Filipi 1 - ŊWÀʼ NYÙY

¹ Ŋwàʼ və̀ne sàŋ mo woo Por vèr Timoti ve dzəə̀n aŋgàa lìm Jesus Kristu. Vèr sàŋ a dzə̀ fo vèn vee wír Nyùy ve á dzəə̀n é Filipi adzə̀m ve vèn à Jesus Kristu tatin. A wú dzə̀ fo vèn à vilìmbìy vén ví, à wír ve á lim e věn mvəmé adzə̀m.

² Vèr nén a shàʼtì ven, a lon jii, Nyùy Tàr wùn Taàtá wòsən Jesus Kristu kú a kòŋ ven, a leéy fo vèn, a yiì, é melív men mè wáa dzə nyaáŋ.

Por beerì Nyùy, kfə̀n bunrì fo wír veé Filipìi

³ M yii lóo kuumé ven ghán sidzə̀m, m kù a beèrì Nyùy bìʼ ven, Nyùy wo m foon kitú kém shó.

⁴ M lóo bùnrì fo vèn, shilív shém shí wàa bòŋ,

⁵ bìʼ fo m kù kuúme mo vèn‑eè tatin mo, e kèʼ fo kishiíy ké mbìy ki, vèsən wáa sàmèr sáʼka wo juŋ woo bìʼ Jesus Kristu, e shem lèn.

⁶ A m kì kijuŋ jii, Nyùy wo wù‑uù kèʼèn lim rə́ ye juŋe e věn meliv kù wíy a yiì, é vèn wáa dzə wír və́ ŋkuuŋkùŋ, e màysì e kishiíy ke Jesus Kristu wíy kfən, e maàr kinyo kee shooy.

⁷ A dzə̀ m wàa kuumé ven bey, bìʼ fo vèn dzəə̀n tím yém, a vèsən tíy e kinyò kimòʼón, a dzə̀ ke Nyùy bùʼùn vèsən shó wír adzə̀m. Vèsən tíy sho lèn wo m dzəə̀n é sháŋ, a kù‑uù tíy vèsən é ghan se mò‑oò dzəə́ ghán, binèr fo sáʼka Nyùy wo juŋ, naarì mo wù dzəə̀n.

⁸ M suuy bèn, a Nyùy kì sá ji m kér rú á shií fo vèn, koŋ ven shilív shidzə̀m réŋréŋ mo Jesus Kristu koŋè.

⁹ Kinyo ke m lón fo Nyùy ki nén a dzə ji kikoŋnìn kén kí kú a kuy, a dù fo mbìy, é vèn kfə́n a kiíy vinyo, a way sí sho, a səə̀m ve ví dzəə̀n réŋ.

¹⁰ Vèn lóo səə̀m, é vèn nèn a fəə́r a dzə̀ ve juujùŋ vi, é wíy lóo dzə e kishiíy ke Jesus Kristu kfə́n e bàm, é vèn wáa tiy e wùn si là nsem, a wàrkìr.

¹¹ A vèn wíy a wàrkìr, bìʼ fo vèn à Jesus Kristu tatin ne, wù wáa yiì, vèn wáa ker liì wo dzəə̀n wo wìr Nyùy, a wù din a dzə̀ vikuʼùy vé wun woo Nyùy, kóʼor yír rə́.

Por lim sháŋ, a kinyo ke Kristu ki kù samèr wún

¹² Afə̀r vem, m taʼ, e yiì, é vèn kiíy ji ŋgeʼ se sí kooyin mo sin si yiì ne, sáʼka wo juŋ woo kùm Jesus Kristu wáa kuy kuyín, a dù fo mbìy.

¹³ A ke kí kooyin kí dzə̀ jii, mo m dzəə̀n é sháŋ a dzə̀ é ntoʼ fèn, vé rər ve á shiy ntoʼ rə̀n wùn à wír veé ntoʼ fèn adzə̀me kìíy ne lèn a ji á wày mo é sháŋ cáʼ ji bìʼ fo m fiʼtì kinyo ke Jesus Kristu.

¹⁴ A sháŋ wo m lim və̀n kfə̀n yiì ne sa, afə́r vesəné máysí, e wày gháŋ e Tàr wòsən Jesus wùn anín, a fìʼtì kinyo kfə́ lèn feyì, là fan.

¹⁵ M kì ji ámóʼó fiʼtì kév, aá gheʼ mo ghéʼen, táŋ lim yém. Yii bèy, aámóʼó fiʼtì e shilív she juŋ shi,

¹⁶ bìʼ fo áwune koŋ mo, aá kì ji wày Nyùy mo é sháŋ ji m fíʼ a dzə e ntoʼ fèn, a bìnèr fo sáʼka wo juŋ woo kùm Jesus Kristu.

