Esiker 14 - ŊWÀʼ NYÙY

Nyùy Tàr sháʼnín mebvə̀m me ghvəmén mè

¹ Vilìmbìy ve wìr veé Isray vímóʼ ví wìy lò, e wìy, e beè mo.

² Nyùy Tàr nèn yòŋ mo, e sùúy jii,

³ «Wàn wìr msòŋ, wír vìne bìy ne mebvə̀m aáwuné meliv, kifá, a kí lévti áwune, aá yii liì kisaŋ, á ku siì tìír, a ghvəm. A dzə̀ m màʼtì rú, áwune wàa beè mo e kinyo ki á?

⁴ Á bèy, ku sùúy aáwune jii, ke suuy Nyùy Tàr woo Taà Ndzə ki dzə̀ á jii, ‹A wìr woó Isray lò, e bìy mebvə̀m e wun shiliv, e tìír kifá, a ghvəm, a kí lévti wír, wáy e liì kisaŋ, wù kfən lò, e wìy, a beè mo é kinyò, bo mómò kitú kém yíi fo binèr e ŋgaàŋ, réŋréŋ, kù mo liì və kisaŋ kùʼùn, a dzə.

⁵ M yii bèy ji m fíʼ bìnèr melív me wìr veé Isray ve á bàyìn wún fo mǒ wùn, a cù mebvə̀m, e siìr áwune e mǒ wùn.›

⁶ «Kí nén a dzə jii, yòŋ e wír veé Israyi jii, ke suuy Nyùy Tàr woo Taà Ndzə ki dzə̀ jii, ‹Vèn binkir fo věn mebvə̀m fèn, e bìn ndzə̀m e vifá vén vé joònè ví vidzə̀m.

⁷ E ké ru kí, a wìr woó Isray wùmòʼ lò, kìn lò kiŋgwìy ke kí dzə́ wùn áwune, e bày wún fo mǒ wùn, e bìy kinyo ke mebvə̀m e wun shiliv, e tìír kifá, a ghvəm, a dzə̀ ke kí lévti wun, wáy e liì kisaŋ, wù kfən lò wìy, e beè *ŋgaà ntum Nyùy ji wun yutì shúu Nyùy, bo mo woo Nyùy Tàr kitú kém yíi fo wun binèr.

⁸ M yíi kiír wún, é vèr wun wáa tiy andzən andzən. M wíy yiì, é wù kfə́n ji fon lòn, a dzə mfìʼ fo wíri. M wíy fəə́r ŋgaàŋ fo wír vémé mvəm, é ven adzə̀m nèn kìíy ji m dzə̀ á Nyùy Tàr.›

⁹ «A ŋgaà ntum woo shó dù e kiyuŋ, e mvə̀ʼ shuu və́, bo kù‑úù fəə́ kimboʼtì, a bóʼtí mo woo Nyùy Tàr ŋwérín, a m kù lo, e màʼ kiwó e wùn wó, e fəə́r wun fo wír vém veé Israyí mvəm.

¹⁰ À ŋgaà ntum, à ŋgaà wo wù kì wiy, e mbaà wun, bo wìr dzə̀m kù wíy səəsí ŋgeʼ réŋréŋ.

¹¹ M yii bèy, é la wír veé Israyi yòʼ kfə̀n wìy a nyàʼ mo, e bày wún, e lòr kitú e mvə̀m joònè wo áwune lo, yii e dzə̀m, e lì *kifàn. Aáwune kú a dzə ji wír vém, é m wáa dzə Nyùy wov. Suuy mo woo Nyùy Tàr woo Taà Ndzə.»

Nyùy Tàr yòʼ wíy bavtí Jerusalem

¹² Nyùy Tàr nèn yòŋ mo, e sùúy jii,

¹³ «Wàn wìr msòŋ, a kitúm ki lò, e bùʼtì vinyo ve bi ví é ŋàŋ, a meŋ mo, bo m lo, e màʼ kiwó aáwuné kitu, e fàr vifá vév vé yi, é jìŋ koó, e laàr, à wìr, à nyàm fo fo.

