Efesor 4 - ŊWÀʼ NYÙY

Wír Kristùu wáa dzə kintatì

¹ Mo woo Por wo m lim sháŋ bìʼ kinyo ke Tàr wòsən Jesus Kristu nén a lon jii, vèn kú a ker dzəʼə̀m a dzə̀ yé wìr Nyùy mo wù‑uù liìn ven ji vèn wáa dzə.

² Vèn wáa lì vitú vén shishàr, a borkír, a ker wir dzə̀m ji weè, a kòŋ áwune, é la wìr yòʼ a yen jay wìr.

³ Vèn kú a dzə kintatì mo Kiyoy ke Nyùy ki tatin ne ven, vèn wáa dzə wír amòʼón ji nyaáŋ.

⁴ Vèn wáa kuumé ji kintatì ke wìr Nyùy ki kù jòʼsì kitú kimòʼón, a dzə̀ ji wún Kristu. Kiyoy ke Ranén kí jóʼsí sá kimòʼón, a kù dzə̀ sá mo vèsən adzə̀m shiy kifá kimòʼón, a dzə̀ vijuŋ ve Nyùy‑iì liìn vèsən ji á wìy nə̀ə́ sho.

⁵ Tàr wòsən wáa dzə sa e mòʼón, a dzə̀ Jesus Kristu. Vèsən kfən biìmé kinyo kimòʼón, á wáy vèsən é ndzəv a dzə̀ bìʼ kee shó kimòʼón.

⁶ Nyùy wáa dzə sa e mòʼón, a dzə̀ wun wo dzəə̀n Tàr à wìr dzə̀m, a sáʼ wun vifá vidzə̀m, din mo ví wáa lìm. A kfə̀n fó wun vitaáví, bo ví wáa lìm sho.

⁷ Mo vèsən fə̀m dzəə̀n ji kitú kimòʼón, wìr kù kér rə́ yee lim e ntuʼ ye Kristu bùʼùn wun sho, e fò vitaáví mo dzə̀ wù wàa lìm.

⁸ A dzə̀ mo vé‑eè saŋen jii: «Wù kóʼ e yuv moo wír wo wù kfə́n fo kwaʼ rər, tsəə́ne wír ve wù koon, jav vifá e wíri.»

⁹ Mo kí suuy fo ji wù kóʼ e yuv, bo dzə̀ ji wù kù‑uù lo sə̀y é nsay fèn.

¹⁰ A kí dzə̀ jii, wun woo Kristu wo wù‑uù səyin é nsay kù dzə̀ wun woo shó wo wù kfənen é ntoò yùv ji wun fíʼ tatí vinyo vidzə̀m, a lìm sho virə́ʼ vidzə̀m.

¹¹ Mo wù kfənen, e nèn jàv ambùʼmé e wíri é kitu kitu. Wù bùʼ ámóʼó, á wáa dzə aŋgàa ntum və́, ámóʼó wáa yu kinyo fo Nyùy, a tiisí e wíri, ámóʼó wáa fìʼtì kinyo kfə́ e wír ve bó á yòʼ kiìn Nyùyi, ámóʼó wáa leéy fo kintatì ke wìr Nyùy ki, ámóʼó wáa yeʼéy kintatì.

¹² A wù jav vifií vé vinyò vìn jeéy jeéy, é wír Nyùy adzə̀me fíʼ a dzə ve dzə̀ á wàa lìm kinyo, é kintatì ke dzəə̀n wún Kristu ki fiʼ tùúy, a tav, a dù fo mbìy,

¹³ é vèsən nèn màysì, a way shilív e wun woo Wan Nyùy wùn, a kiíy mo vinyo və́ ví dzəə̀n, a tiy sho ji wír amòʼón. Vèsən nén a dzə wír ve sí yéví ranen ne, a kiíy vinyo ve Jesus Kristu réŋréŋ mo wun woo Kristu kiìn.

¹⁴ Vèsən kiiy bèy, é la á yòʼ dzə́ə a dzə moo wónlè, a biimé vinyo ve wìr ve á ghán, lévti wíri, ghaa vinyo gháan, yéʼey ji vé Jesus Kristu. A bó yòʼ dzə̀ vèsən kfə̀n a kar moo kikóŋ ke shwéri dom, a kí du fo wú du.

