Esra 3 - ŊWÀʼ NYÙY

Á kfən bòm kíy cù

¹ Mo wír veé Israyi kfənen, wáa dzə e ŋwee woo saàmbà, a wìr dzə̀m dzə́ʼə́m ne e wun kirə̀ʼ, á nèn wìy e Jerusalem wír adzə̀m, e bàʼtí ji wír amòʼón.

² Jeshua woo wan Josadak wùn aàfə́r və́ vee atàá cùu nèn tàtí wùn à Serubbabel woo wan Shealtiel wùn aàfə́r vəə́, wùn áwune bóm kíy cù Nyùy woó Isray, kíy wo á yíi a yiì cu se tonèn sí shó réŋréŋ mo Mooser woo ŋgaà lìm Nyùy‑iì saŋen e wun Ŋwàʼ Nsər ji dzə̀ á kù a yiì.

³ Mo fan wìr vee áwune ghaŋe fə̀m‑eè dzəə̀n aáwuné meliv, á ku bòm kíy cù fo wú‑uù dzəə̀n, e nèn a yiì cu Nyùy Tàr ye tonèné shó, yee kijàvndzə wùn à yee ŋkuùri.

⁴ Áwune nèn kfə̀n a ker sa *Ŋkǎʼ Tàv sé Ghan mo kí kù‑uù dzəə̀n sá kisáŋén wùn à cu se tonèn sí e kishiíy mo nsər‑iì dzəə̀n.

⁵ Vé‑eè yii sa cu ye tonèné yee ghán sidzə̀m wùn à yé ŋwee wo fíyi, à yé ŋkàʼ sé Nyùy Tàr see jeéy sí, e bóo lì yé kimbòŋwùn ye wìr yii e Nyùy Tàr.

⁶ Vé‑eè kèʼ a yiì cu Nyùy Tàr ye tonèné a dzə̀ é kishiíy ké mbìy ki fó ŋwee wo wú‑uù sí mee ji saàmbà. Á wáa yiì bèy, a bo á yóʼ ne fə̀m kèʼ, a bàʼrì lav Nyùy Tàr.

⁷ Áwune nèn fò mbàm e vé lìm tiyí, e kfə̀n fò e vé lìm vicií, e nèn fò vifá ve yi wùn à meluʼ mè, à meŋgvə́r mè e wír veé Sidon wùn Tayàa ji áwune fiʼ tsə̀nsí a vicí vee *sidar fo Lebanon, é ví wiy é Joppa dzə́ə fó ndzəv. Vé‑eè yiì vinyo vìn vidzə̀m a dzə̀ mo Fòn Sayrus woó Persia‑aà foon sáʼ ji dzə̀ á wàa yiì.

Á kfən kèʼ, a bàʼrì lav Nyùy

⁸ Wáa dzə e ŋwee woo baà fó kiya ke kí‑iì meen ji baà mo áwune‑eè kfənen é Jerusalem, e kirə̀ʼ ké lav Nyùy, á nèn kèʼ lim ji á kfən bàʼrì a lav Nyùy fo. Wìr dzə̀m wo wù‑uù kfənen é Jerusalem tátí, a lìm, e kèʼ fo Serubbabel woo wan Shealtiel wùn Jeshua woo wan Josadak, e lì atàá cù wùn à wír veé ram Levi adzə̀m. Áwune‑eè lèm wír veé ram Levi vee kèʼ fó kiya mbaà, a koʼ koʼón ji á wáa leéy a kibaʼrì ke lav Nyùy Tàr ye á kfə̀n baʼrì rə̀n.

⁹ Jeshua wùn à wóné, aàfə́r vəə́ nèn tàtí Kadmiel wùn à və́ vee wóné, a dzə̀ rám Hodavia, á wáa leéy wír ve á baʼrì lav Nyùy Tàr. Wón Henadad ve kù‑uù dzəə̀n sá wír veé ram Levìi wáa sə áwune.

¹⁰ Vé kimbome wáy kinsə̀ŋ ke lav Nyùy Tàr, atàá cùu nèn màʼ ndzə̀y sé cù, e wìy, e tìím fo, wùn à sóŋ sí é wo. Wír veé ram Levi ve yì‑iì dzəə̀n kfə́ə Asavi‑iì tìím sá fo wùn à vifá ve kwaʼán ví. Á nèn a sùyrì Nyùy Tàr réŋréŋ mo Fòn Davir woó Isray‑iì naàrìn.

¹¹ Vé‑eè yov, suyrì Nyùy Tàr, beerì wun, kooy jii: «Nyùy Tàr dzə̀ e juŋ, a koŋ ye wù koŋ wír vəə́ yòʼ wíy mày.» Wìr dzə̀m nèn a ndzəʼ kitaátávín, a burí Nyùy Tàr bìʼ kinsə̀ŋ ke lav cù ke á wayin ne.

¹² A ŋgày sé wìr se sí‑iì yenen lav cù yee ye mbìy si‑iì dzə̀ fó. Ámóʼó‑oò dzə̀ atàá cù, ámóʼó, wír veé ram Levi, é bo ámóʼó wáa dzə atǎr kfəə. Áwune yén, aá kfən wày kinsə̀ŋ ke lav cù wáyín, kùʼùn wìr vee shooy nèn bùr kév a dzə̀ tóŋ. Yii bèy, a màŋgòŋ kù‑uù shéʼri kév sheʼrín.

¹³ Bó yòʼ‑oò dzə̀ wìr kìíy jeéyjeéy fó kinyò ke kí kooyì, bìʼ fo ŋkěŋ kisheʼrìi‑iì tatin ne, e ghàmnìn wùn à tóŋe, kiléŋléŋ kí wáa dù kwaʼda.