¹⁴ A fə̀m kì dzə̀ ji wír vee ataár vee Noa, wùn à Daniel, à Jov kì dzə̀ é wòŋ foo fèy, bo njiìn wov wo juŋ yíi bòyìr a dzə̀ áwune vin. Suuy mo woo Nyùy Tàr woo Taà Ndzə.

¹⁵ «Kí kfə́n a dzə jii, a m kì lò, e tsə̀nsí nyám see koosàʼ, sí rún woŋ woo shó e dzə̀m, a koorí wíri, ye woŋ woo shooyi du é vifə̀m, a beemé ye bó wìr yòʼ dzə̀ wù yù fóo ghan sho, e tosín,

¹⁶ a kí kòóy bèy, fə́m a dzə ji wír vee ataár vìyi kì dzə̀ é wòŋ foo fèy, á kù a kiíy ji mo m dzəə̀n Nyùy Tàr, a m dzə̀ shó e tin, bo áwune yòʼ dzə̀ á sə̀ won vév vee vilum, kìn vee vikìy, aá luŋ. A dzə̀ kù bòy áwune vee shooy cáʼ, woŋ woo shooyi dù é vifə̀m.

¹⁷ «Kí kfə́n a dzə sa jii, a m kì lò, e tsə̀nsí rə́r é kitum, e wàm ji sí tee wíri wùn à nyám si fó fo,

¹⁸ fə́m a dzə ji wír vee ataár vìyi kì dzə̀ é wòŋ foo fèy, rúrú, mo m dzəə̀n Nyùy Tàr, a m dzə̀ shó e tin, bo áwune yòʼ dzə̀ á sə̀ wón vév vee vilum, kìn vee vikìy, aá luŋ. A dzə̀ kù bòy áwune cáʼ.

¹⁹ «Kí kfə́n a dzə jii, a dòʼshwíiy wom kòʼ, m tsə́nsí kifə̀ʼ ke dzə̀ kí teè wíri wùn à nyám si nyanyày e wòŋ foo fèy,

²⁰ fə́m a dzə ji wír vee ataár vee Noa wùn à Daniel, à Jov kì dzə̀ á fo, bo mo woo Nyùy Tàr, mo m dzəə̀n shó e tin, m kù suuy jii, bo áwune yòʼ dzə̀ á sə̀ wón vév vee vilum, kìn vee vikìy, aá luŋ. Bo njiìn wov wo juŋ yíi bòyìr a dzə̀ áwune cáʼ.

²¹ «Á bèy, ke Nyùy Tàr woo Taà Ndzə suuy ki dzə̀ jii, bo ké Jerusalem ki wíy fòy fòyìn, e shaàsìn, a m tátí ne virom ve ŋgeʼ vee vikweè vìn, e màʼ aáwuné kitu. Ŋgeʼ see jii, rə́r, jíŋ, nyám see koosàʼ, bóo lì kifə̀ʼ. M maʼà, é wìr msòŋ wùn à nyám si may fó fo.

²² Á ku yù búʼú, wír ámóʼó kù yòʼ wíy bòy, vee vilum wùn à vee vikìyí, aá li, e fəə̀ shó fo ŋkàlaʼ. Á wiy, yén ven shó, vèn yén mo yii yéví dzəə̀n, é vèn nèn biìmé ji ŋgeʼ ye mò‑oò màʼàn e Jerusalem kitu e dzə̀m waà dzə̀ á yee réŋ.

²³ Vèn yén yii yév, é meliv men mè nèn rə̀sìn ji bó m yòʼ‑oò lo lòvtí e Jerusalem e dzəə ye mò‑oò lovtin shó bèn kisáŋ. Suuy mo woo Nyùy Tàr woo Taà Ndzə.»