Esiker 3 - ŊWÀʼ NYÙY

¹ Nyùy Tàr nèn lò, e yòŋ e mò jii, «Wàn wìr msòŋ, ku kfə̀r kifá ke m fó e wò ki. Kfə́r kiŋkur ke ŋwàʼ kìn ki. À kfə́r, à dù, e sùŋnín e wír veé Israyi.»

² Á bèy, m nèn mvə̀ʼ shuu wóm, wù fó kiŋkur ke ŋwàʼ kìy e mò ji m kfə́r.

³ Wù yòŋ e mò jii, «Wàn wìr msòŋ, kfə́r kiŋkur ke ŋwàʼ ke m fó e wò kìn ki, é bvəm yée kúr.» M nèn kfə̀r, a kí nyom e mǒ shuù, koó moo vilu bèy.

⁴ Wù kfən yòŋ e mò jii, «Wàn wìr msòŋ, dù fo wír veé Israyí wùn, e fìʼtì kinyo ke m yoŋ ki aáwune.

⁵ Bó m yòʼ túm wò a dzə̀ fo wír ve á súŋnin a dzə̀ lám vitumé wùn, kìn wír ve á súŋnin a dzə̀ lám wo bó yòʼ dzə̀ wìr yù. À du, e yen a dzə̀ wír veé Isray.

⁶ M yòʼ túm wò ji à du, e yèn vitúm vímóʼ ví vinín ve ví súŋnin lám se sən sí, kìn lám se tavkín sí, se bó à yòʼ yú. Ké ru kí, a m kì tùm wò fo vee bey ví wùn, á yuùrí ntum ye à loòn.

⁷ Yii bèy, bó wír veé Israyi yòʼ yíi yu kinyo ke à suuyì, bìʼ fo áwune yòʼ koŋ, e yu kinyo ke m yoŋè. Wír veé Isray adzə̀me tàv ne kitú ŋkóŋkóŋ, e lùr.

⁸ Ku kìíy jii mbaà, m lùŋ ne wò, ye dzə̀ vèn áwune làŋsìn vitú, á tsə̀y wò e ŋkfə́né.

⁹ M tàvír ne wò, à táv moo ŋgòʼ kilan. Lá à yòʼ fò kintóʼ e wír veé Israyi. Á du, lóo fətí sí vèn áwune, lá à yòʼ bìn ndzə̀m. Mo áwune tsə́y kóy vèr áwune, dzə̀ kíwun ke á kù du, a yiì e wò.»

¹⁰ Nyùy Tàr kú a suúy e mò jii, «Wàn wìr msòŋ, yuúrí kinyo ke m yoŋ e wò ki kidzə̀m, a rə̀tì sho.

¹¹ À yú, à dù, e yèn wír ve vèn áwune dzəə̀n é kwaʼ nsàm, e sùúy aáwune ji á yú á kinyo ke Nyùy Tàr woo Taà Ndzə suuy ki, kìn áwune yíi dù, e yu, kìn á du, e ten.»

¹² Á bèy, Kiyoy ke Nyùy ki nèn nàn mo, e tìír e mǒ shwin, m yú kiléŋléŋ, a kí nyamkìr e mǒ bàm, a wìr súŋnin, suuy jii, «Á wáa burí vikuʼùy vé Nyùy Tàr, a burí e wun kirə̀ʼ ké dzə.»

¹³ M kfən yù sá kiléŋléŋ ké vàv se vifa ve ŋeʼèn viy mo sí kumsìnè, e yù sá ké kar see vifá vìn ví ghaŋ mo sí kumsìn koó mo səʼsì nsay.

¹⁴ Kiyoy ke Nyùy ki nèn shùr mo, a dù sho. Vitaáví vé Nyùy Tàr ví nəə́ e mǒ wùn, a rəʼə́y mo, a m du, yú nyár ye tavíné e mǒ shiliv, Kiyoy ke Nyùy ki nèn kfə̀n nə̀ə́ e mǒ wùn, a dànèr mo.

¹⁵ Á bèy, m ku nèn wìy e Tel‑Abiv, e ghaa ndzəv yee Kebar, fo wír vér veé kwaʼ nsàmé‑eè dzə́. M dzə̀ʼə̀m vèr áwune kisə́sə kishiíy saàmbà, a shúu má ne mo.

