Efesor 2 - ŊWÀʼ NYÙY

Nyùy fó dzəʼə̀m ye fíyi e wír Kristùu

¹ Yì‑iì dzə̀ fó mbìy, a vèn kpú ne fo Nyùy mbìv, bìʼ fo vèn‑eè dzə́, méŋ Nyùy, yii a dzə̀ vinyo ve bi ví.

² Vèn‑eè yú kinyo a dzə̀ ké fòn *anyùy, nèn yii kinyo a dzə̀ keé ndzə ye kér wun rə̀n. A dzə̀ wun wo wù sáʼ vifá ve ví ghán e shwer ji anyùy vidzə̀m, a ghán wun lèn, danèr wír ve á méŋ Nyùy adzə̀m, aá yii vinyo ve bi ví.

³ A kù dzə̀ mo vèsən adzə̀m‑eè dzəə̀n. Vèsən‑eè yú a dzə̀ mo mensə́ mè lim e vèsə́n wùn, a mè ŋáʼar melív mèsən, a vèsən kwaʼtì vinyo ve bi ví, yii mo ví gheenen vèsən. A vèsən‑eè yii bèy, li a dzə̀ lǒn Nyùy mo wír adzə̀me‑eè li.

⁴ Yii bèy, Nyùy kú a kòŋ vèsən é ŋàáŋàŋ, a rər mendzən fo vèsən ghán sidzə̀m.

⁵ Mo vèsən fə̀m‑eè kpuun fo wùn mbìv, bìʼ fo vé‑eè méŋ wun, wù ku yòʼ tàtí vèsən à Jesus Kristu, e fə̀ə́r fo kpu. A bó yòʼ‑oò dzə̀ vèsən lùŋ. Wù‑uù bùʼ vèsən búʼun.

⁶ Mo wù tatin vèsən à Kristu, e fə̀ə́r fo kpu, wù nèn kòʼór sa vèsən e Kristu bàm ji vèsən wáa dzə sa vitú ve saʼ veé yuv, vèsən áwune.

⁷ A wù‑uù yii bèy ji wun din á mo wun kòŋèn vèsən, e bùʼ e mbùʼmé woo là mfìʼ bìʼ Jesus Kristu wo vèsən áwune tatin, aá wáa yen ghán sidzə̀m, e dù, e mày.

⁸ Vèn ku nèn a kiíy ji Nyùy lùŋèr ne ven, ve vèn wayin shilív e Kristu wùn, a dzə̀ bìʼ fo wù shamen ven shámén. Bó yòʼ yiì ven gheéy. Wù bùʼ ven búʼun.

⁹ A bó yòʼ dzə̀ wìr wàa sevtí ji yiì a wun. Bó yòʼ dzə̀ wìr kòóy mbùʼmé və̀n bìʼ lim yímóʼó ye ŋgaàŋ yiìn gheéy.

¹⁰ Ke kí dzəə̀n kí dzə̀ jii, yì‑iì tàtí Nyùy vèsən à Kristu ji vèsən wáa dzə, a yiì a vinyo ve juŋ vi. A vinyo vìn vi dzə̀ ve wù‑uù yiìn ne sìysì fo ŋgùʼ ji vèsən wíy lòo dzə, aá wáa yiì.

Kristu tàtí kfə́ə wìr dzə̀m ji wír Nyùy

¹¹ Ven ve bó yòʼ dzəə̀n wír veé Isray, wír veé Israyi yii leey ven ntéŋ ji bó á yoʼ sàŋ *mbèʼ sén ji wír Nyùy. A kù dzə̀ kifá, aá yii a dzə̀ é wùn, e kiwó ki. Ven vin, vèn kuúmé mo vèn‑eè dzə́ fo mbìy.

