mo vinyo vém ví yíi jòʼsì ŋkuŋén.

²⁴ A m wáy vifií ji Tàr wòsən Kristu tav sə̀, é mómò woo Por jumri sá, e wìy, e yèn á ven.

²⁵ A m kfə̀n yén sa ji bo m kì tsə̀nsí á fə́r wòsən Epafraditur fo vèn. Dzə̀ taà lav wom, a vèr wun rə́si funèn e kinyò ke Jesus Kristu. A dzə̀ wun wo vèn‑eè tumen ji wù wiy, a sə a mo.

²⁶ Jìŋ yen sí yár wun e ŋàŋ féyì, a wù kfə̀n sov kitú, bìʼ fo wù‑uù yuun ji vèn‑eè yù á ji wun kì joyì.

²⁷ Wù‑uù lo jòy rú féyì, a tàʼ kpu. Yii bèy, Nyùy shám mendzən mvə, wù lùŋ, e kfə̀n rə̀r sá méem fo wù kpú, é m maysi, a sòv kitú e ŋàŋ.

²⁸ M nén a tàʼ lèn feyì ji bo m kì tsə̀nsí, é wù wiy. Vèn áwune yénninè, vèn lóo sheʼrí, é shilív shém shí fiʼ rə̀sìn sa.

²⁹ Kí nén a dzə jii, wù wíy wiyì, vèn keèrí wun moo wir Kristu, a sheʼrí wun. Vèn wáa ghvəm kfə́ə wìr vee bene,

³⁰ bìʼ fo wù‑uù wayin vifií e Jesus Kristu kinyò, e bèr gheéy fó kpu. A wù‑uù wáy nyár e wun wùn bey cáʼ ji wun li á kirə́ʼ ke yì‑iì dzəə̀n kén, e wìy, a sə mo.