¹⁷ A vé kighèʼe fiʼtì kév a dzə̀ fó shuù cáʼcáʼ ji á fiʼ kòóy wíri aáwuné mbìv, aá taʼ ji á wáa dzə̀sì a ŋgeʼ se m yén e lav sháŋ fen.

¹⁸ Kee shooy ki yòʼ nyár mo é gha? Mo á kù fiʼtì a dzə̀ kinyo ke Jesus Kristu, m kù shéʼri kém shéʼrín, kìn á fiʼtì a dzə̀ e shilív she juŋ shi, kìn á fiʼtì e she bi shí.

¹⁹ A dzə̀ mo m kù wíy a sheʼrí bèy, bìʼ fo m kiìn jii, mo vèn bunrì fo mò, a Kiyoy ke Jesus Kristu ki kfə̀n sə́ mo, bo vinyo vìn vidzə̀m vi wíy bòŋ e mǒ mbìv.

²⁰ Kinyo ke m taʼ feyì, e way vifií shó cáʼ ki dzə̀ ji lá kí yòʼ kòóy a ji m yii kinyo ke kí wáa fo mo woómé. M kú a kur shilív, a tiy kitávín ghán sidzə̀m, bo taaka lèn və̀n, kìn dzə̀ ji á yúyri mo, kìn m goʼ e tin, é kinyo ke m yii kidzə̀m ki wáa meér yír a dzə̀ yé Kristu.

²¹ A m suuy bèn, bìʼ fo m kiìn jii, a m fə̀m dzə̀ shó, bo kù dzə̀ á vèr Kristu. M kpú, é vèr wun wáa dzə ŋkuuŋkùŋ.

²² Yii bèy, wáa dzə ji m goʼ e tin, bo m kù dzəə́ wìy a yiì lim ye yí wáa sə wíri. Mo dzə́ə see sibaà sin si boŋ sidzə̀m, kí nén a tarír mo ji m sa bìn e rəné á?

²³ M sí dzə́n a dzə̀ tùʼtàn, a m sí taʼ lèn feyì ji m ku màʼtì dzəʼə̀m rə̀n, e dù, a dzə a vèr Kristu. Á yee shoon yee dzəʼə̀m ye yí bòŋèn, e shaà.

²⁴ Yii bèy, a kinyo ke kí dzəə̀n é shií kí dzə̀ ji m ku dzə̀ʼtì e ndzə fèn bìʼ ven.

²⁵ Mo kí dzəə̀n rú bey, m nen kìíy feyì ji m dzəə́ wìy dzə̀ʼtì vèsən, a sə ven, é vèn shaa fó mbìy, a way shilív e Jesus Kristu wùn, a ker kishéʼrì.

²⁶ A vèn wíy màysì, a wùʼsì Jesus Kristu feyì bìʼ mo é kishiíy ke m kfə̀n wíy wìy, é vèsən yénnín sí.

²⁷ Á bèy lèn, kinyo ke vèn wáa yiì ki dzə̀ jii, vèn wáa ker liì a dzə̀ á wo wìr ve á jumrì rú kinyo ke Jesus Kristu. A ke m taʼ ki dzə̀ jii, kìn m wìy fo vèn, kìn bó m yoʼ wìy, m kù a yu a ji vèn tíy kitávín, kér shilív shimòʼón, e kfə̀n a yu ji vèn wày vifií, a fùnèn kinyo kimòʼón cáʼ ji sáʼka Nyùy wo juŋ wáa dù fo mbìy, é wíri wáa biimé.

²⁸ Lá vèn yòʼ a fàn wír ve á ban kinyo kén fánen. Vèn lóo yiì bèy, é nèn a dzə vifiʼìr ve áwune wáa yen ji Nyùy wíy lùŋèr ven, e laàr áwune á láarin.

²⁹ Vèn wáa kiíy ji Nyùy yòʼ bùʼ ven ji wír Kristu cáʼcáʼ ji vèn wáy a dzə̀ shilív é wùn wó, e fíʼ lùŋ. Wù bùʼ sa ji vèn wáa yen ŋgeʼ bìʼ kinyo ke wun woo Jesus Kristu,

³⁰ é vèsən tátí adzə̀m, a fùnèn kinyo kee shó kimòʼón a dzə̀ ke vèn‑eè yén, a m funnìnè. A kù dzə̀ kíwun ke vèn dzəə́ yú, a m tsə́ŋ sho lèn.