Esra 4 - ŊWÀʼ NYÙY

Aŋgàa vibǎn lav Nyùy ye á kfə̀n baʼrì

¹ Aŋgàa vibǎn wìr veé ram Juda wùn Benjamine yú ji wír ve vé‑eè kfənen é bàmé sí baʼrì a lav cù Nyùy Tàr wo dzəə̀n Nyùy woó Isray,

² áwune nèn dù, e yèn Serubbabel wùn aàtǎr kfəə Israyi, e sùúy aáwune jii, «Vèsən tátí, a bàʼrì lav Nyùy Tàr, bìʼ fo kù dzəə̀n sá Nyùy wo vèr yii cu, a vèr‑iì sí seéri nyám si, cu wun sho, e kèʼ fo ghan se Fòn Esar‑Hadon woó Assiriya‑aà wìyìn e vèr fen.»

³ Yii bèy, Serubbabel wùn Jeshua, aàtǎr kfəə veé Israyi nèn bìnèr aáwune jii, «Bó yòʼ dzə̀ vèn tàtí ver, é bo á baʼri lav Nyùy wor. Kù yíi bom ver lav Nyùy Tàr, wo dzəə̀n Nyùy woó Isray, kù mo Sayrus woo fon woó Persia‑aà foon sáʼ ji vèr baʼri.»

⁴ Wír ve vé‑eè dzə́ e nsay foo fèyi nèn a sèmèr kóy wìr veé Juda, a yiì, áwune wáa fàn fó a bàʼrì.

⁵ Vé‑eè làʼ vé nsəri ji á wáa bvəə́r a kwaʼtì yév, e kèʼ fo ghan se Fòn Sayrus‑iì sáʼ woŋ Persia, e dù meé e sé Fòn woo Darius si.

Aŋgàa vibǎn Jerusalem wo á kfə̀n baʼrì

⁶ Fòn Ahasuru wìy kèʼ e lòo saʼ vifon və́, aŋgàa vibàn víne nèn a saŋ vinyo e wír ve vé‑eè dzə́ e Juda wùn à veé Jerusalemé bàm.

⁷ Kfən lòo dzə e ghan se yì‑iì sí sáʼ Artakerkes woŋ Persia, wír ámóʼó kfən sàŋ ŋwàʼ fo fòn, a yì‑iì dzə̀ Bishlam wùn à Mitredat, à Tabeel, à kibér ke wìr ke yì‑iì dzəə̀n aŋgàa ŋgoo vév kí. Vé‑eè sàŋ ŋwàʼ və̀n e Lǎm Aramayik, e kù sàŋ a dzə̀ e sí se ŋwàʼ seé làm woo shooy si.

⁸ Rehum woo taà ntoʼ wùn Shimshay woo ŋgaà saŋ woó ntoʼ nèn lò sa kév é ghan fóo fèy, e sàŋ sá ŋwàʼ e wír veé Jerusalemé bàm, e fò e Fòn Artakerkes.

⁹ Wír ve wùn áwune‑eè saŋen ŋwàʼ və̀ne dzə̀ aŋgàa ŋgoo vév vee jii, atǎr nsaʼ, wùn aàŋgàa saʼ bàràʼa, à vé lìm bàràʼa, a kù‑uù dzə̀ wír ve vé‑eè loòn fó Persia, wùn à fó Erek, à fó Babilon, é bo ámóʼó lo fó Susa, e wòŋ woo Elam.

¹⁰ Á kfə̀n‑eè tàtí sá kibér ke wìr kidzə̀m ke Fòn Osnappar woo kighvə́m ke wìr‑iì koorin, e wìy dzə̀ʼə̀r e ŋkà se laʼ seé Samaria, e bóo dzə̀ʼə̀r ámóʼó é virə̀ʼ vímóʼ ví é mbìv wòŋ foo fèy ye yì dzəə̀n, aá líysín ne ndzə́v yee Yufret, e mbìv yee fo shùy yii nəə.

¹¹ A ŋwàʼ və̀ne‑eè dzə̀ jii: «Sàŋ ver vee aŋgàa lìm fòn ve á dzəə̀n é mbìv wòŋ yee fo shùy yii nəə ŋwàʼ və̀n fo Fòn Artakerkes. «Nyàr, ver vine shaʼtì a wun,

¹² a vèr taʼ e yiì, aá kiíy fó ntoʼ a ji wír veé Juda ve vé‑eè loòn fo wun wòŋ, e wìy, e yèn ver fene dù a ne, a dzə e Jerusalem, aá kfə̀n sí bóm a ŋkàlaʼ rə̀y ye dzəə̀n ye antavkìtu, wír, aá kér yii ye bií. Áwune sí maysì a kay, kfə̀n náŋsin a kinsə̀ŋ.

