Esiker 16 - ŊWÀʼ NYÙY

Jerusalem káy Nyùy, mo sàkì kày lúm

¹ Nyùy Tàr sii kfə̀n sùŋnín e mò, e sùúy jii,

² «Wàn wìr msòŋ, roòmè Jerusalem, e sànrí joonè wo wù yii.

³ Tiísí jii, ke Nyùy Tàr woo Taà Ndzə suuy e Jerusalem ki dzə̀ jii, ‹Wò‑oò lò fó wòŋ Kanan. Kitàr ké ki‑iì dzə̀ wir Amor, kiyìy kí wáa dzə wir Hit.

⁴ Fo kee mo vé‑eè dzəən wò ki, yì‑iì dzə̀ é kishiíy fó, a bó wìr wóo jàv kisuy ké yòʼ‑oò dzə̀, a bó wóo sù, kìn e sòr, e bóo boo e ndzə̀y sí yòʼ‑oò ló a dzə.

⁵ Bó wìr yòʼ‑oò lo lèéy wò, yée rər mendzən, e sham wò, e yiì vinyo vìn vidzə̀m. Kí foy, á nyáŋsí wò, e màʼày e kwaʼ e ŋgèŋgèr e kishiíy fóo fèy.

⁶ Kù mo m shaa, e tò e wò wùn, e lòo leéy, e yèn, aà búʼ, té vikoy e wò mvə̀m mensə. M yòŋ wò jii, à lùŋ ne, aà kù dzə̀ə́ e mensə mè mè wùn.

⁷ M nèn lì wò, e lìy, à kúy, a bòʼrì moo kicí é kwaʼ. À kúy bey, e rùn, e bàʼ e wiíy, a beʼ vín si é vikàkàŋ, mbàvìr sé si tó, aà kù dzə̀ kinshóʼ ŋkuuŋkùŋ.›

⁸ «M kfən lòo shaà, e ké ru kí, e yèn, aà kúy ne, e mèé e viya ve viŋgòn, m nèn bvə̀r shúu ndzə̀y, e sùm wò sho, e sə̀tí kinshóʼ ké. Rúrú, m nen yiì kilìʼ wòsò, e suùsín e kitu ke *mensàŋ, à nén a dzə ji wóom woo wír. Suuy mo woo Nyùy Tàr woo Taà Ndzə.

⁹ «M nen sù wò e mendzə̀v, mensə́ mè ló fo wò wùn, m sór wò e biʼi.

¹⁰ M kúr ndzə̀y se tsəmén sí e wò wùn, e wày alábáʼ jùvi e wò wuù, e sùm kitú ké e ndzə̀y see làv wo kpuún sí, e màʼ ndzə̀y seé kilùm e wò wùn.

¹¹ M wáyrí vifá ve sùsù e wò wùn, e wàyrí mfuy si e wò koy, e wày shàŋ e wò kilòŋ.

¹² M kfən wày ndzə̀ŋgwáŋ e wò yuy, e wày ayèreŋ e wò vitùʼùr, e sòv ntáráʼ woó kilùm e wò kitu.

¹³ Vifá ve sùsù vé vi‑iì dzə̀ vee *kisha ke mbàm ke baar kí, à ke fəvír kí, a ndzə̀y sí dzə̀ see làv wo kpuún, aá bónén, e bà. Wò‑oò yí meŋkfəŋ a dzə̀ me kpuún me juŋ mè, lá vilu, yí meŋgvə́r me *oliv. Wò‑oò kùy, e tò sí, a njàʼkìr, e nèn a dzə ji Yaà féyì ŋkuuŋkùŋ.

¹⁴ Á bèy, leŋ wóo nèn dù vitúm vidzə̀m, bìʼ fo à bòŋèn é ŋàŋ, a kí dzə̀ bey, bìʼ fo mò‑oò wayrin wò kijuŋ, à wáa kìʼ e juŋ. Suuy mo woo Nyùy Tàr woo Taà Ndzə.

¹⁵ «Yii bèy, à yén mo à bòŋèn, e yùʼtí wún, e nèn lì kitú ké, e sàn é kwaʼ ji sàkì wo wù shiy nshaàdzəə̀ là nyaʼ.

¹⁶ À ló fó fo, e lì ndzə̀y sé símóʼ sí, e tàm kiláʼáy ké ke à naŋsin, e bàʼrì, a yiì visàkì vé fo, kfə́ə ve bó ví yòʼ‑oò siìn, e kèʼ fo ŋgwàrìn wòŋ, a bó ví yòʼ wíy siíy a dzə.

