Esiker 30 - ŊWÀʼ NYÙY

Nyùy Tàr wíy màʼ ŋgeʼ e Ejiv kitu

¹ Nyùy Tàr lò, e sùŋnín e mò, e yòŋ jii,

² «Wàn wìr msòŋ, tiísí ntum yem, e sùúy jii, ‹Ke Nyùy Tàr woo Taà Ndzə suuy kùm Ejiv ki dzə̀ á jii: « ‹Vèn wáa rəəmé, a toŋ kitávín jii, «Èhéè, mbeème kishìíy sì.»

³ Kishiíy kee shooy ki sì fó mentsə̀m, kishiíy ké Nyùy Tàr, a kí mèʼ ne. Kishiíy, ke yì wíy sən, e làŋsìn. Kishiíy, ke vitúm vi wíy a fàn, a yàʼ.

⁴ Rə́r sí wíy gbù e Ejiv kitu, é nyár ye biibií gbu é wòŋ Etiopia. Á wíy yuyrí nyanyày wìr e Ejiv, e kuúy bùʼ fo fo, e dù sho, é kinsə̀ŋ ke wòŋ ki saʼkir kidzə̀m.›

⁵ «Rə́r sí wíy laàr wír veé Ejiv, e laàr sa vé kiŋkaày vév, a dzə̀ wír veé Etiopia wùn à Libiya, à veé Lidiàa, e tatí wír veé vitum vímóʼ ví ve á dzə́ e nsay Ejiv, e lì sa veé Kuv, e bóo lì wír ve wùn à Ejiv suusin adzə̀m. Wìr dzə̀m wíy tatí, e kpu e shùu rər.»

⁶ Ke suuy Nyùy Tàr kí nén a dzə jii: «Wír ve wùn à Ejiv suusin é kiŋkaàyi kù wíy kpu yé rər, é shúu rər wo Ejiv kóʼor wún shóo sə́y é nsay e dzə̀m. Kèʼ fo Migdol, e dù, e bàʼ e Aswan, áwune wíy kpukír e shùu rər. Suuy mo woo Nyùy Tàr woo Taà Ndzə.

⁷ Ejiv kù wíy tatí woŋ se sí‑iì siìn é vifə̀m, aá táŋ ŋkà se laʼ sév é mvə̀m vimgbù ve laʼ.

⁸ M wíy bàʼrì və́y é Ejiv, laar wír və́ kiŋkaày adzə̀m, é wír veé Ejivi nèn kìíy ji m dzə̀ á Nyùy Tàr.

⁹ Wíy lòo dzə e kishiíy fóo fèy, é m suúy, é vé ntume lo é vikoŋ, a koʼ ndzə́v yee Naay ji á du, e bèmér woŋ Etiopia wo bó wú yòʼ kì kí rə́r. Áwune wíy yu ji Ejiv sàʼkìr a ne, e nèn a dzə fan fan. Rúrú, á kú a kiíy, kishiíy kí sì fó mentsə̀m.»

¹⁰ Ke suuy Nyùy Tàr woo Taà Ndzə ki dzə̀ jii: «M wíy lì Fòn Nebukadnessar woó Babilon, e yiì, é wù laar màŋgòŋ woó Ejiv.

¹¹ À wun, à shuu və́ rərí, kù dzə̀ vé bvə̀m ŋgeʼe, e shaà vitúm vidzə̀m. Áwune wíy wìy, e nəə́ Ejiv, e bvəʼə́y woŋ. Áwune wíy shoʼ nyùy yev rə̀r, a shàm wíri shó, é dzə́n sí wáa jàmtìn jàmtìn é Ejiv.

¹² M wíy yiì, é ndzə́v yee Naayi yúm, e way nsay yev e wír kisaŋé wo. M wíy yiì, é vitúm vìn vi gheʼ nsay Ejiv, e ghèʼ kifá kidzə̀m ke kí dzəə̀n shó. Suuy mo woo Nyùy Tàr.»