¹² Vèn yòʼ‑oò ló a kiíy wír wùmòʼ ji Kristu woo *Mfə̀ə́r gheéy, e bó a shìy. Mo bó vèn yòʼ‑oò dzəə̀n wír veé Isray, vèn yòʼ‑oò ló a dzə e mvə̀m *mensàŋ me wù‑uù gwàrìn wùn áwune. A bó kinyo ke wù‑uù kàʼàn áwune shó ki yòʼ dzə̀ kén. Kifá ke yì‑iì dzə̀ vèn tìír vifií shó, a shìy fo Nyùy ki yòʼ‑oò dzə̀. Vèn kù‑uù dzə́ kén dzəə́n, a bó á yòʼ kì Nyùy.

¹³ Yii bèy, mo vèn à Kristu tatin ne, a vèn‑eè dzə́ kwaʼda fo Nyùy, wù lì ne ven sá lèn e wun wùn, bìʼ fo Kristu‑uù cùtìn mensə́ mvə, e kpù fo vèn.

¹⁴ Dzə̀ wun woo Kristu wo wù tatin vèsən adzə̀m ji wír Nyùy, á wáa dzə lèn amòʼón ji nyaáŋ, là kinyo. Yì‑iì dzə̀ fó mbìy, a bó ver vee wír veé Israyi yòʼ yén wír ámóʼó ji wír Nyùy gheéy. Kristu nèn wìy, e lì mbom wìr, e shòʼ mbàŋ ye yì‑iì jàvsìn vèsən rə̀n.

¹⁵ A kí dzə̀ jii, wù‑uù màyìr nsər ye wír veé Israyi yén ji yéev yee dzə́ə ye dzə̀ wìr kù shaà sho, e bó a dzə wir Nyùy. Wù yiì bèy, e nèn tàtí wír adzə̀m, a vé‑eè dzə́ jeéy jeéy, wù lì e wun wùn, aá wáa dzə wír amòʼón moo rám ye fíyi ji nyaáŋ, là kinyo.

¹⁶ A bó yòʼ dzə̀ kifá kímóʼ kí kfə̀n jàvsìn vèsən gheéy. Mo wù‑uù kpuun é kintam, wù‑uù màn ne vinyo ve vèsən‑eè jayin fo Nyùy adzə̀m, e tàtí vèsən ji wír Nyùy, aá sì kifá kimòʼón.

¹⁷ Wù‑uù wìy é ndzə fèn ji wun fiʼti á sáʼka wo juŋ və̀n. A dzə̀ sáʼka woo mo dzə̀ wìr wàa dzə kijuŋ wùn Nyùy, kìn dzə̀ ven ve bó yòʼ dzəə̀n wír veé Isray ve bó á yòʼ‑oò kiìn Nyùy, kìn dzə̀ ver veé Isray ve á kiìn kinyo kfə́.

¹⁸ Vèsən adzə̀m nén a dzə lèn, a dzə̀ á wàa beè Kiyoy ke Ranén kí, a koʼtí e Nyùy woo Tàr wòsə́n si. Aá kù bee a dzə̀ Kiyoy kee shó kimòʼón.

¹⁹ Kí nén a dzə jii, ven ve yòʼ dzəə̀n wír veé Israyi yòʼ dzə̀ə́ a wír vee viy fo Nyùy mbìv, yór wun yórín. Vèn à wír veé Israyi sì wír wun woo Nyùy adzə̀m, a dzə̀ ji kfə́ə Nyùy.

²⁰ A kfəə́ rə̀ne dzə̀ sá lav wun woo Nyùy ye wù bóm e kinsə̀ŋ ke aŋgàa ntum Kristu ve á yú fo Nyùy shùu wayin. A kù dzə̀ Jesus Kristu tíy ye yí tóm kinsə̀ŋ kìn.

²¹ Ku nèn ghàr wun lav yee shoon e dzə̀m, a ker, yì wáa kuy, a dzə ji lav wun woo Nyùy ye ranén.

²² Mo vèn à Jesus Kristu tatin ne, Kiyoy ke Ranén kí nen tàtí sa vèn à wír Nyùyi adzə̀m, wáa dzə lav ye wun woo Nyùy shiiy sho.