¹⁷ À sii kfə̀n lì vifá ve sùsù vee kisha ke mbàm ke baar kí, à ke fəvír kí, ve mò‑oò foon e wò, e fèr mebvə̀m sho e njà vilum, a dù viŋkar fo áwuné wùn.

¹⁸ À lí vikúm ve tsəmén ví, ve mò‑oò foon e wò, e màʼ aáwuné wùn, e lì meŋgvə́r mem, e lì kiláy kém, e tìír e vifá vìn ví si.

¹⁹ M kfə̀n‑eè fò wò vifá ve yi ve ntay vi, e fò meŋkfəŋ me kpuún mè, e fò meŋgvə́r me *oliv, e fò vilu ji à wáa la, à ku lì, e dù tìír aáwuné si moo cu ji kirəm ki wáa rə̀ʼtìn áwune. Suuy mo woo Nyùy Tàr woo Taà Ndzə.

²⁰ «Ké won ve wòsò‑oò dzəən, à lí, e tòn, e cù mebvə̀m sho. Kinyo ké ke visàkì kee shó ki‑iì dzə̀ moó le,

²¹ é bo à kfən lì wón vém ji cu?

²² À lóo shoʼ virom, a kfər virim e visàkì vé vi bey, e làa yòʼ dzə́ə a kuumé vishiíy ve wò‑oò dzəə̀n e bór, búʼ e wò mvə̀m mensə kinshóʼ, là kifá.

²³ Lòné shòʼ ne wò. Lòné shòʼ ne wò feyì, e tàtí joonè wó sho. Suuy mo woo Nyùy Tàr woo Taà Ndzə.

²⁴ Lóo dzə e mentàrnín feé, à bàʼrì kitaàtì fo, e tùúy shibvə̀m fo, a yiì visàkì vé fo.

²⁵ Virə́ʼ vidzə̀m, à báʼrí kitaàtì fo, e sàŋrì kitú ké fo, a bi anshaàdzəə̀ là nyaʼ, e siìr viŋgòn vé e joònè, a visàkì vé vi kúy kuyín kishiíy kidzə̀m.

²⁶ À kù sìr‑iì dù viŋkar vèn à wír veé Ejivi, ve á dzəə̀n e wò ghaŋ, e tìnsín mo shó, wír, aá dìy vikìy, e tònén.

²⁷ Á bèy mbà, m nen màʼ kiwó e wò kitu, e fàr woŋ wó, e wày wò aàŋgàa vibàn vé vee wír veé Filistiàá wo, á wáa rə̀m kinyo ké ke visàkì kee ben.

²⁸ «À kfən dù sa viŋkar fo wír veé Assiriyàá wùn, bìʼ fo wò‑oò duùn vèn à vé mbìyi, e làa yòʼ kur. À ku siì shaà fo mbìy, a ghaʼtí ghaʼtín e visàkì vi vèn áwune, la ví yòʼ kòsìn.

²⁹ À ku kfə̀n tàʼám, e shaà fo mbìy, a tuŋ visàkì vèn à wír veé Babilone, kitúm ke vé wayí, e làa yòʼ fə̀m kur.

³⁰ Nyùy Tàr woo Taà Ndzə nén a taŋnín, a ghay jii, ‹À sà joy yàsí gha e wò shiliv, bó a shoʼ virom ve visàkì vee ben, là dzə̀rkìtu a?

³¹ Wò‑oò tùy lav se visàkì e wáynjáŋ, e bàʼrì vifá màwày e dzə̀m, yii bèy, a bó shii wò yòʼ fə̀m‑eè dzə̀ mbàm moo sàkì woo fó tèr.

³² Jwè, wò woo wiiy visàkì, à diy vilum, shaa lum wò ji ka?

³³ Vilum yii síy vifá, fó aàsàkìi adzə̀m. À ló ké, a kuúy vifá, a levtí vilum sho vitóŋtóŋ vidzə̀m, là nyaʼ ji á wáa wìy, é vèn áwune wáa shiíy.

³⁴ À tìŋ tìŋèn e vé vee visàkì vi, e shaà ámóʼó. Bó wìr yòʼ‑oò taʼ wò, ji à keʼ visàkì. A dzə̀ ké jeéy féyì, bìʼ fo lo làʼ wò wír, a bó wìr yòʼ laʼ wò.› »

Nyùy tínen nsaʼ Jerusalem

³⁵ Àbaày Jerusalem, vifǔmbèʼ, yuúrí kinyo ke Nyùy Tàr yoŋ ki.

