Esiker 34 - ŊWÀʼ NYÙY

Anshìy veé Isray

¹ Nyùy Tàr nèn lò, e sùŋnín e mò, e sùúy jii,

² «Wàn wìr msòŋ, tiísí ntum yem, a roòmè vilìmbìy veé Isray vi. Ku roòmè áwune ve á shiy njiì womé, e sùúy ji ke Nyùy Tàr woo Taà Ndzə yoŋ aáwune kí dzə̀ á jii, ‹Ébéèy, anshìy veé Isray, lòné shòʼ ne ven, ven ve á yí vitú. Vèn yòʼ dzəə́ leey njiì wom a?

³ Vèn nó vín njiì, bá ndzə̀y sén e wuyi. Vèn seéri ve faŋkìné, yii bèy, a bó á yòʼ yiir ŋgoo yem njiì.

⁴ Vèn yòʼ távir ve á njoó. Vèn yòʼ fer ve á joyì. Vèn yòʼ kúv ve á kivkin. Vèn yòʼ binèr ve á jáné. Vèn yòʼ taʼ ve á làykìn. Vèn kan áwune e sáʼa, sáʼ áwune e ŋgwàne.

⁵ Bìʼ bey, áwune nen bvəə̀rí, a jan, e nèn kfə̀n ji viyíkìr ve nyàm se kwaʼ, bìʼ fo nshìy yòʼ‑oò dzəə̀n wo wù leey áwune.

⁶ Njiì wom‑eè bvəə̀rí, a jan e vitu ve agwan, a jan e vitu ve aŋkoŋ. Á kù‑uù sàŋrí kitú ke nsay kidzə̀m, là ŋgaà wóo tàʼ, e bìnèr.›

⁷ «Kí nén a dzə jii, ven vee anshìy, vèn yú kinyo ke Nyùy Tàr suuy ki.

⁸ Mo woo Nyùy Tàr woo Taà Ndzə, m suuy jii, ‹Mo m dzəə̀n shó e tin, vèn yú kinyo kém kí. Njiì wom sì kiyínsam, a dzə viyíkìr ve nyàm se kwaʼ, bìʼ fo nshìy yòʼ kfə̀n dzə̀ə́. Anshìy ve mò‑oò lèmèné yòʼ leey ŋgoo yem njiì, taʼ ve á làykìn. Á kù bvə́ʼ a dzə̀ vitú vév, e tèn fó a leéy njiì wom.›

⁹ Kí nén a dzə jii, éè anshìy veé Isray, vèn yuúrí kinyo ke Nyùy Tàr suuy ki.

¹⁰ Mo woo Nyùy Tàr woo Taà Ndzə, m suuy jii, ‹M ban ven, a m kù wíy dzər njiì wom a dzə̀ e vèn. Dzə́rí, é m tsəʼ ven, fo vèn wáa yiír njiì wom, é la vèn yòʼ dzəə wìy a yi vitú vén. M wíy bòyìr njiì wom fo věn wo, é la wù yòʼ kfə̀n a dzə viyíkìr vén.›

Nshìy njiì wo juŋ

¹¹ «Ke suuy Nyùy Tàr woo Taà Ndzə ki dzə̀ jii, ‹Mómò, m wíy tàʼ njiì wom e dzə̀m, a leéy fo fo.

¹² M kù wíy a tàʼ njiì wom réŋréŋ mo nshìy yii taʼ e ghan se və́ə bvəərin. M wíy tàʼ áwune, e fəə́r fo virə̀ʼ ve áwune‑eè taʼrin, e dùkìr sho, e tàʼrí e kishiíy ke ŋgeʼ‑eè nəən áwune, e sùm moo mbàʼ.

¹³ M wíy fəə́r áwune fó vitum, e baʼtí fo wòŋ see shooy, e kfən sho aáwuné nsay. M wíy a yiír áwune áàgwan veé Isray, a yiír e ŋguùŋè si, e kù a yiír e virə̀ʼ ve wíri yii dzə́ sho e nsay foo fèy.

¹⁴ M wíy a tsəəné áwune, a dù sho fo yí ye juŋe dzəə̀n, áàgwan veé Israyi wáa dzə kwáʼ wóv. Áwune wíy a yi jíy ye juŋe fó, a neèm. Á wíy a yi vifá ve ntay vi áàgwan veé Isray.

¹⁵ Mómò, m wíy a dzə nshìy wov, a m wíy a màʼtì, aáwune wáa neèm, a meèmè.› Suuy mo woo Nyùy Tàr.

