Esiker 44 - ŊWÀʼ NYÙY

Shúu kày woó mbìv ntoshùy

¹ Kee shooy ki shaà, wìr və̀y nèn lì mo, e kfə̀n shó e shùu kày lav cù, fo ndzə, e mbìv yee fo shùy yii tó. M lòo leéy, e yèn, a shuu woo shooyi dzə̀ e sə́tín.

² Nyùy Tàr nèn yòŋ e mò jii, «Shúu kày və̀ne kù sí wìy a tiy e sə́tín. Á yòʼ dzəə́ wìy mvə̀ʼ, a bó wìr yòʼ kfə̀n dzəə́ wìy nəə́ fo fo. Kí dzə̀ bey, bìʼ fo mo woo Nyùy Tàr woo Nyùy wìr veé Isray, m shaà ne fo fo, a wú kù gòʼ ne bèy.

³ Kù mày taà saʼ cáʼ, wo a wù yiì cu, e màysì, wù dzə̀ʼə̀m fó, e yì vifá ve cù e mǒ si. Wù kù wíy a nəə́ dzə́ə fó kibùʼ ke maàndzə ye kuʼùn, e kfə̀n a fəə a dzə̀ fó fo.»

Wír ve bó yòʼ dzə̀ á nə̀ə́ é mvə̀m kày lav cù

⁴ Kee shooy ki lòo shaà, wìr və̀y lì mo, e dù sho e shùu kày lav cù, e mbìv ye yì kiʼ kuy, e shùu lav cù. M leéy lav cù Nyùy Tàr, a vikuʼùy vé Nyùy Tàr ví rún fó, a njàʼkìr. M nèn gbù kfə̀ə́kfəv, e tsə̀m sí e nsay.

⁵ Nyùy Tàr nèn yòŋ e mò jii, «Wàn wìr msòŋ, leéy, e səə̀m kijuujùŋ, e yuùrí kinyo ke m yoŋ e wò kùm nsər see bìʼ lav cù Nyùy Tàr, à ntò se vinyò see fó si sidzə̀m. Ku səə̀m kijuŋ kfə́ə wìr ve dzə̀ á tò shúu kày lav cùu, à ve bó yòʼ dzə̀ á tòó.

⁶ «Suúy e wír veé Isray vìne, mo dzəə̀n antavkìtuu, ji ke Nyùy Tàr woo Taà Ndzə suuy ki dzə̀ á jii, ‹Wír veé Isray, vèn ku màʼtì liì joònè wo vèn yii və̀n.

⁷ Vèn màʼtì ne ambuʼŋgàŋ, á nəə́kír e mǒ lav cù. Wír vìn, a bó á yoʼ sàŋ mbèʼ sév, a bó melív mev mè yòʼ tíy e mǒ wùn. Vèn máʼtí, á wáa wìy e kirə̀ʼ fo vèn yii cu sém e fóm se nyàm si, à mensə́ mè, e nèn bìvír kirə́ʼ kém ké cù. Vèn shòʼór ne *mensaŋ me mò‑oò gwàrìn vèsən, e nèn dzə̀sì jay və̀n e kitu ke joònè wo vèn yii e dzə̀m.

⁸ Kì yíi a leéy ven vinyo vém é lav cù vidzə̀m, vèn ló kén fó fo, e fò ghay aàmbuʼŋgàŋe, á wáa tiy e vitu ve lìm seé lav cù.›

⁹ «Ke mo woo Nyùy Tàr woo Taà Ndzə suuy ki dzə̀ jii, ‹A dzə̀ wir kitum, a bó á yoʼ sàŋ mbèʼ se ŋgaàŋ, a bó shilív sə́ shí yòʼ tíy e mǒ wùn, bo yòʼ dzə̀ wù nə̀ə́ e mǒ lav cù, a wù fə̀m dzə́ e wír veé Israyí mvəm.› »

¹⁰ «Ké wìr veé ram Levi ve vé‑eè bìnèn ndzə̀m e mò, a ghvəm mebvə̀m e ghan se wír veé Israyi‑iì màʼàyìn mo, áwune kù wíy a beʼ ŋgeʼ kinyò ke áwune‑eè mùmèn.

¹¹ Á kù wíy a lìm e shùu kày woó lav cù, a yiì lim seé mvə̀m lav cù, a seerí nyám se cù ye tonèné, à sé cù símóʼ sí se wíri wiy sho, e kù a dzə fo ji á wáa lìm a fo wír vee shooyi.

¹² Mo áwune‑eè duùn ne, e tsəə̀né wír veé Isray, á nəə́ é jay, a ghvəm mebvə̀m, bo m kan, kér kiwó e yuv, liʼì, ji áwune kù wíy a beʼ a ŋgeʼ vinyò vév ve bi ví.

¹³ Bó yòʼ dzə̀ áwune wìy kòʼtí e mǒ si moo atàá cù ji á yii cu yém, bo taaka ji á kum kifá fo vifa vee jeéy ví, e bóo jànèr, e kùm vee jeéy vee wúntí víwun feyì feyì. Áwune kù wíy jòʼ a dzə̀ é dzə̀rkìtu wo beʼén bìʼ joonè wo áwune yiìn.

¹⁴ Yii bèy, m kù yòʼ wíy lèm áwune ji á wáa leéy a fo lìm seé lav cù, a yiì melílim mee fó medzə̀m.

