Esiker 12 - ŊWÀʼ NYÙY

Ŋgaà ntum Nyùy kfə́n ji ŋgaà nsàm

¹ Nyùy Tàr lò, e yòŋ e mò jii,

² «Wàn wìr msòŋ, à dzə́ vèn à wíri, aá táv kitú. Áwune kér sí yé a yen sho, yii bèy, a bó á yòʼ yéné. Á kér vituʼùr vé a yu sho, yii bèy, a bó á yòʼ yú, bìʼ fo á táv kitú e ŋàŋ.

³ Bo dzə̀ jii, wàn wìr msòŋ, báʼ vifá vi moo vé ŋgaà nsàm bey, a dù e kwaʼ nsàm, kù e shùy bèn, aáwune yéné. Ku yiì, é wìr dzə̀m yén mo à lo fo wò kirə̀ʼ, a dù fomóʼó, réŋréŋ moo wír wo wù du e kwaʼ nsàm. Ghanmóʼ, é wír vìne yén, e səə̀m kinyo, fə̀m mo á dzəə̀n antavkìtu bèn.

⁴ À kù yíi lì vifá vé moo vé wìr nsàm e shùy, aáwune leeyì, e nèn lò, a dù a dzə̀ e ŋkuùr, aáwune yéné. Kú a dù mo wìr wo wù kér fóo dù nsàm yii du.

⁵ À yií lo, à bùʼ shuu e kirəv ké lav, e fə̀ə́r vifá vé dzə́ə fó fo, aá yéné.

⁶ À yíi deèvì vifá vé e wò mbèʼ, aá yéné, e fəə sho, a ndzə sí sə́né. À yii bèy, à sə̀tí sí yé ye bó yòʼ dzə̀ à wàa yen woŋ mo à du. M yiì ne, à wáa dzə ji kisəəm fo wír veé Israyi.»

⁷ M ku nèn yiì mo Nyùy Tàr‑iì yòŋèn ji m yii, e lì vibam vém e shùy moo vé ŋgaà nsàm. Lòo dzə e ŋkuùr, m bùʼ shuu e kirəv ké lav, e kiwó kém kí, e fə̀ə́r vifá vém dzə́ə fó fo. M ŋáʼáy, a dù e vibam vém ví mbèʼ, a ndzə sí sə́né, aá yéné.

⁸ Ndzə jàv, Nyùy Tàr súŋnín e mò,

⁹ e yòŋ jii, «Wàn wìr msòŋ, kí antavkìtu veé Isray vìne‑eè lo dzə̀r e wò jii, ‹À sà yii kee ben a dzə̀ ka á?›

¹⁰ À kù bìnèr aáwune jii, ke Nyùy Tàr woo Taà Ndzə suuy ki dzə̀ jii, ‹Ntum rə̀n kùm a dzə̀ taà saʼ wo wù kér Jerusalem, e kfə̀n kùm wír veé Isray ve á dzə́ fo adzə̀m.›

¹¹ Yòŋ aáwune jii, ‹À dzə̀ á kisəəm fo áwune. Kinyo ke à yiìn kin ki din mo kí wíy koóy áwune. Áwune wíy dù e kwaʼ nsàm, a dzə fo e lav vikwàn.

¹² Taà saʼ wo wù sáʼ áwune wíy tur vibam və́, e deèvì e mbèʼ, a ndzə sí sə́né, a tùr sho fo mbìy. Áwune wíy bùʼ shuu e kirəv ké lav, é wù meé fó fo, a wù sə́tí sí rə́ fó a yen woŋ mo wù du.

¹³ Á bèy, é m nèn sàŋrì lálán wom, e koò shó moo kitám bèy, e lì, e dù sho e Babilon e nsay Kaldea, é wù kpú fó, a bó wù yoʼ yèn nsay yee shooy e sí rəə́.

¹⁴ M wíy taʼár wír ve á dzəə̀n e wun ghaŋ adzə̀m, ve wùn áwune sáʼá ve á tír wun, à ve á shiy wune, aá du vitóŋtóŋ vidzə̀m, a m kfə̀n wíy tsənsí shúu rər aáwuné bàm, é wú ron áwune, e yùyrí.

