Esta 2 - ŊWÀʼ NYÙY

Á ghár Esta ji Yaà

¹ Vinyo vìn vi lòo shaà, a dòʼshwiíy wo wù‑uù kív Fòn Ahasuru kpúrín ne, wù keérí kwaʼtì kùm Vashti, e kuùmé sáʼ ye wù‑uù fəərin bìʼ kinyo ke Yaà Vashti‑iì yiìn.

² Nsheèlav se fòn si nèn lò, e shù jii, bòŋ aá tar á wónlě ŋgòn ve á toon sí, aá yóʼ ne kìíy lumèn, e wìy a sho e ntoʼ.

³ Kí nén a dzə jii, fòn shóʼtí á wíri fó vishev vee wun wòŋ vidzə̀m, aá báʼtí á wónlě ŋgòn ve á toon sí, aá yóʼ ne kìíy lumèn, e wìy sho e vikǐy ntoʼó nsàn, e ŋkàlaʼ yee Susa, fo ntoʼ fòn‑eè dzəə̀n. Á wiy sho, á wày á e nshìylav yee Hegay kiwo, ye yì leey fo vikǐy ntoʼo, é wù fó á biʼ ye á wáa sòr áwune shó, aá wáa biy.

⁴ Á bèy, fòn leey, yén wánlè ŋgòn wo wù toon sí, aá nèn yòʼ á ji yaà, é wù li kirə́ʼ ké Vashti. Nshù rə̀n gheén fon, wù ku nèn yiì réŋréŋ mo á kì shuùn.

⁵ Wáa dzə e ghan see shooy, a wìr woó Juda wùmòʼ dzə̀ é Susa, aá yoŋ yír rə́ ji Mordekay. Wù‑uù dzə̀ wan Jayir woo wan Shimey, a Shimey‑iì dzə̀ wan Kish wo yì‑iì dzəə̀n wír woó ram Benjamin.

⁶ Vé‑eè lì ne tàr wov Kish fo Jerusalem, e mvə̀m ŋgoo wìr ve vé‑eè koon, e dù sho e kwaʼ nsàm, a kù dzə̀ é ghan se Nebukadnessar woo fon woó Babilon‑eè tònèn fó, e koò Jekonia woo fon woó Juda, e dù sho.

⁷ Mordekay nèn wìy sìíy, e lìy wan fər tàr wov woo wiíy wùmòʼ, a yírí dzə̀ ji Hadasa. Wan woo wiíy və̀n wo á kfə̀n‑eè yoŋ sa yír yímóʼó ji Esta‑aà dzə̀ wan tsə̀, a wù bóŋ é ŋàŋ, e kfə̀n tò sí. Mo kitàr wùn à kiyìy kí‑iì kpukin ne, Mordekay nèn lì wun ji wán və.

⁸ Fòn yiì lò, e fò sáʼ ji á báʼtí á wónlě ŋgòn. Á nèn bàʼtí, e wìy sho e ntoʼ yeé Susa, a Esta dzə̀ sá wùmòʼ. Á nèn wày wun e Hegay kiwo, wo wù yii leey fo vikǐy ntoʼo.

⁹ Hegay yén Esta, wù tó sí rə́, e nèn shàv wun ji woo jeéy, e nèn kù tàv kèʼ, a fo wun biʼ ye wù wáa sòr, a biy, a dzə̀ ye á yii sòr vikǐy ntoʼ sho, e kfə̀n a fo wun viyíkìr vee jeéy ví. Wù‑uù lèm wun a dzə̀ é kirə̀ʼ kee jeéy kí, e vikǐy ntoʼó nsàn, e shòʼtí wónlě ŋgòn saàmbà ji á wáa lìm fo wun.

¹⁰ Mo Esta‑aà nəən é ntoʼ, wù yòʼ‑oò lo yòŋ fo rám rəə́‑əə̀ loòn, bìʼ fo Mordekay‑iì shaʼnin e wun.

¹¹ Mordekay ku nèn a dzə kfə́, a ghan, a kaarí a dzə̀ nsàn vikǐy ntoʼ kishiíy kidzə̀m, díʼtì díʼtì, ji wun ku yù á ji Esta sà dzə̀ é le á, a sà kooy ka wun a.

¹² Bo wánlè ŋgòn gheén fo a dzə̀ wù nə̀ə́ e Fòn Ahasuru faáy kishiíyí, bo á kù kér fóo sòr wún və́ e biʼi kiyá kifur. Vé‑eè lo, á sòr e meŋgvə́r me *mer mè ŋwee ntuùfú, e sòr e me *balsam mè wùn à virə̀ʼtìn ve bìʼ vímóʼ ví ŋwee wúmóʼó ntuùfú. Á mo vé‑eè lo, á yiì bey, é bo wiíy wáa kìʼ e bíyín.

