Esiker 1 - ŊWÀʼ NYÙY

Esiker yén Nyùy e njà kinjeenjèm fo kàŋ wo mbìy ( 1.1–7.27 ) Kàvàʼ Nyùy Tàr

^1-3 Yì‑iì dzə̀ é kishiíy kee tàn, e ŋwee woo kweè, a m sí du kiyá mtaár, shúu yuví mvə̀ʼə̀m, m yén Nyùy e njà kinjeenjèm. Kù‑uù yèn mo woo taà cù Esiker woo wan Busi kinyo kìn, a m dzə̀ é ŋgoo wìr veé Juda ve vé‑eè koorin fó Jerusalem, e dù sho e Babilon, e lèm e ghaa ndzəv yee Kebar. Ghán sin si‑iì dzə̀, a Fòn Jehoyiacin dzə́ʼə́m ne e kwaʼ nsàm viyá vitàn. Nyùy Tàr nèn lò, a suŋnín e mò, vitaáví və́ ví nəə́ e mǒ wùn, m yú.

⁴ Nyùy Tàr mvə̀ʼ yúv bey, m lòo sìn, e yèn kinsəm, a kí fəə́ fo mbìv yee kuy, e yèn mbàʼ ye wiy, a rán yímóʼó gím, e kaàrí, e tàr, a və́y wúmóʼó kù bavkìr bàvkìn fó fo moo ji bán a kisha kee *brons e mvə̀m və̀y bey.

⁵ M yén nshwìnin vifa ve ŋeʼèn ví é mvə̀m və̀y fóo fèy vikweè, a mbom dzə̀ moo ye wìr bèy.

⁶ Yii bèy, a ví kér mbìv sé si sikweè sikweè, kfə̀n kér vav si sikweè sikweè.

⁷ Shwín sév sí‑iì dzə̀kìr tìítiy tìítiy, a wuú sév sí kér mfay moo ye nàʼ bèy, njaʼkìr moo kisha kee brons ke á yoʼon bey.

⁸ Vifá vìn vi‑iì kér sa wó, a dzə̀ yé wìr, a viwó vìn vi dzə̀kìr é sar se vàv see sikweè sikweè sìy. Kifá kimòʼón kimòʼón ki‑iì kér wó e kweè kweè, kér mbìv sé si sikweè sikweè.

⁹ Vifá vìn vi‑iì nàsì vav sév see sibaà sibaà, vitú ve vàv se kímóʼ kí wáa kùm sé kímóʼ kí, e nèn a tiy moo kifá ke á fèrìn, kí wáa tiy kór e kweè. Ví lo ji ví du e kirə̀ʼ, ví dù dúun tìítiy, a bó kímóʼ kí yòʼ binè.

¹⁰ Fo ké si yév kí, kimòʼón kimòʼón ki‑iì kér mbìv sé si sikweè sikweè. Mbìv yee fó mbìy‑iì dzə̀ sí wìr, yeé koy yìy sí bvərə̀ʼ, a ye ŋkoòvì dzə̀ sí nàʼ, é bo yee fó bàmé wáa dzə sí lùŋ wo wiy.

¹¹ Á mo mbìv sé si sév sí‑iì dzəə̀n bey. Kimòʼón kimòʼón ki sáŋrí vav yee baà, vitú ve vàv vi wáa kùm vé vàv se kímóʼ kí, vav see sibaà símóʼ sí nen sə̀tí wún.

¹² Ví‑iì lo ji ví du e kirə̀ʼ, ví dù dúun tìítiy, a bó kímóʼ kí yòʼ binè, a ví kù du a dzə̀ fo kiyoy kév kí du.

¹³ Vifá ve ŋeʼèn vin vi‑iì kiʼ moo káy və̀y wo wú shwí, tonnìnè, nèn bavkìr moo kiŋweʼtì. Mesásáy me və̀y mè kù‑uù shaasìn shaàsìn é nsàn se vifa ve ŋeʼèn vin, bán feyì, a ráne njaʼàm fó fó.

¹⁴ Vifá ve ví ŋeʼ vìy vi‑iì léʼ, du e mbìy, kfə́n e bàm mo bavkìr kishèv bèy.

