Esta 3 - ŊWÀʼ NYÙY

Haman bá ntaŋ wóo laàr wír veé Juda

¹ Ntàm lòo dàr, Fòn Ahasuru kóʼór ntaʼ Haman woo wan Hammedata, wo dzəə̀n wír woo Agag ram. Wù kóʼór wun bèy, wù wáa tiy vitú fo atǎr ntoʼ vəə́,

² e nèn fò sáʼ ji vibay və́ vidzə̀m ve ví‑iì rə́si e shùu kibùʼ vi wáa tsəm a ndzəə́ e Haman si, a ghvəm wun. Áwune adzə̀me ku nèn yiì bèy, ku mày Mordekay. Wù yòʼ‑oò lo tsə̀m ndzəə́ e Haman si, a wù yòʼ‑oò lo fò ghvə́m sho.

³ Vibay ve fòn vímóʼ ví nèn dzə̀r e Mordekay jii, «À tèn fóo yunín sáʼ fòn bìʼ ka?»

⁴ Á kú a suŋnín sho kishiíy ké ndzə kidzə̀m, a lò, a lì, la wù yòʼ yù jí yev. Á nèn dù, e beè Haman sho ji mo Mordekay kù tíy ji wun dzə̀ kfə́ wír woó Juda, á sà yíi màʼtì kiŋaamè kfə́ ké liì kìn, é kí wáa kuy a?

⁵ Haman yiì lò, e yèn ji Mordekay yoʼ waà tsə̀m á ndzəə́ e wun si, e ghvə̀m wun, kilòŋ kí shwiíy wun e ŋàŋ.

⁶ Mo wù yuun fo Mordekay loòn, e nèn lò, e yèn ji bó yòʼ dzə̀ wun lòvtí a dzə̀ á e Mordekay wùn mòʼón. Wù nèn tàŋ ji bòŋ á ke wun yúyrí á wír veé Juda adzə̀m ve á dzə́ e virə̀ʼ ve Fòn Ahasuru sáʼá.

⁷ Vinyo vìn vi‑iì kooyì, a Fòn Ahasuru sí sáʼ ji kiyá nshòv sibaà e ghvə̀m. Wáa dzə e ŋwee mbìyi kù é kiya foo fèy, Haman ku nèn fə̀ə́r sáʼ ji á shwéŋ á fo fù wo áwune yoŋ ji Pur, e fíʼ kiíy a ŋwee wùn à kishiíy ke á wíy laàr wír veé Juda adzə̀m. Á shwéŋ, kí tiím é kishiíy kee nshòv sitaár e ghvə̀m fo ŋwee woo nshòv sibaà e ghvə̀m, a dzə̀ wo vé‑eè yòŋ ji Adar.

⁸ Á bèy, Haman ku nèn bùn fon, e sùúy jii, «Wír ámóʼó tàʼár a ne vitú vév, e shwìr wún á e wír fòné mvəm. Á sì á vishév ve wòŋ vidzə̀m vee fòn nsay. Nsər sév sí yòʼ fə̀m táti a sé wìr ámóʼó e fòn wòŋ, a bó áwune yòʼ yúnin a sáʼ yeé ntoʼ. Bìʼ bey, bó kfə́ə wìr vee béne yoʼ ghèén a ji fòn lem, aá wáa dzə e wun nsay.

⁹ Nyàr, a kí fey ghèén fon, fòn kù fə̀ə́r a sáʼ yee ji á laar á wír vìn. A fòn yiì bèy, bo wun yíi way a *kisha ke mbàm ke fəvír kí e fòn kitàv akilu kishóv ansə̀kì mkweè e ghiì taár (340,000), aá wáa yiì a vinyo veé wòŋ sho.»

¹⁰ Fòn nèn shòʼ ndzə̀ŋgwáŋ wo vé‑eè wáy e kifa, kí nèn a dìn kisəəm kee ji á fìnèr a fo ntoʼ. Wù shóʼ bey, e fò e Haman woo wan Hammedata, a wúnwun woo Haman‑eè dzə̀ ŋgaà vibàn wìr veé Juda.

¹¹ Wù fó bey, e yòŋ e Haman jii, «Ku nàʼ ké mbàm ki, e yiì e wír vìne mo à kòŋèn.»

¹² Á bèy, wáa dzə kishiíy nshòv sitaár e ghvə̀m fo ŋwee mbìyi, Haman ku nèn jàŋrì wír ve á yii sáŋ vinyo veé ntoʼ. Haman fəə́r sáʼ ye wù‑uù fəərin, aŋgàa saŋe ku nèn sàŋ, e tsə̀nsí e vé saʼ ve á sáʼ kitúme, e tsə̀nsí sa aàŋgàa saʼ ve á sáʼ vishév ve wòŋe, e tsə̀nsí aàtǎr laʼa. Vé‑eè lóo saŋ ŋwàʼ woó kitum, kìn dzə̀ kiné kí, kìn woó kishev ke wòŋ kiné kí, á kù sàŋ a dzə̀ e wír vee fóo làm, aá kù sáŋ bèy e Fòn Ahasuru yir, e fìnèr e ndzə̀ŋgwaŋ fòn.

¹³ Nsheèlav se fòn si ku nèn jàvtì aŋwàʼ vìy aàtǎr saʼ ve vé‑eè sáʼ vishév ve wòŋe adzə̀m. Vé‑eè sàŋ é mvə̀m aŋwàʼ ve vé‑eè jav vìn jii, á wíy ŋaʼáy kishiíy kimòʼón ke wíy a dzə kishiíy nshòv sitaár e ghvə̀m fo ŋwee woo nshòv sibaà e ghvə̀me, e yuyrí a wír veé Juda adzə̀m, kìn dzə̀ ŋgàywìr, kìn wánlè nsùm, kìn dzə̀ wiíy, kìn wán wo terí, e faàsì bùʼ wov.

¹⁴ Kinyo kidzə̀m ke vé‑eè saŋen é ŋwàʼ fèn ki‑iì dzə̀ ji á samer, é wìr dzə̀m woó kitum kiíy. Wù kiiyì, é wù wáa baʼtí kùm kishiíy kin.

¹⁵ Nsheèlav si ku nèn lì sáʼ rə̀y, e sàmèr cércér. Á kfən sàʼ sá e kinsàʼwày é ŋkàlaʼ fòn yee Susa. Fòn wùn Haman nèn dzə̀ʼə̀m ji á nó á meluʼ, á wáa no, a ŋkàlaʼ yee Susa sí bvəə́ri bvəə̀rín.