³⁶ Ke Nyùy Tàr woo Taà Ndzə suuy ki dzə̀ jii, «Wò‑oò kér shii vilum e ŋàŋ, e sàŋrì kinshóʼ ké e ŋgèŋgèr e visàkì vé vi, e lòr kitú ké e kinyo ke mebvə̀m ki, e kfə̀n lì wón vé, e tòn, e cù vifá vee shooy sho.

³⁷ Bìʼ kee shooy, bo m yíi banén ŋkar sé se vèn áwune‑eè bvə́ʼ dzəʼə̀m sidzə̀m, se wò‑oò koŋè, à se wò‑oò ban si. M wiy sho fo vitoŋtóŋ vidzə̀m, aá ghíʼ wò, e kaàrí, e tàr, é m sor ndzə̀y fo wò wùn sidzə̀m, áà wáa tíy kilor, aá yén kinshóʼ ké.

³⁸ M yíi dìn dòʼshwíiy wom e wò, e laàr wò e kpúu, áà kiíy mo shií wo m kíyri wò dzəə̀n.

³⁹ M wíy màʼ wò aáwuné wo, aá bvə́ʼə́y láʼ sé se visàkì sìn, e sàʼtì virə́ʼ vee fo wò‑oò cu mebvə̀m. Áwune wíy kuúy ndzə̀y sé, e siy vifá vé ve sùsù vidzə̀m, e màʼtì wò, áà siíy, a dzə kinshóʼ ŋkuuŋkùŋ.

⁴⁰ «Áwune wíy bi màŋgòŋ, é wù ŋéʼ wò, e tsəmrí wò e tíy sí, e shètì wò e vintin vintin e nyùy sév sé rər sí.

⁴¹ Á wíy tòn láʼ sé, e màʼ ŋgeʼ e wò kitu, a vikìy yéné nyanyày. M wíy sə̀r visàkì vé, e yiì, é la à yòʼ kfə̀n a làʼ vé viŋkar vé.

⁴² M yii bèy, é dòʼshwíiy wom kpúrín, é nyár ye m yú bìʼ wòo rəsin, é la m yòʼ kfə̀n dzəə shwìíy kilòŋ, kìn ji m yú nyár.

⁴³ Mo bó à yòʼ kuúme ghán se wò‑oò dzəə̀n wánlè, à ló fó fo, e tìnsín mo e joonè vəne e dzə̀m, bo, feyì feyì, m yíi siìr vinyo vé e wò kitu. Suuy mo woo Nyùy Tàr woo Taà Ndzə. Wò‑oò dzəsì visàkì e kitu ke joònè wúmóʼó ji ka?

Kiyìy moo wán, wán moo kiyìy

⁴⁴ «E ké ru kí, wìr dzə̀m wo wù yii maʼ ŋgàn wíy a màʼ ŋgàn rə̀n kùm wò, kiyìy moo wán, wán moo kiyìy.

⁴⁵ À dzə̀ rú kidzəə́y ké yè won féyì. Mo wù‑uù ŋwayin lúm və, e ŋwày wón, kù dzə̀ mo à ŋwáyí. À kfə̀n dzə̀ sá réŋréŋ moo jemèr sé, se sí‑iì ban alúm vév wùn à wóné. Kiyìy ké ki‑iì dzə̀ rú wir Hit, kitàr, wan wìr Amor.

⁴⁶ Jemèr yè yee ŋgàywìr dzə̀ Samaria, wo wù dzə́ wùn à wón vəə́ e mbìv yee kuy. Jemèr yè yee wánlè dzə̀ Sodom, a wù dzə́ wùn à won vəə́ é mbìv yee tsə́n.

⁴⁷ Bó à yòʼ‑oò lo bìʼnìn a dzə̀ liì wov kisaŋ cáʼcáʼ, yii bèy, à ló ké fo fo, e fòy fòyìn ji wòʼ, kinyo kidzə̀m.

