Esiker 21 - ŊWÀʼ NYÙY

Nyùy Tàr kíʼ Jerusalem e nyùy rə̀r

¹ Nyùy Tàr nèn yòŋ mo, e sùúy jii,

² «Wàn wìr msòŋ, kìʼ ŋkàlaʼ Jerusalem, a suŋnín, a nyàysì lav cù. Ku tìn kàʼ wòŋ woo Isray,

³ e sùúy ji ke Nyùy Tàr suuy ki dzə̀ á jii, ‹Woŋ Isray, m ban ven, a m yíi shoʼ nyùy yem rə̀r fó kiburúʼ, e laàr wir dzə̀m fo wòŋ, à wo dzəə̀n wir jwáʼ, à wo dzəə̀n wir kisaŋ.

⁴ M kù wíy laàr wir dzə̀m fo wòŋ, à woo jwáʼ, à wo kisaŋ. M wíy shoʼ nyùy yem rə̀r fó kiburúʼ, e teè wir dzə̀m, e kèʼ fo mbìv yee tsə́n, e dù e yee kuy.

⁵ Á bèy, é wìr dzə̀m nèn kìíy ji mo woo Nyùy Tàr, m shòʼ á ne nyùy rə̀r, a bó yòʼ dzə̀ m kfə̀n siìr fo.›

⁶ «Wàn wìr msòŋ, kí nén a dzə jii, ‹Á dìy, a konsí, a ŋav kibiíbí e wír vìné si.›

⁷ Á lóo dzər ji à sà diy, kónsi ka ben a, à bìnèr jii, ‹Dzə̀ á bìʼ sáʼka kinyò kímóʼ kí ke à yuun. Kí lo, e wìy, é melív me wìr dzə̀m mè seem, é wó wìr dzə̀me wáa yàʼ yàʼàn. Wìr dzə̀m wíy kfən ji mkpúshílív, é ŋkoŋ si kfə́n a shwaʼsín shwaʼsín. Rúrú, kinyo kìn ki sí lo, e wìy, a kí kér fó yìi koóy.› Suuy mo woo Nyùy Tàr woo Taà Ndzə.»

⁸ Nyùy nen kfə̀n yòŋ mo, e sùúy jii,

⁹ «Wàn wìr msòŋ, tiísí ntum yem, e sùúy ji ke Nyùy Tàr suuy ki dzə̀ á jii: « ‹Nyùy rə̀ne, nyùy, aá baáy, e sòr.

¹⁰ Á baày ne nyùy rə̀r, a dzə̀ yì yùyrí, e sòr, yì wáa bàvkìr moo kishèv. A dzə̀ vèn kfə̀n a yeʼtí e Juda woo wán wóm vifòn a? Bó nyùy rə̀r rə̀n yòʼ bávti vifon vímóʼ ví.

¹¹ Á fò nyùy rə̀r ji á sor, e leèmè ji kifá ke lìm. Á sí baay, sor bèy, e fíʼ way e ŋgaà laàr wo.

¹² Wàn wìr msòŋ, á toŋ, a dìy. Nyùy rə̀n dzə̀ ye yì yíi laàr wír vém. Yì yíi laàr vilìmbìy veé Isray vidzə̀m. Á wíy tatí wùn à wír vémé adzə̀m, e laàr. Á bèy, kú a dzə̀vtì vikàkàŋ vé vi.

¹³ Kù dzə̀ mumrì ye m mumrì wír vém shó. Aáwune tèn fó bìn ndzə̀m é vinyò ve bi ví, bo vinyo vìn vidzə̀m vi kér fóo koóy áwune. Suuy mo woo Nyùy Tàr.›

¹⁴ «Ké lèn ki, wàn wìr msòŋ, tiísí ntum yem aáwune. «Á kwaʼ wó yée, lóo kwaʼ, é nyùy yem nèn a laàr, a laàr, a wayrí. Dzə̀ nyùy, a yì yúyri wíri é mfòn, taáme áwune mbìv sidzə̀m.

¹⁵ Kí kooy bèy, é melív me wìr vém mè seem, é nyanyày wìr gbukir, a nyùy yem kù taáme áwune é shuù se kày sidzə̀m. Yì bavkìr e njà kishèv, aá sáy, a kù dzə̀ ji yì wáa laàr.

¹⁶ Ku laàr laàrìn mbìv sidzə̀m, à mbìy, à bámé. Laàr mbìv yìy, e kfə̀n laàr mbìv ŋkoòvì. Laàr ben mbìv sidzə̀m.

¹⁷ M kù yíi a kwaʼtí sa wó yém e dù, e meé mo dòʼshwíiy wom‑ee rəsin. Suuy mo woo Nyùy Tàr.»

Fòn woó Babilon dzə̀ nyùy rə̀r Nyùy Tàr

¹⁸ Nyùy Tàr kfən yòŋ mo, e sùúy jii,

¹⁹ «Wàn wìr msòŋ, səə̀m dzə́ə sí sibaà se a dzə̀ fòn woó Babilon lòo fəə fo wùn wòŋ, a wù kér nyùy rə̀r, wù jùmrì yìmòʼ. Ku sìysì, é dzə́ə sin si lo fó wòŋ ji dzə́ə e mòʼón. À mee e mentàrnín, à lèm kisəəm fó.

