Esiker 7 - ŊWÀʼ NYÙY

Ghán se Isray lo, e mày si sì fó mentsə̀m

¹ Nyùy Tàr kfən lò, e sùŋnín e mò,

² e yòŋ jii, «Wàn wìr msòŋ, ke Nyùy Tàr woo Taà Ndzə suuy e wòŋ Isray ki dzə̀ jii, ‹Ké wòŋ wón kí sèéy ne lèn. Woŋ wóné mày ne, e dù, e bàʼ e buu see sikweè.

³ Ghán sén sí ghèén ne lèn, a m lo, e lovtí e vèn mo dòʼshwíiy wom dzəə̀n. M yíi tiír ven é kibàʼ, e saʼ mo yii yéné dzəə̀n, e màʼ ŋgeʼ e věn kitu, bìʼ joonè wo vèn yii e dzə̀m.

⁴ Bó m yòʼ yíi leéy ven, e bavtí, a bó m yòʼ yíi a rər mendzən fo vèn. Ké ru kí, m yíi làʼ ven e ŋgeʼ mo yii yén vinyòo dzəə̀n, é vèn yén seʼ liì kisaŋ wo wù dzəə̀n e věn mvəm. Kù bey, é vèn nèn kìíy ji m dzə̀ á Nyùy Tàr.› »

⁵ Nyùy Tàr woo Taà Ndzə yoŋ jii, «Rìʼí lo, e gbù e věn kitu. Ké ru kí, a wú kù‑úù gbu.

⁶ Kindzəysì ké vinyò ki wìy ne, kinjòʼsì kén kí sì é kiwo, kén kí mày ne. Rúrú, kinjòʼsì kén kí wìy ne.

⁷ Lòné shòʼ ne ven ben, ven ve á dzə́ e wòŋ fèn. Ghán sí ghèén ne. Kishiíy kí sì fó mentsə̀m, kishiíy ke wíri wíy a fàn, a buʼ shirəə́, a bó à yòʼ wíy a yu, aá maʼ kinseŋ fo agwan.

⁸ Ké lèn ki, m kù sí lo, e lovtí e vèn mo dòʼshwíiy wom dzəə̀n, é bo kinyo ke kí kív mo kí may. M yíi tiír ven é kibàʼ, e saʼ mo yii yéné dzəə̀n, e màʼ ŋgeʼ e věn kitu bìʼ joonè wo vèn yii e dzə̀m.

⁹ Bó m yòʼ yíi leéy ven, e bavtí, a bó m yòʼ yíi a rər mendzən men. M yíi làʼ ven e ŋgeʼ, é vèn yén seʼ liì kisaŋ wo wù dzəə̀n e věn mvəm. Kù bey, é vèn nèn kìíy ji m dzə̀ á Nyùy Tàr wo dzə̀ wù màʼ ŋgeʼ e wírí kitu.

¹⁰ «Rúrú, kishiíy kí sì. Ké ru kí, kí wìy ne. Kishiíy ké lòn kí mèʼ ne bèn. Nə̀ʼsì won kùy ne e ŋàŋ, kiŋkoʼòrwùn kén kí gháʼnín.

¹¹ Vinyo ve buʼtìn ví kùy ne, e dù ji ŋgwàn nə̀ʼsì. Bó ŋgaà nə̀ʼsì yòʼ‑óò bér, kìn dzə̀ bùʼ wov, kìn kéŋ yév, a bó kifá keé shií kí yòʼ yíi gòʼ e wòŋ.

¹² Ghán sí wìy ne, kishiíy ké ŋgeʼ ki sì fó mentsə̀m. Lá ŋgaà yun yòʼ a sheʼrí. Lá ŋgaà fiìnè yòʼ a dìy, bìʼ fo ŋgeʼ se m lo, e màʼ si yíi gbù e wìr dzə̀m kitu réŋréŋ.

¹³ A wìr tìír kirə́ʼ, e fə̀m shìíy, e kòŋrí móo le, bo yòʼ dzə̀ wù dzəə wìy yù fóo dù e kitu wo, bìʼ fo dòʼshwiiy Nyùy Tàr wíy koo wir dzə̀m. A bó yòʼ dzə̀ wìr liì kisaŋ kiŋsìn kitú kfə́.

