Esta 5 - ŊWÀʼ NYÙY

Yaà Esta káʼ ŋkàʼ, e bì fon wùn Haman

¹ Yaà Esta lèm jíŋ, kishiíy kí meé ji taár, wù nèn màʼ ndzə̀y sə́ sé viyaà, e nə̀ə́, e tìím e mvə̀m ntoʼ, e ŋkìʼnìn ŋgày yeé ntoʼ, a fòn dzə́ e ŋgày e kàvàʼ, kiʼ shuu wo wú nəə.

² Fòn lòo màʼ sí, e yèn Yaà Esta, a wù tíy e mvə̀m ntoʼ, e nèn a ker shií və, e nèn ràmsì kitoómé ke wù‑uù kérí sho. Yaà Esta kóʼtí, e kùm kitoómé kee shooy fo kitu.

³ Fòn dzə́r shó jii, «Kí kì dzə̀ ji ka? À taʼ ji m yée le e wò? Dzə́r e mò, é m fó kifá ke à taʼà. A fə̀m dzə̀ ji m tóʼnín woŋ wóm é ntìntìn, e fò e wò, bo m kù‑úù fó.»

⁴ Yaà Esta bùn fon, e bìnèr sho jii, «Nyàr, a kí fey ghèén fon, kii tàr wor, wùn Haman kù wìy a fo ŋkàʼ wo m baʼtin fo wun e kishiíy ké lán ki.»

⁵ Fòn ku nèn tsə̀nsí toóy ji Haman ku wìy a cér, é wùn wun yii á kinyo ke Yaà Esta suuyin. Fòn wùn Haman nèn dù fo ŋkàʼ wo Yaà Esta‑aà baʼtin ji wó fòn.

⁶ Áwune dzə̀ʼə̀m, e lòo no meluʼ, fòn nèn kfə̀n dzə̀r e Yaà Esta jii, «Òó mbaà, à kì taʼ ji m yée le? À lón a dzə̀ ka? Dzə́r, é m fó kíwun ke à taʼà. A fə̀m dzə̀ ji m tóʼnín woŋ wóm é ntìntìn, e fò e wò, bo m kù‑úù tóʼnín, e fò.»

⁷ Yaà Esta bùn fon, e sùúy jii, «Nyàr, kifá ke m lóné, à ke m koŋ feyì ki dzə̀ á jii,

⁸ nyàr, a fòn fey yèn mo, m gheén wun, wún fòne boŋ ji á yú tóŋ yém, e yiì kinyo ke m taʼà, kii tàr wor, fòn wùn Haman kù kfə̀n wìy a ŋkàʼ wo m báʼti ji wó wùn fòn kibvəə́shí. Kù dzə̀ kibvəə́shí kin ke m bvəə́shi, e bìnèr a kinyo ke á dzə́ti e mò fó ntoʼ.»

Haman wóŋ ji á yúyrí Mordekay

⁹ Á bèy, Haman wáa lò fo ŋkàʼ fey, a kishéʼrì ki yúyri wun yúyrín, a wúné tékirì. Yii bèy, mo wù duùn, a meé e shùu kibùʼ fo Mordekay‑iì dzə́, la Mordekay yòʼ fə̀m a kwè ji wun lo á e yuv, e ghvə̀m wun, kinyo kìy ki tén wun feyì.

¹⁰ Yii bèy, Haman ku kúr shilív, a kfən fo laʼ. Wù meé é laʼ, e jàŋrì ŋkar sə́ ji á wiy á e wun lav, e kfə̀n jàŋ yeè lav və Seresh.

¹¹ Áwune wìy, Haman nèn kèʼ, a saà wún, a taŋ mo vikuʼùy və́ ví dzəə̀n, a taŋ nyanyày wòn wo wù kérí, a fìʼ mo fòn koʼorin ne ntaʼ və, wù wáa fo sáʼ aàtǎr laʼa adzə̀m, e kfə̀n lèm wun ji kitú ke atǎr ntoʼ.

¹² Wù kú a shaà fo mbìy, a suúy jii, «Bó kém kí yóʼ ne mày bèy. Yaà Esta sìíy, e kfə̀n kàʼ ŋkàʼ wúmóʼó, e làa yòʼ bi wír wùmòʼ gheéy, kù may mo cáʼ wo m duùn vèr fòn. A wù kfə̀n bì ne vèr fòn e wúmóʼ woo ŋkàʼá kibvəə́shí.

¹³ Yii bèy, bó vinyo vìn vi yòʼ kér ndzə̀n fo mò, mo m kù dzəə́ yén Mordekay woo wír woó Juda, a wù dzə́ e shùu kibùʼ keé ntoʼ.»

¹⁴ Á bèy, yeè lav və Seresh wùn aàtàá lav vəə́ nèn shù e wun woo Haman jii, «Tá kicí ke á yii sə́ŋ wíri shó ki, é vida və́ ví wáa dzə kóy nshòv sibaà e ghvə̀m e kimbéʼ ki. Ndzə bvəə́shi, ráné, áà bun fon ji wù yoŋ, aá li á Mordekay, e sə̀ŋ shó. Kí kooy bèy, áà nèn a dù ŋkàʼ, a wàrkìr.» Nshù rə̀n gheén Haman, wù ku nèn tà kicí kiy.