¹⁵ « ‹M wíy taʼár áwune e vitúm ví mvəm, á lóo dzə a dzə̀ é wòŋ se sən sí, aá nèn kìíy ji m dzə̀ á Nyùy Tàr.

¹⁶ Yii bèy, a m wíy yiì, áàshàr wìr fo áwuné mvəm boy fó rər, e bòy fo jiŋ, e kfə̀n bòy fo ayàsí. Á boy bèy, aá nèn lò, a tuuné liì virìm wov e dzə̀m, aá dzə̀ é vitum fo á dùkìn, e nèn kiíy rú ji m dzə̀ á Nyùy Tàr.› »

Kisəəm ké ŋgaà ntum Nyùy wo wù yaʼà

¹⁷ Nyùy Tàr kfən lò, e yòŋ mo, e sùúy jii,

¹⁸ «Wàn wìr msòŋ, à lóo yikír, à wàa ker kindzə́m. Lóo no mendzə́v, à kù a no, a yàʼ.

¹⁹ Ké wìr vén ve á dzəə̀n é wòŋàn, áà yoŋ aáwune jii, ke Nyùy Tàr woo Taà Ndzə suuy kùm wír veé Jerusalem ve á dzə́ fo, e nsay Isray ki dzə̀ á jii, ‹Áwune wíy a yi kibán, fan fan. Lóo no mendzə́v, é kindzə́m kí wáa gwàr áwune. Kí dzə̀ bey, bìʼ fo á wíy səʼsí kifá kidzə̀m fo áwuné nsay, é yì goʼ kisáŋ. Kí wíy koóy bèy bìʼ ŋkfə́tír, a dzə̀ seʼ liì kisaŋ wìr ve á dzə́ fo.

²⁰ Ŋkà se laʼ se wíri‑iì dzəə̀n shó nyanyày si wíy a tiy e vifə̀m, é nsay kfə́n ji nsay ŋgaŋ. Kfə́né, aáwune nèn kìíy ji m dzə̀ á Nyùy Tàr.› »

²¹ Nyùy Tàr kfən sùúy e mò jii,

²² «Wàn wìr msòŋ, wír véné rə́si maʼ ŋgàn kùm woŋ Isray jii, fìʼ shaa, a kàʼ kù tíy fo. Á maʼ bèn ji ka?

²³ Suúy ri aáwune jii, ke Nyùy Tàr woo Taà Ndzə suuy ki dzə̀ á jii, ‹M kù sí lo, e ndzəə̀r ŋgàn yee shooy, é la á yòʼ dzəə wìy a màʼ ji ŋgàn e Isray.› Bo wò‑óò suúy lèn aáwune ji vishiíy ve kàʼ wom lo, e gheén vi sì á e kiwo.

²⁴ Ké wìr ve á bóʼti ji Nyùy ghèm ne ndzə, á yén kinyo ki yòʼ dzəə́ wìy koóy, a bó fú wo boʼtíné yòʼ kfə̀n wíy a dzə e wír veé Israyí mvəm.

²⁵ Dzə̀ mo woo Nyùy Tàr. M yoŋ kinyo ke m yòŋèn, é m ku nèn yiì kíwun. Kàʼ wom yòʼ dzəə́ wìy a laatí. Ven ve á tsə́y kóy vèsən, kinyo kidzə̀m ke m yòŋèn e věn kitu ki kù wíy koóy e věn ghan. Suuy mo woo Nyùy Tàr woo Taà Ndzə.»

²⁶ Nyùy Tàr kfən siì sùŋnín e mò, e yòŋ jii,

²⁷ «Wàn wìr msòŋ, e ké ru kí, wír veé Israyi yoŋ jii, ‹Vinyo ve à rəsí tiísi ji ghèm á Nyùy ndzə e wò vi yòʼ dzə̀ á kinyo keé shùu kiwo. Dzə̀ á ntum vinyò, a dzə̀ ve ví dzəə́ wìy a dzə kwaʼda.›

²⁸ Bìʼ bey, suúy aáwune jii, ke Nyùy Tàr woo Taà Ndzə suuy ki dzə̀ á jii, ‹Bó kinyo ke m yòŋèn kí yòʼ kfə̀n dzəə́ wìy ndzə̀y. Kinyo ke m yòŋèn kí kù kér fóo koóy.› Suuy mo woo Nyùy Tàr woo Taà Ndzə.»