¹⁴ Á tòŋ ne sóŋ, e bàʼtí, e taàmé rə́r, yii bèy, a bó wìr wo wù‑úù du é shùu rər yòʼ dzə̀, bìʼ fo dòʼshwíiy wom siìn e wìr dzə̀m kitu.»

Ŋgeʼlàʼ Isray

¹⁵ Rə́r sí yíi a teè wíri é ghaŋ se ŋkàlaʼ, é kifə̀ʼ wùn à jìŋ wáa yuyrí e mvə̀m ŋkàlaʼ. Wìr lóo dzə e ndzə, é wù kpú yé rər, wìr lóo dzə e mvə̀mlaʼ, e wù kpú yé jiŋ, kìn yé kifə̀ʼ.

¹⁶ Wìr sénin, léʼé, é wù wáa som e gwan, a toŋ moo kibìŋ ke kí meé fo kiwoóy. Wìr dzə̀m kù wíy a dìy bèy, a wìr kù táŋ a dzə̀ vinyo ve bi ví ve wù bùʼtìn.

¹⁷ Wó wìr dzə̀me wíy a yàʼtì, é ŋkoŋ si wáa leŋ leŋén moo mendzə́v.

¹⁸ Á wíy way vifám vé kpu, é wìr dzə̀m kú a ker a dzə̀ kindzə́m. Á wíy kwaày vitú, é wìr dzə̀m wìy a woomé.

¹⁹ Á wíy shwèy *kisha ke mbàm ke baar kí, à ke fəvír kí é màdzəə̀ moo kifá ke *kifàn kí bey. Bó kisha ke mbàm ke fəvír kí, à ke baar kí yòʼ wíy sə wír e kishiíy ke dòʼshwiiy Nyùy Tàr wíy koʼ. Bó yòʼ dzə̀ áwune wìy lùŋ fo fo, kìn ji áwune yún kifá sho, e tòm vitó sho. Yì‑iì lèvtí vifá vìn áwune, é bo á buʼti vinyo.

²⁰ Vé‑eè ràʼsì wún shó e ŋàŋ, e nèn lì, e fèr a dzə̀ mebvə̀m sho, vifá, a ví kóʼoyì. Mo áwune lovtin bey, Nyùy Tàr nen yiì, bùʼ wov kfə́n ji kifàn fo áwune.

²¹ Nyùy Tàr suuy jii, «M wíy kaynín bùʼ won, é vitúm vi wáa kuúy ji nsàʼmboʼ, e fo e wír liì kisaŋe ji kiyínsam, aá lór lorín.

²² Vitúm vi wíy nəə́ e kirə̀ʼ kee fo dzəə̀n ji tím yém, é la m yòʼ a ghay. Wír tàkìŋàʼa wíy nəə́ fo, e bìnèr fó ji kirə́ʼ ké kifàn kí.

²³ «Kirə́ʼ kidzə̀m ki kù sí bvəə́ri bvəə̀rín, a nsay sì mensə́ mensə́, a wíri kù buʼtì vinyo búʼtin é ŋkà se laʼ. Bìʼ bey, á fer sháŋ e nín, wóo koo áwune, e kur sho.

²⁴ M wíy tsənsí vitúm, a dzə̀ ve ví tìŋèn é ŋàŋ, é ví wiy, e yòv lav sén. M wíy səʼə́r kiŋkoʼòrwùn ké antav vén, e yiì, é vitúm vi bívír virə́ʼ vén vé cù.

²⁵ Ŋgeʼ wíy gbù, aá wáa lon nyaáŋ, e laà yòʼ a ker.

²⁶ Ŋgeʼ wíy a nyoòrì yìmòʼ, é sáʼka wo bi wáa ruvtí e wùmǒʼ kitu. Vèn wíy a tàʼ *ŋgaà ntum Nyùy wo wù wáa toʼtí vinyo, e làa yòʼ a yen. Bó taà cù yòʼ wíy a ker kinyo kée yeʼéy wír sho, a bó ŋgày sé wìr si yòʼ wíy a ker ntir yée tir wír sho.

²⁷ Fòn wíy a dìy, áàtǎr saʼa méŋ fóo kfən, é wìr dzə̀m wáa fàn, a yàʼ. M wíy màʼ ŋgeʼ si e věn kitu mo a dzə̀ vèn wàa tàʼ, e saʼ ven réŋréŋ mo njiìn won dzəə̀n. Kí kooyì, é vèn kiíy ji m dzə̀ á Nyùy Tàr.»