¹³ «Nyàr, vèr ku kfə̀n a suúy a jii, aá lòo dzə e màʼtì ji wír vìne kfən bòm á ŋkàlaʼ rə̀n, e màysì wùn à kayi, bo áwune yòʼ dzəə́ yiì a màʼ a mbàm, a fo nsùʼ wùn à vidzə̀ ví, e bóo lì nshwì, é kitáv keé ntoʼ ki nèn waà shùŋrìn.

¹⁴ Kí nén a dzə a jii, ver ve vèr tíy kér vèr à fòne yòʼ koŋ, e yen a kinyo ke a dzə̀ kí shòór fon, e màʼtì. Á kinyo ke kí yiìn á, bo vèr wáa fo sáʼka və̀n e ntoʼ. A vèr yén a ji

¹⁵ bo á kì kòʼ á kitáv ké aŋwàʼ ve atàr vəə́‑əə̀ saŋen á fo ŋgùʼ, e tàr a fo fo. Á yíi yen a ji ŋkàlaʼ rə̀n‑eè dzə̀ á ye antavkìtu, a vé‑eè sí fó a ŋgeʼ aàfone wùn aàŋgàa saʼ veé vishev ve wòŋe. A yì‑iì sì á kirə́ʼ ké melaà ki, e kèʼ fo yàŋgùʼ. Á kinyo ke kí‑iì yiìn, é bo á laar á fó.

¹⁶ Vèr nen kù a bùn fon a jii, aá màʼtì, wír vìne kfən bòm kay wùn à ŋkàlaʼ rə̀n, bo fòn yòʼ dzəə́ wìy a ker a kifá fo mbìv wòŋ ye á liysin ne Yufret rə̀n.»

¹⁷ Fòn‑eè yù bey, e nèn tsə̀nsí binèr jii: «Á sáŋ ŋwàʼ və̀n fo Rehum woo ŋgaà saʼ wùn Shimshay woo ŋgaà saŋ fòn, e lì kibér ke aŋgàa ŋgoo vév ve á dzə́ e Samaria, e kfə̀n a dzə e virə̀ʼ vímóʼ ví é mbìv wòŋ ye á liysin ne Yufret, a sì é mbìv yee fo shùy yii nəə. «M nén a shàʼtì ven, a suúy jii,

¹⁸ á dzə̀, aá bínér ŋwàʼ wo vèn‑ee saŋen vəy, e yòŋ, m yú kijuujùŋ.

¹⁹ Mò‑oo lo fò sáʼ, vé‑ee tar, e yèn ji ŋkàlaʼ rə̀n‑eè sí fó rú á ŋgeʼ aàfone, a yì‑iì dzə̀ kirə́ʼ ké antavkìtu, e kfə̀n a dzə kirə́ʼ ké melaà ki.

²⁰ Á kfən yèn sá ji afon ve tavkíné‑eè sì á e Jerusalem, a vé‑eè sùm á mbìv wòŋ ye á liysin ne Yufret fo shùy yii nəə e dzə̀m, e nèn a saʼ, a baʼtí mbàm se maʼàn sí wùn à nsùʼ, à nshwìí, vifá vìn vi wáa gòʼ a dzə̀ aáwune.

²¹ Bo kí dzə̀ jii, vèn fó sáʼa ji áwune tiír á lim, e làa yòʼ dzə́ə a bom a fó, e meé mo m kfə̀n wíy fo sáʼ.

²² Vèn wáa yen fóo lì kinyo kìn fo tèr. A dzə̀ á yèe, e bóo màʼtì ji ŋgeʼ si wiy, é sáʼ yémé bvəə́rí.»

²³ Mo á duùn, e yòŋ ŋwàʼ Fòn Artakerkes və̀n e Rehum wùn Shimshay woo ŋgaà saŋ fòn wùn aàŋgàa ŋgoo véví, áwune ku nèn tùmnín, e dù e Jerusalem, e kàntì wír veé Juda, á tiír kibaʼrì ke ŋkàlaʼ.

Á kfən kèʼ, a bàʼrì lav Nyùy

²⁴ Vé‑eè sə̀r kibaʼrì ke lav Nyùy e Jerusalem kí nèn kù a tiy, e dù, e meé e kiya ke kí‑iì meen ji baà mo vé‑eè koʼorin Darius ji fon woó Persia.