¹⁵ Késən kí kù dzə̀ ji á wáa tiy e kinyò ke ru kí, a suúy a dzə̀ kíwun e dzəə̀ kikòŋnìn, e nèn a dzə, a yiì vinyo vidzə̀m, a dzə̀ ve yii Kristu. A dzə̀ wun ji kitú ke kintatì ke dzəə̀n ji wún və́ kin,

¹⁶ a kér wun wún woo shooy e dzə̀m. Vibar ve wùn vidzə̀m vi wáa yu a dzə̀ fó fo, e bó a lìm vimòʼón. Vèsən vee vibar ve wùn vin nén a lìm e mvə̀m kintatì, a koynín vitú, a kòŋnìn, kintatì ki wáa kuy, a dzə kitávín.

Wír Kristùu kér liì a dzə̀ wo fíy

¹⁷ Ke m tír ven shó e Tàr wòsən Kristu yir kí nén a dzə jii, lá vèn yòʼ dzə́ə a dzə, a yiì a moo wír ve bó á yòʼ kiìn Nyùy. Áwune yòʼ kì fo á dzəə̀n.

¹⁸ Vifíi vév ví dzə̀ visə́nér. Mo á tenen fó a yuurí kinyo ke Nyùy, e nèn mèŋ wun, e ràn dzəʼə̀m ye yí lo fo wun.

¹⁹ Áwune lùr ne, a bó á yòʼ dzəə́ woóme fo kinyò, nèn wáy vifií a dzə̀ é vinyò ve bi ví, kér shií a dzə̀ fó a yiì kfəə́ se vinyò ve kisaŋ vi sidzə̀m.

²⁰ A bó yòʼ dzə̀ mo vé‑eè yeʼeyin ven kinyo ke Kristu bèy.

²¹ Vé‑eè lo yèʼéy ven féyì. Vèn‑eè yù sáʼka və, e tàtí vèn áwune, á nèn yèʼéy ven kinyo kfə́ kidzə̀m, a dzə̀ kee shó ke dzəə̀n ke ru kí.

²² Vèn maʼti ri liì wo vèn‑eè kér fo mbìy. Wù‑uù bìvír ven bívírín, bìʼ fo vèn‑eè wáy vifií a dzə̀ é vinyò ve mensə́ men mè lim, dom ven, a vèn yii.

²³ Lèn və̀n, vèn kú a way vifií a dzə̀ é vinyò ve fíy vi, é melív men mè wáa lùm sho ghán sidzə̀m.

²⁴ Vèn wáa ker liì a dzə̀ wo fíy wo Nyùy fó e vèn, a dzə̀ və́ə woo liì, a yiì vinyo ve ru ví là kiloʼ, a yu a dzə̀ fo wun woo Nyùy.

²⁵ Kí nén a dzə jii, lá wìr yòʼ dzəə bòʼtí a fə́r və. Wìr wáa suúy a dzə̀ kinyo ke ru kí e fər və, a kuumé ji mo wùn wun tatin e Kristu kinyò, á sì á ji kitú kimòʼón.

²⁶ Kilòŋ kí shwiiy wír, wù wàa yen fo kinyo ke bi kí nəə́ shó. Lá wù yòʼ màʼtì, é ndzə jí shó, a bó wù máyír,

²⁷ fo Satan koóy kintóʼ kée màʼ wun sho.

²⁸ A dzə̀ wír, a wù‑uù sí shóŋ vishóŋ, wù kù màʼtì, a lìm lim e wó rəə́, a koóy kifá e dzəə yee réŋ, a sə sa wír ve á búŋ sho.

²⁹ Vèn wáa yen fo wìr wáa suŋnín lám wo bií. Vèn wáa suúy a dzə̀ kinyo ke kí wáa tir wír tirín, wíri lóo yu, aá wáa yu a dzə̀ vijuŋ.

³⁰ Lá vèn yòʼ a yiì kinyo ke Kiyoy ke Ranén kí wáa yu ntéŋ, a sòv kitú. Vèn wáa kuumé ji Kiyoy ke Ranén kin ki dzə̀ kisəə́y ke Nyùy‑iì foon e vèn ji kishiíy kí wíy gheén, é wù luŋèr ven ŋkuuŋkùŋ.

³¹ Vèn maʼti vinyo ve ví yii yii, a wíri bírnin vi vidzə̀m. Lá wìr yòʼ a shevkír, a shwiíy kilòŋ fo wùmòʼ, a leéy wùmòʼ, é shilív shí wáa nyar. Lá vèn yòʼ a wamnín. Lá wìr yòʼ a lor wír. Vèn ku màʼtì melív me bi mè.

³² Wìr kú a sham wír, a way ŋgaàŋ e shiliv. Wìr jáy kinyo, vèn kù làysìn réŋréŋ mo vèn à Jesus Kristu tatin, Nyùy láysín vén vee ajay.