Esta 7 - ŊWÀʼ NYÙY

Á yúyrí Haman

¹ Á bèy, fòn wùn Haman nèn dù ji wùn à Yaà Esta yí á ŋkàʼ.

² Á dù, a yi, lòo dzə e kishiíy ke kí‑iì meen ji baà, aáwune kù dzə́, nó meluʼ, fòn nèn kfə̀n dzə̀r e Esta jii, «Yaà, jii mbaà, kí kì dzə̀ ji ka? À taʼ ji m yée le e wò? Dzə́r, é m fó kifá ke à taʼà e wò, a fə̀m dzə̀ ji m tóʼnín woŋ wóm é ntìntìn, e fò e wò, bo m kù‑úù fó.»

³ Yaà Esta nèn bùn fon, e bìnèr sho jii, «Nyàr, a fòn fey yèn mo, m gheén wun, wún fòne boŋ ye á yú tóŋ yém, kii tàr wor, fòn kù kìm a dzəʼə̀m yém wùn à yé wìr vémé.

⁴ Nyàr, wìr wùmòʼ fiìnè a ne vèr à wír vémé ji á seérí, e yùyrí, aá may á fo wòŋ. A dzə̀ ji vé‑eè fiìnè ver cáʼcáʼ ji akwàn, bo m kì sə̀tí á shuu wóm, e làa yòʼ a shaʼnín. Bo ŋgeʼ se vèr‑iì yíi a yen si yòʼ‑oò yíi a dzə a se a dzə̀ á wàa mbaà a fon, a jivír wun sho.»

⁵ Fòn Ahasuru dzə́r e Yaà Esta jii, «Wìr woo shó dzə̀ la? Ŋgaàŋ mùm rə́mrə́m kinyò woo ben, a wù dzə̀ a dzə̀ feé?»

⁶ Yaà Esta bùn fon, e tòʼ shó jii, «Ŋgaà vibàn wo wù ron wuú yér kù dzə̀ á rim woo Haman wo wù dzə́ və̀n.» Haman nèn lò a yàʼ yàʼàn e fòn wùn Yaà Esta si.

⁷ Fòn ŋáʼáy fó ŋkàʼ fo áwune‑eè dzə́ nó meluʼ, a dù e kiboo keé ntoʼ e kilòŋ ke shwiiyín kí. Haman siíy, a buʼ kfə́ a dzə̀ wó e Yaà Esta ji wù kim á dzəʼə̀m rə́ fo á laar. Wù‑uù lóné, bìʼ fo wù‑uù yenen ne ji fòn kù wày á ne wayín ji wun kér fóo yuyrí a wun.

⁸ Haman wáa lon bèy, e lò, a gbù e Esta ntaʼ. Fòn kú a kfən e bàm fó kiboo keé ntoʼ, e lòo nəə́ fo vé‑eè nó meluʼ me ŋkàʼ, e yèn, a Haman sí gbu e ntaʼ wo Yaà Esta‑aà néŋ sho, fòn búʼ shirəə́ jii, «Abaày, a kí fèn kì dzə̀ é le, wù wàa ghatí Yaà Esta, a dzə̀ e vèr wun ntoʼ à?» Fòn wáa jì ji wù wáa suŋnín, a màysì, aá súm ne sí Haman.

⁹ Harbona woo nshìylav fòn yìmòʼ nèn bùn fon, e sùúy sho jii, «Nyàr, bó yòʼ jòʼ a kee shooy cáʼ. Jòkìnyàʼ, Haman tà á ne kicí ke á yii sə́ŋ wíri shó, a kí sí tíy a e wun laʼ. Kí dzə̀ á ntàm se kiwo mtàn, a Haman‑eè tá bèy a ji á yíi səŋ a Mordekay sho, wun woo ŋgaà wo kisúŋnìn kfə́ kí‑iì bòyìrìn á fon fo á laar.» Fòn nèn sùúy ji á li á wun woo Haman, e sə̀ŋ á sho.

¹⁰ Á bèy, á nèn kù lì Haman e nsənnsən, e sə̀ŋ é kici ke wù‑uù taan ji á yúyrí á Mordekay sho kìy. Dòʼshwiiy fòn nèn kù rə̀sìn.