Efesor 6 - ŊWÀʼ NYÙY

Kinyo ke atàr wùn à wón véví

¹ Ké ven vee wónlè kí nén a dzə jii, vèn kú a yu atàr vén wùn aàyìy véné mo dzə̀ wír Kristu, á wàa yiì.

² Nsər Nyùy suuy jii, «Wìr wáa ghvəm a tàr wov wùn yè wov.» Nsər rə̀n dzə̀ ye mbìy ye yì kér ŋkàʼmé,

³ a wù dzə̀ jii, «Wìr wo wù lemè wíy a dzə dzə́ ye juŋe, e wìy dzə̀ʼə̀m e nsay fèn ntàmda.»

⁴ Ven vee atǎr woné wáa kiíy sa jii, lá vèn yòʼ a nyàmnyàm wón, aá wáa tùʼtìn, a meŋ fo á dzəə̀n, e nèn a lò, a tav kitú. Vèn kú a lon a dzə̀ fo Tàr wòsən Jesus Kristu mo dzə̀ vèn wàa naàrì wón vén, a yeʼéy áwune é dzəə yee réŋ.

⁵ Ké ven vee akwàn kí wáa dzə jii, vèn kú a ghvəm atàr vén veé ndzə fène kijuŋ, a yu a dzə̀ fo áwune, a lìm fo fo shilív shimòʼón ji vèn lim a dzə̀ á fo Jesus Kristu.

⁶ Lá wìr yòʼ a laàrì sí tàr wov, a lìm a dzə̀ é ghan se wù tíy fo si. Wù wáy a dzə̀ shilív, a lìm ji wun yii a mo Nyùy koŋ ji wun moo wir Kristu wáa lìm fo tàr wov.

⁷ Wù lóo lìm, wù wàa sàvnìn ji wun lim a dzə̀ á fo Kristu, bó wun yòʼ lim a fo wìr,

⁸ a kuumé ji Kristu wíy laamé a wír mo lim rəə́ bòŋèn, kìn ŋgaàŋ dzə̀ kwàn, kìn wan wòŋ.

⁹ Ven vee atàr vee shooy, vèn ku nèn a ker akwàn vén sá kijuŋ, é la wìr yòʼ a nə̀ʼsì kwàn və́ nə́ʼsin. Wù wáa kuumé ji wùn kwàn və́ woo shooyi dzə̀ sáa e wìr sar, a ŋgaàŋ dzə̀ Tàr wov woó yuv. Wù kíyri lim wìr dzə̀m, a bó wù yòʼ nyaʼ wùmòʼ woo wír.

Vifá ve rər vé wìr Nyùy

¹⁰ Kidzə̀m ki nén a dzə jii, vèn wáa tiy a kitávín. A kí dzə̀ jii, vèn kú a tiy vèn à Tàr wòsən Kristu, a yeʼtí a dzə̀ e və́ vee vitaáví ve ghaʼán ví.

¹¹ Vèn báʼ vifá ve rər ve Nyùy fó e vèn ví vidzə̀m, é vèn fíʼ tam vèn à Satan, é la wù yòʼ a ker kintóʼ ke dzə̀ wù woòné, e shaà sho, e sò ven.

¹² Vèn wáa kiíy ji bó vèsən yòʼ maʼ rə́r a dzə̀ á vèsən à wìr msòŋ. Á maʼ a dzə̀ vèsən à vifá ve bi ví vidzə̀m ve ví ghán e shwer, yii vinyo e ndzə fèn. Vèsən funèn a dzə̀ *anyùy wùn à vitú vév vé saʼ vi. A kù dzə̀ áwune vin ve á sáʼ ndzə yee lèn ye yì sə́n dzə̀v rə̀n.

¹³ Vèn ku nèn tàv, e bàʼ vifá ve rər ve Nyùy foon e vèn ví lèn vidzə̀m, Satan wíy fəə́ e kishiíy fó, vèn áwune támé, kí lóo bir, é vèn kú a tiy kitávín, a bó yòʼ dzə̀ wù sò ven gheéy.