⁴⁸ «Ke suuy mo woo Nyùy Tàr kí dzə̀ jii, ‹Ké ru kí, mo m dzəə̀n shó e tin, bó Sodom wùn à wón və́ vee vikìyí yoʼ bùʼtì vinyo, e kòóy vé vèn à wón vée.›

⁴⁹ Ké jèmèr yè yee Sodom, njò rə‑əə̀ dzə̀ jii, ‹Wùn à wón və́ vee vikìyí‑iì yú wún é ŋàŋ, tsəətìn e vifá ve yi vi, yí vitú yiín, e làa yòʼ a sham ŋgaà kitàn feyì, e bóo yiì a gwàrìr ké ghéʼncey.

⁵⁰ Vèn kì sá ji mò‑oò laàr áwune, bìʼ fo vé‑eè kóʼor wún, yii vinyo ve joònè ví, tínsin mo shó.›

⁵¹ «Wír veé Samariàa yoʼ fə̀m bùʼtì kintoʼnìn ke vinyò ve vèn bùʼtìn. Vèn bùʼtì vinyo ve joònè ví é ŋàŋ, e shaà áwune, e nèn yiì, jemèr sén sí wáa yensín là ajay.

⁵² Vèn wáa beʼ woómé sén lèn, ven vin, ve vèn yiìn, jemèr sén sí wáa yensín là ajay, vén vee vinyo ve buʼtìn ví tíŋ, e shaà vév. Á fiʼsìn vèn áwune, áwune wàa yensín là kinyo. Bìʼ bey, vèn wáa woomé réŋréŋ mo vèn yiìn ne, jemèr sén sí wáa yensín là kinyo.

Á wíy siìr vikuʼùy vé Sodom wùn Samaria fo

⁵³ «Ké jèmèr sén, m wíy siìr vijuŋ ve Sodom fo, é wùn à wón və́ vee vikìyí wáa dzə mo vé‑eè dzə́. M kfə̀n wíy siìr sa vé Samaria wùn à vé won və́ ví fó. A kù dzə̀ sá mo m wíy siìr vén bey.

⁵⁴ A m yii bèy, ji vèn wáa ker dzə̀rkìtu, é wù yii, é vèn wáa woomé, bìʼ vinyo ve vèn bùʼtìn é ŋàŋ, kí wáa yiì, jemèr sén sí wáa buʼúr ji bó á yoʼ mèʼ ven.

⁵⁵ «Jerusalem, jemèr sé see Sodom wùn à Samaria, à wón vév vee vikìyí wíy kfən, a dzə mo vé‑eè dzəə̀n fó mbìy, áà kfə́n sá, a dzə mo wò‑oò dzəə̀n fó mbìy.

⁵⁶ Kí wò‑oò kér Sodom e vitu ve sòŋ ji shaàshèʼ é viya ve wò‑oò kóʼninè,

⁵⁷ é bo virim vé vi yénsín? Nen kfə̀n wò lèn ji shaàshèʼ fo wír veé Siiriàa, à ve á dzəə̀n aáwuné ghaŋ adzə̀me, a dzə sa bèy fo wír veé Filistiàa, bo dzə̀ ji vitúm vee wò ghaŋ ve ví nyáŋsi wò vidzə̀m.

⁵⁸ Kù sì séʼ liì kisaŋ wùn à joonè wo à yiìn. Suuy mo woo Nyùy Tàr.»

Mensaŋ me mè gòʼòn là may

⁵⁹ Á bèy, ke suuy Nyùy Tàr woo Taà Ndzə ki dzə̀ jii, «M yíi lovtí e wò réŋréŋ é ntuʼ ye à bùʼtìn vinyo sho. À ŋwày kilìʼ, e shòʼór *mensaŋ mesò.

⁶⁰ Yii bèy, fo kém kí, m wíy kuumé mensaŋ me mò‑oò gwàrìn wòsò e ghan se wò‑oò kúyí, e kù a yùŋrì ji mensaŋ me mè gòʼòn là may.

⁶¹ Áà nèn wìy a kuumé njiìn wò, a ker woómé, a m fó ne jemèr sé e wò, yee ŋgàywìr wùn à yee wánlè, aá wáa dzə ji wón vé vee vikìy, a bó kee shooy ki yòʼ fə̀m‑eè dzə̀ e wòsò nsàn mensàŋ.

⁶² M wíy yùŋrì mensaŋ mem wòsò, é bo à kiíy ji m dzə̀ á Nyùy Tàr.

⁶³ M yuŋrì bèy, é m mán vinyo ve à bùʼtìn vidzə̀m, é shúu má wò, áà wáa woomé. Suuy mo woo Nyùy Tàr woo Taà Ndzə.»