Nyùy shóʼ Esiker ji ŋkiy

¹⁶ Vishiíy vee saàmbà vìy vi shaà, Nyùy Tàr súŋnín e mò. Wù yòŋ e mò jii,

¹⁷ «Wàn wìr msòŋ, m shòʼ ne wò ji ŋkiy wìr veé Isray. À yú kinyo ke m yòŋèn, à kàntì áwune shó, e fò e mò.

¹⁸ A m lò, e yòŋ kùm wir liì kisaŋ ji wù kér fó kpu, e yòŋ bèy, a bó à yoʼ kàntì ŋgaàŋ, e tìr wun fo wun yìi kisaŋe, é kí fiʼ sə̀ dzəʼə̀m rə́, bo ŋgaà liì kisaŋ və̀n yíi kpu bìʼ vinyo və́ ve bi ví, yii bèy, é li wò njò rə kpu.

¹⁹ Á bèy, aà kàntì wir liì kisaŋ, la wù yòʼ bìn ndzə̀m e wun liì kisaŋ, e màʼtì dzə́ə sə́ sé kisaŋ si, bo wù kù‑úù kpú bìʼ vinyo və́ ve bi ví. Yii bèy, áà boy ké fo njò rə kpu, e bavtí dzəʼə̀m yé.

²⁰ «Kí kfə́n a dzə jii, a wìr woo réŋ lò, e bìn ndzə̀m é yiì yee réŋ, e lò, a yiì liì kisaŋ, m wáa levtí wun, a bó à yòʼ tír wun, bo wù sí lo, e kpu. Wù yíi kpu bìʼ vinyo və́ ve bi ví, a bó á yòʼ dzəə́ leey vinyo vee réŋ ve wù‑uù rə́si yii, yii bèy, é li wò njò kpu rə, bìʼ fo à yoʼ tìr ŋwèrín.

²¹ Kí nén a dzə jii, aà kàntì wír woo réŋ ji lá wù yòʼ yiì kinyo ke bi kí, wù yú, e làa yòʼ yiì, bo wù‑úù wáa dzə sho e tin, bìʼ fo wù biimen ne ntir. À yii bèy, bo à sə̀ ne kitú ké fo njò, e bàvtí dzəʼə̀m yé.»

Esiker yòʼ wíy yu fóo suŋnín

²² M wáa dzə e Tel‑Abiv bèy, vitaáví vé Nyùy Tàr ví nəə́ e mǒ wùn, a banrí mo. Wù lò, e yòŋ e mò jii, «Lò é yuv, a dù shùy e mboʼ, é wòsò súŋnín fó.»

²³ M ku nèn ŋàʼáy, e dù e mboʼ fèy, rúrú, rán Nyùy Tàrí fəə́sín e mǒ si. Kù dzə̀ rán ye juujùŋ rə̀n ye mò‑oò yenen é ghaa ndzəv yee Kebar. M yén bey, e nèn neèm, e tsə̀m sí e nsay, e ghvə̀m wun.

²⁴ Á bèy, Kiyoy ke Nyùy ki nəə́ e mǒ wùn, e nàn mo, e tìír e mǒ shwin. Nyùy Tàr yòŋ e mò jii, «Dù, e nə̀ə́ e wò lav, e tèʼ lav e wò kitu.

²⁵ Àshè, wàn wìr msòŋ, á yíi kur wò mo á kùr e kfəə̀, é la à yòʼ yù fó a kaarí vèn à wíri.

²⁶ M yíi sətí shuu wó, é la à yòʼ yù fó a suŋnín, áà fíʼ mùm ntéŋ fóo kfə̀n a kàntì áwune. Á kù dzə̀ kév a dzə̀ wír ve á tsə́y kóy vèr áwune.

²⁷ Yii bèy, m lóo suŋnín wòsò, é m mvəʼ shuu wó, áà yoŋ aáwune jii, ‹Á yú á kinyo ke Nyùy Tàr woo Taà Ndzə suuy ki,› é wìr wo wù yú yú, é wo wù ŋwáyí ŋwáy. Kù dzə̀ wír, aá tsə́y kóy vèr áwune.»