¹⁵ Kù mo m leey vifá ve ví‑iì ŋeʼ vìy, e yèn kár si sikweè, a sí tíy e nsay e vifá vìn ví ghaŋ, a yee mòʼón mòʼóne tíy e kee shó kí ghaŋ.

¹⁶ Fo nshwìnin kar si, à dzəə̀ ye vé‑eè fèrìn shó, kí dzə̀ jii, sí kù‑uù dzə̀ réŋréŋ sidzə̀m, njaʼkìr moo *síbaŋ yee krisoli bèy, aá fér, e shwàʼsín yímóʼó e yímóʼó mvəm.

¹⁷ Sí‑iì lóo dù fo sí du, e mbìv see sikweè, bo sí sí du duùn tìítiy, a bó sí yòʼ kfə̀n binè.

¹⁸ Kár see sikweè sìn si‑iì kér sə́r, a sə́r sin si dár é yuv, a beemé. Sí‑iì kér wón si, aá júŋ shó, e kaàrí, e tàr.

¹⁹ Vifá ve ŋeʼèn vin vi‑iì lo ji ví du e kirə̀ʼ, kár si kù a dù fo ghaŋ. Ví lóo koʼ, kù a koʼ wùn à kár si.

²⁰ Kiyoy ki fə̀m‑eè lóo dù a dzə̀ feé, bo kù dzə̀ fo ví du, a dzə̀ sá fo kár si du, bìʼ fo kiyoy ke vifa ve ŋeʼèn ví kù‑uù dzəə̀n é kar si.

²¹ Mo kiyoy ke vifa ve ŋeʼèn vee vikweè ki kù‑uù dzəə̀n é kar si, vifá vìn vi lóo dù, ví kù a dù wùn à kár si. Ví du, tiimè, kár si kù tìím fo ghaŋ. Ví lóo feŋ, bo kù dzə̀ wùn à kár si.

²² Kifá ki‑iì dzə̀ e vifá ve ŋeʼèn vin ví kitu moo kikum bèy, a kí sáŋrí wún, a njàʼkìr moo tíy yee sáylúm bèy.

²³ Vifá ve ŋeʼèn vin vi‑iì tíy e sar kikùm fèy bèy, saŋrì vav sév see sibaà sibaà, vitú ve vàv se vímóʼ ví wáa kùm sé vímóʼ ví. Ví nèn lì vav see sibaà sibaà, e sə̀tí wún wóv shó.

²⁴ Ví lo ji ví féŋé, m yù, a vav sév sí biŋrì mo léŋ ndzə́v, yorì, kfə̀n wámkir moo jí ye dzəə̀n ye Nyùy woo Ŋgaà Vitaàví Vidzə̀m, kfə̀n ko moo mànjòŋ vé rərí bey. Ví sə́y, tiimè, ví nèn boòtí vav, kiyor ki sə̀sín.

²⁵ Ví tiim ji nyaáŋ bey, jì kù a wìy fo kitu ke kikùm ke kí taʼamen é yuv, aáwuné kitu.

²⁶ M kfən siì yèn sá kifá kímóʼ kí é yuv, e kitu ke kikùm ke kí‑iì taʼamen aáwuné kitu, a kí dzə̀ é njà kàvàʼ, a wù kiʼ moo *síbaŋ yee safiri bèy. M yén kifá, a kí dzə́ e kàvàʼ, shwínin wír.

²⁷ Kee kèʼ fo wun mentìntìn, e koʼ koʼón, m wáa yen, kù moo ji dzə̀ kisha kee *brons ke kí néŋ e və̀y é kilàm, kiʼ moo və́y wo wú gheʼ e wǔn kishà. Kee lò fó mentìntìn, a səy, m yén, a mbìv yee shooy kiʼ moo kiliímé ke və̀y, a kí baári, a fóo ráné, e kàr wun, e tàr.

²⁸ Mo rə́mé yii lo, yí daà é yuv é kishiíy ke wuú sərin, a kìʼ bèy, á mo ráne‑eè dzəə̀n, e kàr fó, e tàr. A kù dzə̀ vikuʼùy vé Nyùy Tàr mo ví‑iì rán bèy. M yén bey, e nèn neèm, e tsə̀m sí e nsay, e yù a jì wìr súŋninè.