Efesor 3 - ŊWÀʼ NYÙY

Por tóʼti mo Nyùy li kfə́ə wìr dzə̀m ji və́

¹ Mo Nyùy liìn ne ven sá ji və́ vee wír, m nén a bùnrì fo vèn ghán sidzə̀m. A dzə̀ mo woo Por wo m lim sháŋ, bìʼ fo m fiʼtì kinyo ke Jesus Kristu a dzə̀ e vèn ve bó yòʼ dzəə̀n wír veé Isray.

² A m kì ji vèn‑eè lo yù sáa ji Nyùy‑iì shòʼ mo ji m wáa yiì lim rə̀n fo vèn, é vèn fíʼ kiíy mo wù koŋ sa ven.

³ Kinyo kee shooy ki‑iì dzə̀ é kilìtì, la wìr yòʼ a kiíy gheéy. Nèn ghèmrí wúnwun woo Nyùy kinyo kìn e mò, bo m kiíy réŋréŋ mo m kì shòyìn, e naàrì, e mèé fèn.

⁴ A vèn yíi lòo yòŋ ŋwàʼ və̀n, é vèn nèn yù réŋréŋ mo m kiìn kilìtì ke kinyò ke Nyùy‑iì sìysìn ji Kristu wíy yiì kìn, e dù, e meé.

⁵ Yì‑iì dzə̀ fó mbìy, a bó Nyùy yòʼ‑oò lo dìn kinyo ke wù‑uù sìysìn kin ji wíri kiíy. A wù tùm ne Kiyoy kfə́ lèn, kí dín a dzə̀ áàŋgàa ntum Kristu ve wù shavin jeéy, á wáa yu kinyo fo wun woo Nyùy shùu.

⁶ A kinyo kee shoon ki dzə̀ jii, wír ve bó yòʼ dzəə̀n veé Israyi yú á sáʼka woo kùm Jesus Kristu, e biìmé, é Nyùy tátí wùn à veé Israyi, aá wáa dzə kintatì kimòʼón ji wír və́. Aáwune kfə̀n nə̀ə́ ne e mvə̀m vijùŋ ve Nyùy fó e wír vəə́ adzə̀m. A dzə̀ lèn áwune wàa shìy sa vinyo ve Nyùy‑iì kàʼàn wír ve dzəə̀n vé Jesus Kristu sho vidzə̀m.

⁷ Kù‑uù lì wun woo Nyùy mo ji m wáa lìm fo wun, a fìʼtì kinyo kìn, mo wù bùʼùn mo, m kiíy mo kí dzəə̀n, a kù lim və́ vee vitaáví e mǒ wùn, bo m wáa kiíy.

⁸ Wù‑uù fò lim yee shoon a dzə̀ e mò və̀n, mo wo m dzəə̀n bám fo wír vəə́ adzə̀m. Wù‑uù tùm mo ji m wáa ghan fo wír ve bó yòʼ dzəə̀n veé Israyi, a fìʼtì a nyanyày vijùŋ wo Nyùy fó e wír ve á tatin wùn à Jesus Kristùu adzə̀m.

⁹ Kí kfə́n a dzə jii, m naari kinyo kìn, é wìr dzə̀m kiíy á ji Nyùy sí li wír ve bó yòʼ dzəə̀n veé Isray sa lèn ji və́ vee wír. Kù‑uù sìysì wun woo Nyùy wo wù‑uù bomen vifá vidzə̀m kinyo kìn fo ŋgùʼ, e lìtì, la wìr yòʼ kìíy, e shem lèn.

¹⁰ Nyùy nen yiì, kintatì ke wìr Kristu kìn ki fəə́sín lèn ji vifá ve ví dzəə̀n é yuv ví lóo yen, aá nèn səə̀m mo vifií vé Nyùy vi shaàn vitaáví, a ví dzə̀ dzə́ə sí dzə́ə sí. A kù yén nshèelav sə́ wùn à vifá ve ví kér vitaáví é yuv ví vidzə̀m.

¹¹ Aá yén lèn a dzə̀ mo Nyùy‑iì sìysìn fó ŋgùʼ ji Tàr wòsən Jesus Kristu wíy wìy, é wù yii, é vinyo vìn vi koóy vidzə̀m.

¹² Vèsən ve á tatin vèsən à Kristùu nén a dzə lèn, a kiíy ji dzə̀ vèsən wàa koʼtí e Nyùy si ghán sidzə̀m, là fan, bìʼ fo vèsən wayin shilív e Wan və́ wùn.

¹³ M nén a suúy e vèn ji lá vèn yòʼ a leéy ŋgeʼ se m yén e sháŋ, bìʼ fo m fiʼtì kinyo ke Jesus e vèn, a weèy fo kinyò ke wù liìn ven shó. Mo m biimen ŋgeʼ sìn a dzə̀ bìʼ ven, vèn kú a sheʼrí mo shéʼrín.

Por bunrì fo wír veé Efesori

¹⁴ M nen kfə̀n a màysì ke m kì gaʼan jii, mo Nyùy liìn ne ven sá ji və́ vee wír, m nén a tsəm e wun woo Tàr wòsə́n si, a bùnrì fo vèn.

¹⁵ A dzə̀ wun wo dzəə̀n Tàr à wìr dzə̀m, kìn dzə̀ nshèelav sə́ seé yuv, kìn dzə̀ wír veé nsay.

¹⁶ Mo dzəə̀n wun wo kuʼùn, a vifá vidzə̀m vi dzə̀ a dzə̀ e wùn kiwo, m nén a lon ji wù ku yiì, é Kiyoy kfə́ kí wáa tavír ven, é vèn wáy gháŋ, é melív men mè wáa lùm e wùn kinyò ghán sidzə̀m.

¹⁷ A m kfə̀n lón ji vèn ku màysì, e wày shilív e Jesus Kristu wùn, é wù wáa dzə e věn meliv, é vèn áwune nəə́nín, a kòŋnìn, é vèn wáa tiy kitávín moo kicí ke gháŋé nəən é nsay, kìn moo lav ye á bàʼrìn é kinsə̀ŋ ke tavín kí.

¹⁸ A m lón bèy ji melív men mè lóo lùm fo wun, é vèn kiíy mo koŋ ye wù koŋ vèsəné dzəə̀n, réŋréŋ mo Nyùy koŋ ji dzə̀ wír vəə́ kìíy adzə̀m. A kí dzə̀ jii, Kristu koŋ wír veé kitu ke nsay adzə̀m, a wù kù wíy a kòŋ, e dù, e màysì, kìn dzə̀ wo terí, kìn dzə̀ wo kuʼùn.

¹⁹ Á mo m lón ji vèn ku kìíy a mo Jesus Kristu koŋ ven. A bó yòʼ fə̀m dzə̀ wìr kìíy, e dù, e màysì. Vèn kiiyì, é wun woo Nyùy nèn a dzə e věn meliv, a dànèr ven, é vèn wáa yiì vinyo ve wù koŋ vidzə̀m.

²⁰ Vèsən ku nèn a burí Nyùy, Nyùy wo dzə̀ wù yiì vinyo ve m lón vìn vidzə̀m mo wù yii, a və́ vee vitaaví ví lim e vèsə́n wùn. A dzə̀ wù yiì, e tònén feyì, e kfə̀n shaà mo dzə̀ á wàa kwàʼtì.

²¹ Vèsən vee kintatì ke wìr Nyùyi ku nèn a beè Jesus Kristu, a burí Nyùy ghán sidzə̀m, viyá viyá là may. Amen.