Esiker 17 - ŊWÀʼ NYÙY

Ŋgàn yee kùm lùŋ wo wiy wùn à kicí kí

¹ Nyùy Tàr lò, e sùŋnín e mò, e sùúy jii,

² «Wàn wìr msòŋ, yòv shitìítiy shi, e fèr kinyo e wír veé Israyi é ŋgàn.

³ Yòŋ ji ke Nyùy Tàr woo Taà Ndzə suuy ki dzə̀ á jii, ‹Kintìŋ ké lùŋ wo wiy kímóʼ kí‑iì lò, a kí kér fəə ye juŋe nshòm si jeéy jeéy, a vav si sáŋrí wún, e fàŋkìr, kí féŋ, e wìy aàgwan veé Lebanon, e bèʼ kitú ke kici ké *sidar.

⁴ Mo kí beʼen nca kitu, e nèn fèŋ, e dù sho e vé wayí wòŋ, e bìy aàŋgàa mbàmé ŋkàlaʼ.

⁵ Kí kfə̀n‑eè shòʼ sá mbìy kifa e nsay Isray, e bìy e ghaa ndzəv é nsay, a yì bór kijuŋ, kí wáa kuy moo ŋkiʼ bèy.

⁶ Mbìy rə̀y kúy, e bìnkìr e kitiír ké vayin, e rə̀ŋsìn, a ràm, a sàŋrì wún. Tám sə́ sí nèn nàsì wún, a ràm, e kìʼ lùŋ və̀y, gháŋ rəə́ nəə́ é nsay e ŋàŋ, tám si wùn à vav si nen sùm kitiír kiy kidzə̀m.

⁷ « ‹Wùmòʼ woo lùŋ nèn dù, a dzə kfə́, a wù kér vav si siwiíwíy, a fə́ə dzə̀ é ŋàáŋàŋ. Kitiír ké vayin kìy ki nèn tsə̀nsí gháŋ sə́, e kìʼ wun sho, e tsə̀nsí sa tám, sí wáa leéy wun ji wù wáa wayrí a mendzə́v é kitiír fey, é mè shaa me mè dzəə̀n é kibvəə̀ fo və̀sə woo lùŋ‑eè bìyìn.

⁸ A wù‑uù lò bìy a dzə̀ é nsay ye juŋ e ghaa ndzəv ji kí fiʼ wìy tèʼ e mbòŋ, e kòóm, a dzə kintìŋ ke kitiír ké vayin.›

⁹ «Á bèy, mo woo Nyùy Tàr woo Taà Ndzə nén a ghay jii, ‹Kí sà kù yòʼ wíy kuy a vèné? Wo mbìy woo lùŋ sà yòʼ wíy dzə̀n gháŋ, e kuúy báŋ si, e kivtí tám se sí teʼè, é kí yóvrí á? Bó kí yòʼ wíy a tàʼ wír woo ntav wo wù dzən. Kí yòʼ wíy a tàʼ mànjòŋ wo wiy wo wù men.

¹⁰ Vé‑eè lò bìy, yii bèy, kí kù yòʼ wíy a dzə sho, a tèʼ a? Shwér sané wíy tòn, é kí tén yúm a? Bó kí yòʼ wíy yum bèn e kibvəə̀ fo vé‑eè bìyìn, kí téʼ, e rə̀ŋsìn à?› »

Nsàv ŋgàn yee shooy

¹¹ Nyùy Tàr nèn lò, e sùŋnín e mò, e yòŋ jii,

¹² «Dzə́r áàntavkìtu vìne jii, ‹Bó vèn yòʼ kì nsàv kinyò kìn à? Fòn woó Babilon‑eè dù é Jerusalem, e koò fon woo fó wùn à visən ve wìr vee fó vi, e kfə̀n shó e Babilon.

¹³ Wù‑uù ghàr wan ntoʼ wùmòʼ, e yiì, wùn wun gwár *mensaŋ, aá koó ne kfə́m sé wìr fo wòŋ sidzə̀m, e dù sho.