²⁰ Səə̀m dzə́ə ye dzə̀ fòn jùmrì e nyùy rə̀r, e taàmé wír veé Ammon ve á dzəə̀n é Rabbàa, é kisəəm kí wáa dùŋrì Jerusalem wo dzəə̀n kikum ke ŋkàlaʼ wìr veé Juda.

²¹ Fòn woó Babilon yíi a tiy e mentàrnín é ghaa kisəə̀m, a tiy, a sə̀r ŋkoʼ mvə̀n e nsay ji wun shwéŋ, e kfə̀n a beè mebvə̀m mvə, e kfə̀n lì sa báy nyàm ntàŋrí, e tàr fo fo.

²² Fo wun koy yìyí, é fú yee kùm Jerusaleme fəə́, e tàŋ jii, báʼtí lúm se vici se á yíi a fùn kay sho si, e bùʼ shirəə́ she rər shí, e kfə̀n sìysì lúm se vici se á yíi a fùn shuu se kày sho. Fúm sá nsay e wǔn kày, e bàʼrì virùmèn ve ŋkiy vi.

²³ Wír veé Jerusaleme yòʼ wíy a tàʼ, e biimé fú rən ji yí tàŋ á réŋ, bìʼ fo áwune gwàrìn ne *mensaŋ wùn à fòn woó Babilon. Yii bèy, a kaʼ rə̀ne dzə̀ ye yí kuúmé kinyo ke áwune jayin e fòn, aá kù wíy koorí áwune, aáwune shwí kitú.

²⁴ Á bèy, ke mo woo Nyùy Tàr woo Taà Ndzə suuy aáwune kí dzə̀ jii, ‹Vèn yìmrì ne ajay vén, á wáa dzə e ŋgèŋgèr, a wìr dzə̀m kì ji vèn lì ne a njò, ajay véné yénsín e věn njiìn e dzə̀m, e nèn yiì, m wáa kuumé. Bìʼ bey, m yíi way ven áàŋgàa vibàn véné wo.›

²⁵ «Jwè, ŋgaà saʼ wìr veé Isray, à dzə̀ wir kisaŋ. À lòr ne kitú ké. Kishiíy ké ke kinjòʼsì ke m maʼ ŋgeʼ e wò kitu ki sì fó mentsə̀m.

²⁶ Yú kinyo ke mo woo Nyùy Tàr woo Taà Ndzə suuy ki. «Shóʼ tán ye ndzəméné, e shòʼ ntáráʼ. Vinyo vi yòʼ dzə̀ə́ lèn mo ví‑iì dzəə̀n. Kóʼór aghéʼnceyí, aá wáa saʼ, e sə̀ʼə́r vé saʼa é nsay.

²⁷ Á vifə̀m bèn, á vifə̀m, m wíy siìr ŋkàlaʼ rə̀n, é yì kfə́n é vifə̀m. Yii bèy, kí yòʼ wíy koóy, e meé mo ŋgaà wo dzəə̀n ghay və́ ji wù maʼ ŋgeʼ sho wíy wìy. Wù wiyì, é m ku nèn fò ghay woo shooy sho.»

Ntum yee kùm wír veé Ammon

²⁸ «Wàn wìr msòŋ, tiísí ntum yem, e sùúy kinyo ke Nyùy Tàr woo Taà Ndzə suuy kùm wír veé Ammon ve á shur wír veé Isray ki. Tiísí jii: « ‹Nyùy rə̀ne, nyùy rə̀r, aá shóʼ fó kiburúʼ ji yì wáa laàr. Nyùy, aá sór, yì wáa bàvkìr moo kishèv, a teè wíri.

²⁹ Á wíy nàn nyùy rə̀r, e shoʼtí vitú ve wìr ve á méŋ Nyùy sho. Wír vìy, a dzə̀ vé *kifàné. Kishiíy kév ké kinjòʼsì kí wìy ne. Kishiíy, ke á maʼ ŋgeʼ aáwuné kitu. Vinjeenjèm ve vé‑eè yén bìʼ nyùy rə̀r rə̀n vi kù‑uù dzə̀ kimboʼtì. Vé fùú kù‑uù fəər sa a dzə̀ kimboʼtì.

³⁰ Siìr nyùy rə̀r é kiburúʼ. M kù wíy saʼ nsaʼ yè, a dzə̀ é wòŋ fo vé‑eè dzəən wò, e saʼ a dzə̀ é nsay ye dzəə̀n ye feyì feyì.

³¹ M wíy màʼ dòʼshwíiy wom e wò kitu. M wíy fam wò e və́y dòʼshwíiy womé, e way wò e wír tàkìŋàʼá wo. Wír, aá táŋ ne mo á yii laar wír, e màysì.

³² À wíy a dzə vidaànè ve və̀y, é mensə́ mè mè leém woŋ wón e dzə̀m. Leemè, aá laysin wò ŋkuuŋkùŋ. Suuy mo woo Nyùy Tàr.› »