Atàá cù

¹⁵ «Ké wìr veé ram Levi ve dzəə̀n atàá cù vee ràm fó Tsadok, dzə̀ áwune ve vé‑eè gòʼòn, a tiy e shùu lìm e mǒ lav cù. Áwune kù wíy a ŋèʼrì, a wìy e mǒ si, a yiì cu sém. Á kù wíy a wìy e fóm si wùn à mensə́ mè, a nàn e mǒ si. Suuy mo woo Nyùy Tàr woo Taà Ndzə.

¹⁶ Áwune wíy a nəə́ e mǒ lav cù, a koʼtí e mǒ ghaa kiy cù, a yiì lim see fó e mǒ si.

¹⁷ Á lóo soorí kibuʼ, lóo nəə́ e maàndzə yee fó mvəm, á màʼ a dzə̀ ndzə̀y see làv wo kpuún. Lá áwune yòʼ wìy a ker ndzə̀y see bá e wuy nyàme é wùn é ghan se á nəə e maàndzə yee fó mvəm, kìn á nəə e lav cù.

¹⁸ Áwune kù wíy a ker tán ye ndzəméné é kitu, a kù dzə̀ ye á fèrìn e làv wo kpuún, a ker sə̀là wo tsəm é sar kikum, a kù dzə̀ sá wo á fèrìn e làv wo kpuún. Lá áwune yòʼ wìy a màʼ kifá ke kí yii, aá wáa ndzə̀ʼnìn.

¹⁹ Wíy lóo dzə, aáwune sí fəə́ e maàndzə mbìy, a shwir wún e wírí mvəm, á shòʼtí ndzə̀y sé lìm see jeéy sin. Shóʼti, á lèm é wón lav vee jeéyí, e nèn màʼ se sən sí, fo á du é ndzə, é wìr kum ndzə̀y see jeéy sin, e lì jiv.

²⁰ «Lá áwune yòʼ wìy a kwaày kitú. Lá á yòʼ a tiír ye kí buy. Á kú a naŋsín, é kí wáa gheén gheenén.

²¹ Lá taà cù yòʼ wìy nò meluʼ e ghan se wù nəə e maàndzə yee fó mvəm.

²² Lá taà cù yòʼ wìy wày wiíy ŋkfə e lav ji və́ə, kìn dzə̀ kimfəə ke wiíy. Wù ku tàʼ a dzə̀ wan wìr Isray wo wù yóʼ ne kìíy lumèn ji wiíy, là bey, wù nèn lì a dzə̀ wiiy ŋkfə taà cù wùmòʼ ji və́ə.

²³ «Áwune ku wìy a yeʼéy wír vém, aá wáa kiíy jeéyjeéy fo kifá ke dzəə̀n ji ké Nyùy wùn à kee kiy ki, e kfə̀n a naàrì sa áwune, aá wáa kiíy jeéyjeéy fo kifá ke *kifàn kí, à kee là kifàn kí.

²⁴ A nsaʼ dù fəə̀, bo kù tínen áwune. Lóo tinén, á kù tìnén réŋréŋ mo nsər sém sí dzəə̀n. Áwune kù wíy a lèm vishiíy vém vé ŋkàʼ mo ntò sém wùn à ntir sém sí dzəə̀n, a leéy ji á ghvə́m á vishiíy vém vé bam, e lèm ji vee jeéy ví.

²⁵ «Lá áwune yòʼ lòr vitú vév, e lì kifàn ji á kùm dzə́n wìr. Yii bèy, a lò a dzə tàr à wìr, kìn yè wov, kìn wán və woo lumèn, kìn woo wiíy, kìn fə́r woo lumèn, kìn woo wiíy, wo bó wù yòʼ sí kér lúm, taà cù woo shó kù si lòr ri.

²⁶ Wù lór kitú kfə́ bey, wù kù *kfə̀mrí, e bóo kfə̀n gheén. Wù kfə́mri, wù dzə̀ʼə̀m kishiíy saàmbà.

²⁷ Kishiíy ke wù kfə́n e maàndzə lav cù yee fó mvəm ji wun du, e yiì lim rə́ é kirə̀ʼ kee jeéy kí, wù tòmbìy yiì cu rə́ ajay. Suuy mo woo Nyùy Tàr woo Taà Ndzə.

²⁸ «Bó atàá cùu yòʼ wíy a ker kirə́ʼ e wír veé Israyí mvəm ji vitsə́ʼ vév. Kù dzə̀ mo, vitsə́ʼ vév. Bó á yòʼ wíy fo nsay aáwune é Isray. M sì ji yéev yee nsay.

²⁹ Áwune wíy a yi cú vifa ve yi, a yi cú ajay, a yi cú njò. Vifá ve wír veé Israyi wiy, shwí mo shó vi kù wíy a dzə vév.

³⁰ Fo vifa vee káv fó sum wùn à báŋ se vifa si, vifá vìn, ve dzəə̀n káv mbìyi, wùn à kfəə́ se cù sidzə̀m se wír veé Israyi yii fəər ji á wáa cù mo shó vi, kù sí wìy a ker atàá cù. Vèn kfə̀n wíy a ŋèʼ sa meŋkfəŋ mee káv mbìyi, a fo aàtàá cùu. A vèn wìy a yiì bèy, bo m wíy a səə̀vì láʼ sén.

³¹ Lá taà cù yòʼ wìy yì kifá ke kí kpuun kpuún, kìn dzə̀ shinə́n, kìn nyám, kìn dzə̀ ji koò á koosàʼ.»