¹³ Á mo wánlè ŋgòn kù‑uù kér fóo baʼtí kitú kfə́, e bóo dù, e yen fon. Wù‑uù lo fo vikǐy ntoʼó nsàn, lóo dù e faáy kishiíyí, á fò kifá kidzə̀m sho ke wù koŋè.

¹⁴ Wù shiiy e ntoʼ e ŋkuùr, lóo dzə kijàvndzə, á nèn fə̀ə́r wun, e dù sho e mbìv ye sən e vikǐy ntoʼó nsàn. Á du sho, Sha‑Ashgas wo wù‑uù leey fo vikìy ve fòn‑eè lèmèné nèn a leéy fo wun. Kèʼ fo kishiíy fóo fèy, bó yòʼ‑oò dzə̀ wù dzəə dù e faáy kishiíyí, a bó fòn toóy wun toóyín.

¹⁵ Ghán sí dù ghèén lèn se yì‑iì siìn gháy Esta ji wù du, e yèn fon, a wun woo Esta‑aà dzə̀ wan Abihail woo wan fər tàr à Mordekay, é bo Mordekay sə́, e lìy. Esta lòo dù e faáy kishiíyí, e làa yòʼ dzər kifá. Wù kù‑uù màʼ a dzə̀ vifá ve Hegay woo nshìylav fòn ye yì leey fo vikǐy ntoʼo‑oò tirin wun ji wù maʼ. Yii bèy, wìr dzə̀m wo wù‑uù yenen Esta kù‑uù lèéy wun, a kòŋ.

¹⁶ Yì‑iì dzə̀ é ghan sin, a Fòn Ahasuru sáʼ ne vifon kiyá saàmbà. Vé‑eè lì Esta, e dù sho e faáy kishiíyí, a dzə̀ é ŋwee wo wú meen ji ghvə̀m, aá yoŋ ji Tebet.

¹⁷ Fòn dù, e yèn Esta, wù tó sí rə́, e shaà vikǐy ntoʼ adzə̀m. Wù wáa kòŋ Esta e ŋàŋ, e shaà wónlě ŋgòn ve vé‑eè wìyìn shó e ntoʼ adzə̀m. Fòn nèn kù sòv tán viyaà é kitu wo, e lèm ji Yaà, wù lì kilíŋ ke Vashti.

¹⁸ Fòn nèn kàʼ ŋkàʼ wo kuʼùné bìʼ Esta, e bì atǎr ntoʼ və́ wùn à nsheèlav sə́ sí. Wù kfən fò sáʼ ji kishiíy kee shooy ki kù dzə̀ á kishiíy ké bam e wun wòŋ, ke á kú a lèm virə́ʼ vidzə̀m. Fòn kfən jàvtì ambùʼmé e kishiíy fóo fèy, e kù jàvtì, mo liì woó ntoʼ yii dzə́.

Mordekay tín fon fo kpúu

¹⁹ Á kfən wìy lòo baʼtí wónlě ŋgòn ve á yóʼ ne kìíy lumèn, a Mordekay sì kibay ke fòn.

²⁰ Esta kú a dzə kfə́ é ntoʼ, e làa yòʼ toʼ mo rám yéví ghanen réŋréŋ mo Mordekay‑iì tirin wun. Wù kù‑uù dzəə́ yúnin Mordekay mo wù‑uù yúnin e ghan se wù‑uù liy wun.

²¹ Kù mo Mordekay‑iì shiy ntoʼ, Bigtan wùn Teresh ve vé‑eè shiy shúu kibùʼ ke fòne nèn lò, e shwìíy kilòŋ wùn à Fòn Ahasuru, a woŋ wuú fòn ji á yúyrí.

²² Kinyo kìy ki tó e Mordekay kitùʼùr, wù suúy e Yaà Esta. Yaà nèn lì kilíŋ ke Mordekay, e bùn fon, e fìʼtì sho.

²³ Á tàr kinyo kév, e yèn ji dzə̀ á suuyrú, e nèn wàyrí akfəə̀ aáwune vee abàá kilòŋ, e sə̀ŋ é kici, áwune kpúkír. Á nèn sàŋ kinyo kìn e ŋwàʼ wo á yii sáŋ vinyo veé wòŋ sho, a fòn kù dzə́, yéné.