Esiker 2 - ŊWÀʼ NYÙY

Nyùy shóʼ Esiker ji ŋgaà ntum və

¹ Nyùy Tàr nèn yòŋ e mò jii, «Wàn wìr msòŋ, lò é yuv, e tìím e wò shwin, é m suúy kinyo e wò.»

² Mo wù suŋnin e mò bey, Kiyoy ke Nyùy ki nəə́ e mǒ wùn, e nàn mo, e tìír e mǒ shwin, m yú mo wù yoŋ kinyo e mò.

³ Nyùy Tàr yòŋ e mò jii, «Wàn wìr msòŋ, m túm wò fo wír veé Israyí wùn, kitúm, a dzə̀ ké antavkìtu, á tsə́y kóy vèr áwune. Wùn aàtàr véví‑iì shòʼór nsər sém, e wìy to lán.

⁴ Áwune yòʼ woóme, kù táv a dzə̀ kitú. M túm wò fo áwuné wùn, áà du, e sùúy aáwune ji á yú á kinyo ke Nyùy Tàr woo Taà Ndzə suuy ki.

⁵ Kìn áwune yíi dù, e yuurí, kìn á du, e ten, àshè, mo dzəə̀n wíri, aá tàv kitú, bo á kù wíy kiíy ji ŋgaà ntum‑eè ló a dzə a aáwuné mvəm.

⁶ «Fo wò wàn wìr msòŋ, lá à yòʼ fàn áwune wún wóo. Lá à yòʼ fàn kinyo ke áwune suuyì. Fə̀m mo kimbìn wùn à vitiír vé njoŋ vi gìmèn wò, aà dzə́ e kitu ke aŋgám, lá à yòʼ fàn kinyo ke áwune suuyì, kìn ji à weey bìʼ dzə́ə ye á leey wò sho. Áwune kù dzə̀ antavkìtu.

⁷ Ku yòŋ jí sém sí aáwune, kìn vee yú, kìn vee tén yú mo áwune dzəə̀n antavkìtu.

⁸ Fo ké ki, wàn wìr msòŋ, yuúrí kinyo ke m yoŋ e wò ki. Lá à yòʼ tàv kitú moo antavkìtu vee shooy. Mvə̀ʼ shuu wóo, e yì kifá ke m fó e wò ki.»

⁹ Nyùy yòŋ bèy, e ké ru kí, m lòo leéy, e yèn a kiwó ki násí, e kìʼ mo, m yén ŋwàʼ sho, aá sáŋ, a wú dzə̀ e kaárín.

¹⁰ Wù bvə̀tì e mǒ si, aá sáŋ, à fó mbìy, à fó bàm, a kinyo ke vé‑eè saŋen shó ki kù‑uù dzə̀ lúŋ mendzə̀n, luŋ wo á yov, e dìy a dzə̀ kpú sho.