¹³ Ke suuy Nyùy Tàr woo Taà Ndzə ki dzə̀ jii: «M wíy laàr mebvə̀m meé Ejiv medzə̀m, e ndzəə̀r vibámmbó vé anyùy kisaŋe fó ŋkàlaʼ yee Memfis, a bó fòn yòʼ kfə̀n dzəə́ wìy a dzə e Ejiv, é kindzə́m kí wáa toʼnín wír vee fó.

¹⁴ M wíy sàʼtì Patros wo dzəə̀n mbìv wòŋ yeé taa, e laàr, e bàʼrì və́y é Tsoan, e mbìv yeé ròŋ, e tsəm ŋkàlaʼ yee Tebes e ŋgeʼ si.

¹⁵ M wíy màʼ dòʼshwíiy wom e Pelusium kitu, a dzə̀ kikum ke ŋkàlaʼ ke wír veé Ejivi yoy, tiir sho, e kfə̀n səʼsí màŋgòŋ woó Tebes, e laàr.

¹⁶ M wíy bàʼrì və́y é Ejiv, é Pelusium wáa buʼ e mvə̀m nyar. M wíy sàʼtì ŋkàlaʼ yee Tebes, é ŋgaà vibàn ghíʼ Memfis tèéter, kù e shùy bèn.

¹⁷ Wónlě nsùm veé Awen wùn à veé Pi‑Beseti wíy kpu e shùu rər, aá koórí kibér ke wíri fó ŋkà se laʼ sìn, e dù sho e kwaʼ nsàm.

¹⁸ M wíy bvəʼə́y vitaáví vé Ejiv e Tapanes, e sèn kiŋkoʼòrwùn kév, e màyìr, a kishiíy kin, yì wíy sən aáwuné kitu, e làŋsìn. Mbàʼ wíy sùm Ejiv, aá koórí wíri fó ŋkà se laʼ, e dù sho e kwaʼ nsàm.

¹⁹ Á mo m wíy kfə̀tì ŋgeʼ si e Ejiv kitu bèy, aáwune nèn kìíy ji m dzə̀ á Nyùy Tàr.»

Vitaáví vé Fòn woó Ejiv vi máy

²⁰ Yì‑iì dzə̀ kishiíy saàmbà fo ŋwee mbìyi, e kiya ke kí‑iì sí mee ji nshòv mòʼón e ghvə̀m, mo vèr‑iì siìn é kwaʼ nsàm, Nyùy Tàr súŋnín e mò, e sùúy jii,

²¹ «Wàn wìr msòŋ, m kìv ne kóy Farao woo fon woó Ejiv. Yén ri mbà, bó wìr yoʼ ndzə̀m, bó wìr yoʼ wày raʼ sho ji wun kúv, ye dzə̀ wù kfə̀n ghàr nyùy rə̀r.

²² Ke suuy mo woo Nyùy Tàr woo Taà Ndzə ki nén a dzə jii, ‹Rúrú, m ban Farao woo fon woó Ejiv feyì, a m yíi beʼtí kóy sə́. M yíi beʼ wo wú dzəə̀n e távín, e kfə̀n màysì wo wú siìn e béʼén, e beʼ, é la wù yòʼ kfə̀n dzəə yù fó ghar nyùy rə̀r.

²³ M yíi bvəə́r wír veé Ejiv e vitúm ví mvəm, e taʼár, aá du vitóŋtóŋ vidzə̀m.

²⁴ M yíi fo vitaáví e fòn woó Babilon, e way nyùy yem rə̀r e wun kiwo, a ké Farao, m kù yíi beʼtí kóy sə́, é wù wáa dzə̀m e fòn woó Babilon si moo wír wo á lemerin, ye tàm wù kpù.

²⁵ Rúrú, m yíi way vitaáví e fòn woó Babilon koy, e yiì, é sé Farao si seem. M wáy nyùy yem rə̀r e fòn woó Babilon kiwo, wù lóo nəə́ nsay Ejiv sho e rə́r sí, é wìr dzə̀m nèn kìíy ji m dzə̀ á Nyùy Tàr.

²⁶ M yíi bvəə́r wír veé Ejiv e vitúm ví mvəm, e taʼár, aá du vitóŋtóŋ vidzə̀m, aáwune nèn kìíy ji m dzə̀ á Nyùy Tàr.› »