¹⁴ Vèn kú a tiy rì a dzə̀ é kinyò ke ru kí ghán sidzə̀m, a dzə moo wír wo wù wovtin ndzə̀y, a taamé kifá. Vèn lóo yiì vinyo ve vèn yii vidzə̀m, vèn wàa yiì a dzə̀ ve bó yòʼ dzə̀ wìr yèn jay sho, é vèn nèn a dzə moo ŋgaà rə̀r wo wù màʼàn kikúm ké kishà ki, kí wáa teʼtín shúu və́ shiliv fo wìr sov.

¹⁵ Vèn kú a fìʼtì kén a dzə̀ sáʼka Nyùy wo wù yii, a melív me wíri mè dzə́ nyaáŋ. Vèn lóo yiì bèy, bo vèn wày ne a dzə̀ alábáʼ, a ghan sho kijuŋ e Nyùy shùu rər.

¹⁶ A fə̀m kooy ka, vèn kù a way shilív a dzə̀ e Jesus Kristu wùn, é wù wáa kìŋ ven mo wìr kìŋ kitú kfə́ e ŋkeè, a bó yòʼ dzə̀ mvə́n toòkì ye Satan maʼ, yí koò ven.

¹⁷ Vèn lóo dù e shùu rər, vèn wàa kuumé ji Nyùy lùŋèr ne a ven, a bó yòʼ dzə̀ wìr kfə̀n yiì kinyo e vèn. Vèn nén a dzə moo ŋgaà rə̀r wo wù sùmèn kitú kfə́ e tán kishàa, a bó yòʼ dzə̀ wìr kfə̀n gwàr. Vèn lóo dù, vèn lì sá nyùy yen rə̀r ye Kiyoy ke Ranén kí foon e vèn, a dzə̀ Jí se Nyùy.

¹⁸ Kidzə̀m ki nén a dzə ji vèn kú a lon kén a dzə̀ fo Nyùy ghán sidzə̀m. Vèn lóo bùnrì, lóo lon kinyo ke kí gháʼ ven, vèn kù a yu a dzə̀ fo Kiyoy ke Ranén kí, é kí wáa naàrì ven. Vèn ku nèn a bùnrì ghán sidzə̀m là dór, a lon fo afə́r vén ámóʼó ve dzəə̀n sá wír Nyùyi.

¹⁹ Vèn kfə́n a lon sa fo mò jii, m lóo fìʼtì kinyo ke Nyùy, m kù a ker kiliímé ke juŋ ki, a fìʼtì sáʼka və wo juŋ tèéter, aá wáa yu, a kiíy kinyo ke sáʼka woo shooy wìyìn shó, a bó wìr yòʼ‑oò kì fó mbìy.

²⁰ Kristu‑uù lì mo ji ŋkùvtu və ji m wáa fìʼtì sáʼka wo juŋ və̀n, a m lim sháŋ lèn a dzə̀ bìʼ sáʼka woo shooy. Vèn ku nèn a bùnrì ji m ku yòʼ a fìʼtì tèéter, là fan, mo dzə̀ m kù a fìʼtì.

Por shaʼtì wíri

²¹ Kee kùm dzəʼə̀m yém yee fen lèn ki nén a dzə jii, fər wòsən Ticikur wíy wìy, é wù naari ven vinyo ve ví kooy mo vidzə̀m. A wun woo Ticikur dzə̀ wír, a wù lim e kinyò ke Tàr wòsən Jesus Kristu feyì, a wìr dzə̀m koŋ wun.

²² M nén a tum wun fo vèn ji wù wiy, e fèr ven á mo vèr dzəə̀n, é melív men mè rəsin.

²³ Afə̀r ver, vèr nén a lon jii, Nyùy Tàr wùn Taàtá wòsən Jesus Kristu ku yiì, é melív men mè wáa dzə nyaáŋ, é vèn kfə́n a kòŋnìn, a way shilív a dzə̀ e Nyùy wùn.

²⁴ Kfə̀n lón ji Nyùy kú a kòŋ ven, a leéy fo vèn adzə̀m, ven ve á wayin Tàr wòsən Jesus Kristu e shiliv, e kpù shó.