Esta 4 - ŊWÀʼ NYÙY

Mordekay lón Esta ji wù ku sə̀ á wír və́

¹ Sáʼ rə̀yi tó e Mordekay kitùʼùr, wù tiíné ndzə̀y fó wùn, e màʼ vinsàʼ ve ndzə̀y, e yòʼ kibvə́ e si, e fəə̀, a ghan e mvə̀mlaʼ, a fuŋ tóŋ kitávín.

² Wù ghán, e dù mèé e shùu kibùʼ keé ntoʼ, e làa yòʼ nəə́, bìʼ fo á yòʼ‑oò biíme ji wìr wo wù màʼàn ndzə̀y sé kpu nəə́ á fo.

³ Vishév ve wòŋ vidzə̀m ve sáʼ rə̀ne‑eè nəən shó, wír veé Judàa wáa dìy sa adzə̀m, a toŋ, a shèŋ kitú, a lèm jíŋ, a toŋ bèn, a jeetí. Kùʼùn wìr máʼ vinsàʼ ve ndzə̀y, e yòʼ kibvə́ e si, a neŋ fo nsay.

⁴ Wónlě vikìy ve vé‑eè lim fo Yaà Esta wùn à nsheèlav se sí‑iì lim fo wun si yiì lò, e yòŋ kinyo ke Mordekay‑iì yii kìy e Esta. Vifií ví bvəə́rí wun woo Esta, wù tsə́nsí ndzə̀y ji á du, e fò á e Mordekay, é wù shóʼ á vinsàʼ ve ndzə̀y fó wùn, e màʼ a see shooy. Yii bèy, a bó yòʼ‑oò dzə̀ Mordekay biìmé.

⁵ Esta nèn yòŋ Hatak woo nshìylav ye fòn‑eè shoʼon, yì wáa lìm fo wun, e tùm wun fo Mordekay wùn ji wù du, e dzə̀r shó a ji sà jívir ka wun a.

⁶ Hatak ku nèn fəə̀, e dù, e yèn Mordekay e maàndzə ye yì dzəə̀n é ŋkìʼnìn shùu kibùʼ.

⁷ Mordekay dù, e naàrì kinyo kidzə̀m ke kí‑iì kooyin wun. Wù kfən naàrì mbàm se Haman‑eè kàʼàn ji wun yíi way e fòn kitàv, aá laar wír veé Juda.

⁸ Mordekay kfən fò ŋwàʼ e Hatak wo wú‑uù kér nsər ye vé‑eè saŋen é Susa ji á laar á wír veé Juda, e yòŋ sho ji wù wàá du, e fò á e Yaà Esta. Wù fó, wù kfə̀n naàrì a kinyo kidzə̀m ke kí‑iì kooyin shó, e kfə̀n yòŋ a sho ji wù ku dù, e yèn fon, a buʼ wó a ji fòn ku shàm á mendzən me wìr və́.

⁹ Hatak nèn kfə̀n é bàm, e fìʼtì kinyo kidzə̀m ke Mordekay kì suuyin e Esta.

¹⁰ Esta nèn kfə̀n tsə̀nsí wun ji wù du, e tiìsí e Mordekay a jii,

¹¹ «Wìr dzə̀m kì mo nsər dzəə̀n é ntoʼ. A fə̀m dzə̀ nshìylav, kìn dzə̀ wír wo wù dzə́, a fə̀m dzə̀ é mbìv wòŋ rəné, bo á kù kì. A wìr sàsìn, e tò é mvə̀m ntoʼ, kìn dzə̀ wiíy, kìn lumèn, a bó á yoʼ tòóy tooyín, bo ŋgaàŋ kù kér a fóo kpu. Wáa dzə ji lá á yòʼ yùyrí ŋgaàŋ, bo fòn kù kér fóo ràmsì kitoómé kfə́ ke á fèrìn e *kisha ke mbàm ke baar kí shó. Kém kí dzə̀, a sì lèn kishiíy mtaár, a bó á yoʼ dzəə tòóy mo ji m nəə́ é mvə̀m ntoʼ.»

¹² Mordekay yú ntum ye Yaà Esta tiisin rə̀n,

¹³ e nèn yòŋ ji á du, e bìnèr a e Yaà Esta jii, «Lá wò woo Esta yòʼ a kwàʼ ji á yíi lòo laàr kibér ke wìr veé Juda, áà boy ji bìʼ fo à dzəə̀n é ntoʼ.

¹⁴ Á bèy, aà gòʼ kisə́sə e ghan fen, bo dzəə̀ yìmòʼ kù‑úù fəə́sín ye dzə̀ wír veé Judàa keèrí sə́ fo fo, e bòy fo á laar áwune. Yii bèy, aá yíi laàr vèn à kfə́ə tàr woné láarin. Àshè, yòʼ kì la, a wò‑oò kóʼ ntaʼ viyaà é ntoʼ fèn ji kí kooy bèn, áà fiʼ bòyìr wír veé Juda, bo taaka lèn wo rə́mrə́m kinyòo gbuùn ne aáwuné kitu.»

¹⁵ Yaà Esta yú ntum Mordekay rə̀y, e tsə̀nsí binèr jii,

¹⁶ «Mordekay, dùu, e bàʼtí wír veé Juda ve á dzəə̀n é Susàa kirə́ʼ kimòʼón, é vèn áwune ku lèm jíŋ, a bùnrì fo mò. Kí dzə̀ jii, e bǎm vishiíy vitaár, e shùy wùn à vitsə́ʼə́, lá wìr yòʼ nò kifá, kìn ji wù yí ke yiín kí. Vèr à wónlě vikìy ve á lim fo mòó kù yíi a lèm sa jíŋ bèy. Kee shooy ki shaa, é m du, e yèn fon. A fə̀m dzə̀ mo nsər yoʼ biìmé ji wìr du fó, a bó á toóy tooyín, bo m kù‑úù du, a mo‑óò du kpù, é m dù kpù.»

¹⁷ Mordekay ku nèn dù, e yiì kinyo kidzə̀m réŋréŋ mo Yaà Esta‑aà suuyin.