Esra 1 - ŊWÀʼ NYÙY

Sayrus siír wír veé Juda, á kfə́n é bàm é Jerusalem

¹ Yì‑iì dzə̀ é kiya ke vé‑eè koʼorin Sayrus ji fon woó Persia, Nyùy Tàr nèn yiì, kinyo ke wù‑uù yòŋèn, e shaà fo *ŋgaà ntum və woo Jeremia ki gheén. Nyùy Tàr‑iì kùm shilív shé Sayrus, wù fó sáʼ, yí ghánén woŋ və́ e dzə̀m, e kfə̀n sàŋ sá aŋwàʼ, á ghánén.

² Wù‑uù sàʼ jii, «Nyùy Tàr woo Nyùy woó yuv fò ne vitúm vidzə̀m veé kitu ke nsay e mò ji m wáa saʼ, e kfə̀n shòʼ mo ji m baʼri á lav rə é Jerusalem, e wòŋ woo Juda.

³ Kí nén a dzə jii, ven ve dzəə̀n wír Nyùy Tàr adzə̀m, a dzə̀ vèn wàa kfən e Jerusalem e wòŋ woo Juda. Du, aá kfən bàʼrì lav cù Nyùy Tàr, wun woo Nyùy wìr veé Isray wo wù dzəə̀n é Jerusalem. Vèn lóo dù, é Nyùy won kú a dzə vèn áwune.

⁴ Ké wír ámóʼó kí dzə̀ jii, vé nsàm víne yíi lòo dù, é wír ve wùn áwune dzəə̀n kirə́ʼ kimòʼóné sə́ áwune, e fò *kisha ke mbàm ke fəvír kí wùn à ke baar kí, à vifá veé shií vímóʼ ví, à kfəə́ se nyàm se liyìn sí, e bóo lì cu kimbòŋwùn ye á fó bìʼ lav Nyùy yeé Jerusalem.»

⁵ Á bèy, vilìmbìy veé ram Juda wùn à veé ram Benjamin vi, aàtàá cùu, à wír veé ram Levìi, e lì wir dzə̀m wo Nyùy‑iì kùmèn shilív sə́, nèn ŋàʼáy, a dù ji á kfən bàʼrì a lav Nyùy Tàr yeé Jerusalem.

⁶ Wír vee áwuné shweesií nèn tòm áwune e vifá vi. Vé‑eè fò vifá ve ker ve á fèrìn e kisha ke mbàm ke fəvír kí wùn à vee kisha ke mbàm ke baar kí, e fò vifá veé shií wùn à nyám si, e kfə̀n fò afómo veé kilùm ámóʼó, e bóo lì vifá ve á foon ji cu kimbòŋwùné.

⁷ Fòn Sayrus nèn lò kfə́, e fə̀ə́r vifá ve yì‑iì dzəə̀n veé lav Nyùy Tàr, a dzə̀ vifá ve Fòn Nebukadnessar‑iì bèʼèyìn fó Jerusalem, e wìy sho, e tìír e wun kirə̀ʼ ké anyùy.

⁸ Fòn fəə́r vifá vee shooy bèy, e wày e Mitredat woo ŋgaà kitǎv kiwo, wù táŋ, e fò e Shes‑Bassar wo dzəə̀n ŋgaà saʼ woó Juda.

⁹ A vifá vee shoon vi‑iì dzə̀ jii, vikóŋ vee kisha ke mbàm ke baar kí mtaár, vikóŋ vee kisha ke mbàm ke fəvír kí nsə̀kì, à vifá vímóʼ ví vee kisha ke mbàm ke fəvír kí nshòv bvə̀ʼə̀ e mbaà,

¹⁰ à vighín vee kisha ke mbàm ke baar kí mtaár, à wón vighin vee kisha ke mbàm ke fəvír kí, kishóv ghvə̀m e ghiì kweè (410), à vifá ve ker vímóʼ ví nsə̀kì.

¹¹ Vifá vìn vidzə̀m vi‑iì dzə̀ kishóv ghii kweè aànsə̀kìi atàn (5,400), a kù‑uù dzə̀ vifá vee kisha ke mbàm ke baar kí, à vee kisha ke mbàm ke fəvír kí. Shes‑Bassar nèn wìy e vifá vìn vi vidzə̀m e ghan se wír veé Juda ve vé‑eè koon, e dù sho e Babilone‑eè kfə́n e Jerusalem.