¹⁶ «M wíy a tàʼ ve á làykìn, a baʼtí ve á taʼrin, a kfən sho. M wíy a kuv ve á kivkin, a tavír ve á njoon. Yii bèy, ve á fàŋkìn, a gùynìn, é m laar. M kù wíy a shìy njiì wom e suuyrú.

¹⁷ «Á bèy, ŋgoo yem bvəy, ke suuy mo woo Nyùy Tàr woo Taà Ndzə ki kù dzə̀ jii, ‹Mo və̀n, m wíy a tàr kinyo kén, a tinén ké njiì wùn njiì, a tinén ké viyaʼ wùn à vibév vi.

¹⁸ Kí yoʼ ghèén ji vèn wáa yi jíy ye juŋe, e kfə̀n a nyèŋrì kibér e wuú. Kí yoʼ ghèén sa ji vèn wáa no mendzə́v me ranén mè, e kfə̀n a tòv fó e wuú.

¹⁹ Kù dzə̀ ji njiì wom kér fóo yi kifá ke á nyèŋrìn, e no mendzə́v me á tòvìn e wuú, mè tsə́ʼə́m à?›

²⁰ «Ke suuy mo woo Nyùy Tàr woo Taà Ndzə ki nén a dzə jii, ‹E ké ru kí, m wíy tinén nsaʼ njiì wo wù fàŋèn, a gùynìn wùn à wo wù njoon.

²¹ Vèn‑eè dòm ve á njoon e wúné, e sə̀r e loŋ si, á táʼrí, e dùkìr e vitum.

²² M wíy bòyìr njiì wom, é la wù yòʼ dzə́ə a dzə kiyínsam. M kù wíy nəə́ e njiì wùn njiì kinyò, e tinén.

²³ M wíy shoʼ nshìy wov e mòʼón fo Fòn Davir woo ŋgaà lìm wóm ram. Wù wíy a shìy áwune, a dànèr.

²⁴ Mo woo Nyùy, m wíy a dzə Nyùy wov, é ŋgaà lìm wom woo Davir ram wáa dzə fon wo wù sáʼ áwune.› Kù suuy mo woo Nyùy Tàr.

²⁵ «M wíy gwàr *mensaŋ vèr áwune, mee ji á wáa ker dzəʼə̀m yee nyaáŋ. M wíy fəə́r nyám se bi sí fó nsay foo fèy, aáwune nèn yù fó a dzə e kwaʼ, a shiíy e kòv sí, là kindzə́m.

²⁶ M wíy màʼ kisəəvì aáwuné wùn, e màʼ e virə̀ʼ ve áwune dzə́ sho vidzə̀m, e kaarí gwan wom, e tar, a dzə̀ woo jeéy ji wóom. M wíy tsənsí wuú kù é ghan se yí yii dzə́, é wáa dzə kisəəvì kév.

²⁷ Vicí veé sum ví wíy a koóm báŋ sév kijuŋ, é nsay wáa fəə́r viyíkìr kijuŋ, é wír vémé wáa neŋ ji dèʼ aáwuné nsay. M wíy beʼ kimbùŋ ké vikwàn fo áwuné mbèʼ, e fəə́r áwune fo wír ve á reŋèr áwuneé wo, aá nèn kìíy ji m dzə̀ á Nyùy Tàr.

²⁸ Áwune yòʼ dzəə́ wìy a dzə ji kiyínsam ké vitum, a bó koosàʼ yòʼ dzəə́ wìy a sàʼ áwune. Á wíy a neŋ ji dèʼ, là kindzə́m.

²⁹ M wíy yiì, aáwune wáa ker súm se sí fəər vifá ve yi nyanyày, e làa yòʼ dzə́ə a tooŋé jíŋ e nsay foo fèy. Áwune yòʼ dzəə́ wìy a yu nyár yee ji vitúm vi wáa jàʼ áwune.

³⁰ M yii bèy, aáwune nèn kìíy ji mo woo Nyùy Tàr, m dzə̀ á Nyùy wov, a m dzə̀ á vèr áwune, e kfə̀n kiíy ji áwune vee wír veé Israyi dzə̀ á wír vém. Suuy mo woo Nyùy Tàr woo Taà Ndzə.

³¹ «Wìr vem, vèn dzə̀ njiì wom, njiì wo m danèrì, a m dzə̀ Nyùy won.» Suuy Nyùy Tàr woo Taà Ndzə.