¹⁴ Wù‑uù yiì bey, ji wun fiʼ sə̀r woŋ və̀n fo wú wáa ŋaʼrí, aá kú a yiì a dzə̀ mo ntò se mensàŋ si dzəə̀n, é wóŋe wáa tiy.

¹⁵ Yii bèy, fòn və̀y nèn wìy lò, a nə̀r kóy, e tsə̀nsí vé ntume é Ejiv ji wun koóy á shúu rər fó fo nyanyày, wo wú kér nyám se ŋkòʼ. A kù yòʼ dzə̀ wù tàm á? A bùʼtì wír vinyo bèn, wù kù yòʼ lèʼ kpú a? A wù yàʼáy kilìʼ ké mensàŋ, wù kù yòʼ nyèŋ á?›

¹⁶ «Ke suuy mo woo Nyùy Tàr woo Taà Ndzə ki nén a dzə jii, ‹Rúrú, mo m dzəə̀n shó e tin, fòn və̀n wíy kpu e Babilon e nsay fòn wo wù‑uù koʼorin wun, é bo wù wáa ŋway wun, e bivír kilìʼ kév, e ŋwày ntò sév sé mensàŋ.

¹⁷ Fòn woó Babilon ghán wìy, e gìm ŋkàlaʼ e rə́r sí, lóo bàʼrì virùmèn ve mvə̀n e wǔn kày, lóo koʼór nsay fo ghaŋ ji á fiʼ nə̀ə́, e teè wíri é mfòn, é la shúu rə́r fòn woó Ejivi yòʼ sə̀ wun, a wú fə̀m dzə̀ nyanyày moó le.

¹⁸ Mo wù tàʼàn ndzə̌n kilìʼ ntéŋ, e bìvír mensaŋ, a wù máʼ ne kiwó e kitu wo, e kfə̀n lòvtí bèn, bo bó dzəə̀ yée baàmè, e nyeŋ yòʼ kfə̀n dzə̀.›

¹⁹ «Kí nén a dzə jii, ke suuy mo woo Nyùy Tàr woo Taà Ndzə ki dzə̀ jii, ‹Mo m dzəə̀n shó rúrú, mo wù‑uù nyaŋsin mensaŋ me wù‑uù biimen e mǒ si, e lìʼ, e kàn mo, bo m yíi siìr lǒn mensàŋ mee shooy e wun kitu.

²⁰ M wíy sàŋrì lálán wom, é wù sum wun, é m koó wun e mǒ kitam. M wíy lì wun, e dù sho e Babilon, e saʼ wun fo, bìʼ fo wù‑uù meŋen mo, e kàr menàŋ e mǒ bàm.

²¹ Vé rər və́ ntayi wíy kpu e shùu rər adzə̀m, é kibér ki táʼrí, e dù vitóŋtóŋ vidzə̀m, é vèn nèn kìíy ji sùúy a mo woo Nyùy Tàr.› »

Nyùy kaʼ vijuŋ fo mbìy

²² Ke suuy mo woo Nyùy Tàr woo Taà Ndzə ki dzə̀ jii: «Mómò kitú kém, m yíi tin tám kici ké *sidar ke da ki, e shèr to rə́ ye bóri. Mómò, m yíi bìy e gwan wo daadà.

²³ M yíi bìy e Gwan Isray, é tám si teʼ shó, e fə̀ʼ, a ker ŋgoòy, a dzə ji kintìŋ ke kici ké sidar ke wiy kí. Menə́n mè wíy a bàʼrì láʼ sho kfəə́ e dzə̀m, a beè e kindzə̀ə́ndzəm ke tam si.

²⁴ Kicí keé wòŋ kidzə̀m ki wíy a kiíy, e kiíy, ji m dzə̀ á Nyùy Tàr. Mómò, m lo, m bàʼ kicí ke da ki, lo, m yiì, ke terí kí wàa kuy. M lo, m yùmér kicí ke shoòŋ ki, lo, m yiì, ke yumér kí wàa tèʼ.» Kù suuy mo woo Nyùy Tàr, a m kù yíi yiì kinyo ke m suuyin ji m yii.